Gözlənildiyi kimi, Vaşinqtonda ABŞ Prezidenti Donald Trampın vasitəçiliyi ilə Azərbaycan Prezidenti İlham Əliyev və Ermənistanın Baş naziri Nikol Paşinyan arasında əldə olunan razılaşma Moskva və Tehranın narazılığına səbəb olub.

Rusiya Xarici İşlər Nazirliyinin rəsmi sözçüsü Mariya Zaxarova görüşü “müsbət” qiymətləndirdiklərini vurğulayıb və bu addımın sülh gündəliyinin irəliləməsinə dəstək olacağına ümid etdiyini bildirib. Zaxarova qeyd edib ki, Cənubi Qafqazın problemlərinin həlli üçün ən optimal yol region ölkələrinin, yəni Ermənistan və Azərbaycanın özləri tərəfindən, eləcə də qonşu ölkələrin — Rusiya, İran və Türkiyənin dəstəyi ilə tapılmış həll yollarıdır. O əlavə edib ki, regiondan kənar oyunçuların, xüsusən ABŞ-nin prosesə qoşulması yalnız sülh gündəliyini gücləndirməlidir, əlavə çətinliklər, qarşıdurma və region daxilində düşmənçilik yaratmamalıdır.

Zaxarova həmçinin vurğulayıb ki, Moskva Vaşinqton görüşündə səsləndirilən, regional kommunikasiya xətlərinin blokadasının aradan qaldırılması ilə bağlı bəyanatları diqqətlə təhlil edəcək və qeyd edib ki, indiyədək Rusiya, Ermənistan və Azərbaycan arasında mövcud olan üçtərəfli razılaşmalar hələ də qüvvədədir və heç bir tərəf onlardan çıxmayıb. Nazirlik sözçüsü əlavə edib ki, bu məsələdə Ermənistanın Avrasiya İqtisadi Birliyinə (AİB) üzvlüyü və həmin qurum çərçivəsində tranzit yük daşımasının təşkilinə dair öhdəliklər nəzərə alınmalıdır.

Son olaraq Zaxarova bildirib ki, sülh müqaviləsinin imzalanması və qüvvəyə minməsi Ermənistan və Azərbaycan arasında dövlətlərarası münasibətlərin rəsmi qurulması region üçün dönüş nöqtəsi olacaq və bu proses balanslı yanaşma və qonşu ölkələrin maraqlarına hörmət əsasında aparılmalıdır.

İranın ali liderinin müşaviri Əli Əkbər Vilayəti isə ABŞ-nin dəstəyi ilə Ermənistan üzərindən Naxçıvanı Azərbaycanla birləşdirəcək koridorun yaradılmasına qarşı çıxdıqlarını bəyan edib. O, ABŞ-nin bölgədə təsirinin artmasının NATO-nun Cənubi Qafqazdakı mövqelərini gücləndirəcəyini və bunun “İran ilə Rusiya arasına girəcək ilan” rolunu oynaya biləcəyini bildirib. Vilayəti vurğulayıb ki, Tehran belə bir layihənin reallaşmasına imkan verməyəcək.

Təcrübə göstərir ki, 2020-ci ildə baş verən və Azərbaycanın işğalçı Ermənistan üzərində qələbəsi ilə bitən 44 günlük müharibədən keçən 5 il müddətində rəsmi Bakı sülh gündəliyini öz milli maraqlarına uyğun şəkildə davam etdirib. Bu zaman nə qonşu ölkələrdən, nə də Qərbdən gələn əsassız bəyanatlara, təzyiq cəhdlərinə əhəmiyyət verməyib. Nəticədə Azərbaycanın ərazi bütövlüyü və suverenliyi tam təmin olunub, əldə olunan uğurlar avqustun 8-də Vaşinqtonda imzalanan birgə bəyanat və digər sənədlərlə beynəlxalq miqyasda qəbul olunub. Rusiya və İranın bəyanatları həmişə olduğu kimi mətbuatda qısamüddətli dedi-qodulardan o tərəfə keçməyəcək.

Rasim Əliyev