Rusiyalı filosof Aleksandr Duqin Azərbaycan və Ermənistan arasında Vaşinqtonda imzalanan sülh müqaviləsinə görə ölkəsinin xarici siyasətinin başında duranları kəskin tənqid edib.

O, “insanların Cənubi Qafqazda bizim siyasətimizin tam uğursuzluğuna görə heç bir cəza almadan qalması alçaldıcıdır” – deyə yerli mediaya bildirib.

Duqin vurğulayıb: “Azərbaycan və Ermənistan arasında Vaşinqtonda imzalanan sülh müqaviləsi bizim əzəmətimizin, post-sovet məkanında heç nəyi nəzarətdə saxlaya bilməməyimizin göstəricisidir. Bu ağrı, bu təhqir, bu hər birimizə, hər bir rus insanına vurulan tərs zərbədir.”

Filosof əlavə edib ki, “Əliyev və Paşinyanın Vaşinqtonda görüşü və sənədləri imzalaması Rusiya üçün böyük bir rüsvayçılıqdır və məhz belə qəbul edilməlidir.” 

Duqin deyib: “Biz səhv etdik, uduzduq, regionla işi tamamilə yanlış insanlara etibar etdik. Başqa cür izah edilə bilməz.”

O, həmçinin qeyd edib ki, “əgər biz bu məğlubiyyəti məğlubiyyət kimi qəbul etməsək, suveren dövlət-sivilizasiya olmaqdan çıxarıq.” 

Duqin ədalətin bərpası və bu uğursuzluğa səbəb olanların cəzalandırılmasının vacibliyini vurğulayıb: "Günahkarlar cəzalandırılmazsa, xalq olaraq dəyərimizi itirəcəyik,”

“Artıq bu işin sonu olmalıdır” – deyən Duqin bildirib ki, məsuliyyət daşıyan şəxslərlə yanaşı, diasporalar və xarici lobbiçilər də məsuliyyətə cəlb edilməlidir. O, Rusiya imperiyası kimi qalmaqla Vaşinqtonda yaşananlar kimi alçaldıcı nəticələrə layiq olmaq arasında seçim etməyin vaxtının çatdığını deyib.

Duqin fikrini belə yekunlaşdırıb: “Biz böyük xalqıq, amma əgər məğlubiyyəti məğlubiyyət, xəyanəti xəyanət, alçaltmanı alçaltma kimi qəbul etməsək, bizim heç bir dəyərimiz yoxdur.”

Görünür, Duqin kimi imperiya ambisiyaları ilə alışıb-yanan filosoflar regiondakı yeni reallıqları ya görməzdən gəlir, ya da qəbul etmək istəmirlər. Filosof unudur ki, indi nə Rusiya həmin Rusiyadır, nə də Cənubi Qafqaz onun “arxa bağçasıdır”. Azərbaycan–Türkiyə tandemi artıq xeyli vaxtdır bölgədə yeni güc balansı yaradıb və Duqinin Rusiyası öz mövqelərini sürətlə itirərək regionu tərk etmək üzrədir. Hələ qarşıda imperiya ambisiyalı “ziyalıları” təəccübləndirəcək, hiddətləndirəcək çox hadisələr olacaq. Amma qorxunun əcələ faydası yoxdur – Rusiya öz əkdiklərini biçir və nəticə onun üçün ədalətli olacaq./azpolitika