"Əslində, avqustun 8-də Vaşinqtonda əldə edilən razılaşmanın bir interpretasiyası da bundan ibarətdir ki, Zəngəzur Azərbaycana qismət olmasın deyə, Nikol Paşinyan onu 99 illik ABŞ-a icarəyə verdi.

Donald Tramp bütün dünya siyasətinə alverçi gözü ilə baxdığına görə buna qol qoydu.

Yadınızdadırsa, Zəngəzuru Azərbaycana icarəyə vermək təklifini ilk olaraq Mixail Saakaşvili bir neçə il əvvəl həbsxanadan vermişdi. Rəsmi Bakı o vaxt bu təklifə maraq göstərməmişdi. Çünki o vaxt qarşıya qoyulan məqsəd nəinki icarə, hətta gömrük rüsumu ödəmədən bu yoldan istifadə etmək idi.

Azərbaycanda Zəngəzuru hərbi yolla ələ keçirmək barədə də çağırışlar, bəlkə hətta planlar var idi. O zaman İran bunu əngəllədi. Amma nəticə İran üçün daha pis oldu: Amerika gəlib İranın ağzının içinə girdi.

Azərbaycan, ABŞ və Ermənistan fərqli motivlərə görə bu məsələdə razılığa gəliblər. Amma reallıqda bunun necə icra olunacağı maraq doğurur.

"Tramp yolu'nun istifadəsi kommersiya şirkətinə həvalə edilsə də, onun təhlükəsizliyini kim təmin edəcək? Yəgin ki, Amerika təhlükəsizlik qüvvələri təmin edəcək, eləmi?! İranın Ermənistanla sərhədlərini - həmin o 42 kilometri Rusiya hərbçiləri qoruyur. İndi təsəvvür edin, eyni ərazidə həm ABŞ, həm də Rusiya hərbçiləri, sərhəd məftilinin o biri tərəfində isə İran hərbçiləri. Bir-birinə qarşı olan üç müxtəlif dövlətin təhlükəsizlik qüvvələri eyni ərazidə necə yola gedəcəklər? Məncə mövzu hələ bitməyib."