Dövlət Miqrasiya Xidmətinin (DMX) son məlumatına görə, iyul ayında Azərbaycan vətəndaşlığına dair mənsubiyyətin müəyyənləşdirilməsi ilə bağlı isə 1914 müraciət qeydə alınıb. Yenə də rəsmi statistikaya əsaslansaq, 2021-ci ildə – 361, 2022-ci ildə – 329 nəfər, 2023-cü ildə – 321 nəfərə Azərbaycana vətəndaşlığı verilib. 2024-cü ilin ilk aylarında isə bu rəqəm 298 nəfər olub.

Bir çox ölkələrdə vətəndaşlıq hüququ qazanmanın güzəştli qaydaları mövcuddur. Məsələn, müəyyən məbləğdə əmlak alma. Azərbaycanda vətəndaşlıq almaq üçün xüsusi imtiyazlar (məsələn, daşınmaz əmlak almaq) mövcuddur. Azərbaycan Qanunvericiliyi bu prosesi daha ciddi və konkret şərtlərə bağlayır.

“Vətəndaşlığı haqqında” Qanuna əsasən, əcnəbilər və vətəndaşlığı olmayan şəxslər aşağıdakı şərtlər yerinə yetirildikdə vətəndaşlıq üçün müraciət edə bilərlər:

Daimi Yaşayış: Ərizə verən şəxs müraciətdən əvvəl ən azı son 5 ildə Azərbaycan ərazisində daimi yaşamalıdır

Hüquqi Əsaslar: Ölkədə yaşadığı müddətdə qanuni əsaslara, yəni müvəqqəti və ya daimi yaşama icazəsi olmalıdır.

Dil Bilikləri: Azərbaycan Respublikasının dövlət dilini sərbəst bilməsi vacib şərtlərdəndir.

Qanunlara Hörmət: Azərbaycanın Konstitusiyasına və digər qanunlarına riayət etməli, ölkənin dövlət quruluşuna hörmət göstərməlidir.

Maliyyə Təminatı: Şəxsin özünü və ailəsini təmin etmək üçün qanuni gəlir mənbəyi olmalıdır.

Miqrasiya Məcəlləsinin 50-ci maddəsində nəzərdə tutulmuş hallar istisna olmaqla, əcnəbilərə və vətəndaşlığı olmayan şəxslərə aşağıdakı hallarda Azərbaycan Respublikasının ərazisində müvəqqəti yaşamaq üçün icazə verilir (müddəti uzadılır):

Azərbaycan Respublikasının vətəndaşı ilə yaxın qohumluq münasibətlərində olduqda;

Miqrasiya Məcəlləsinin 45.1.3-45.1.3-2-ci maddələrində nəzərdə tutulmuş hallar da nəzərə alınmaqla, ölkə iqtisadiyyatına qoyduğu investisiya məbləğinin cəmi azı 500.000 manat olduqda;

Azərbaycan Respublikasının ərazisində azı 100.000 manat dəyərində daşınmaz əmlakı olduqda;

Azərbaycan Respublikasında fəaliyyət göstərən banklara müddətli əmanət müqaviləsi əsasında azı 100.000 manat məbləğində pul vəsaiti qoyduqda;

Nominal dəyəri azı 100.000 manat olan dövlət qiymətli kağızlarına və ya eyni həcmdə paylarının (səhmlərinin) 51 və daha artıq faizi dövlətə məxsus olan hüquqi şəxslərin investisiya qiymətli kağızlarına malik olduqda;

İqtisadiyyat, sənaye, hərbi, elm, mədəniyyət, idman və digər sahələr üzrə yüksək səviyyəli mütəxəssis olduqda;

Miqrasiya Məcəlləsinin 64.0.8-1-ci maddəsində nəzərdə tutulmuş mütəxəssis və ya yüksəkixtisaslı miqrant olduqda;

Azərbaycan Respublikasının ərazisində müvəqqəti və ya daimi yaşayan əcnəbi və ya vətəndaşlığı olmayan şəxslərin ailə üzvləri olduqda;

Xarici hüquqi şəxsin Azərbaycan Respublikasındakı filial və nümayəndəliyinin rəhbəri və onun müavini vəzifəsini tutduqda;

Azərbaycan Respublikasında təsis edilmiş, ödənilmiş nizamnamə kapitalı Azərbaycan Respublikasının İqtisadiyyat Nazirliyi tərəfindən təsdiq edilmiş miqdardan az olmayan, təsisçisi və ya təsisçilərdən ən azı biri xarici hüquqi və ya fiziki şəxs olan hüquqi şəxsin rəhbəri vəzifəsini tutduqda və ya həmin hüquqi şəxsin paylarının (səhmlərinin) azı 51 faizinə sahib olduqda;

Azərbaycan Respublikasında sahibkarlıq fəaliyyəti ilə məşğul olduqda;

Miqrasiya Məcəlləsinin 64.0.6-cı, 64.0.6-1-ci, 64.0.7-ci, 64.0.9-cu, 64.0.10-cu, 64.0.11-ci, 64.0.17-ci, 64.0.18-ci və 64.0.19-cu maddələrində nəzərdə tutulan hallarda;

Azərbaycan Respublikasının ərazisində haqqı ödənilən əmək fəaliyyəti ilə məşğul olmaq üçün bu Məcəllə ilə müəyyən edilmiş qaydada iş icazəsi aldıqda;

Azərbaycan Respublikasının ali və orta ixtisas təhsili müəssisələrində əyani formada, habelə peşə təhsili və ümumi təhsil müəssisələrində təhsil aldıqda;

Dövlət qeydiyyatına alınmış dini qurumlarda peşəkar dini fəaliyyətlə məşğul olduqda;

İnsan alverindən zərər çəkmiş şəxs hesab olunduqda;

Cinayət təqibi orqanlarına yardım göstərdikdə;

Azərbaycan Respublikasının beynəlxalq müqavilələrində nəzərdə tutulmuş əsaslar olduqda.

Xatırladaq ki, vətəndaşlıq almaq istəyən hər kəs bütün sənədləşmə işlərini qanuni yolla və müvafiq dövlət qurumları vasitəsilə həyata keçirməlidir. Vətəndaşlığı olmayan şəxslərin Azərbaycanda qanunsuz qalması isə ciddi hüquqi nəticələrə səbəb ola bilər.

Press-fakt