ABŞ Federal Hökumətinin rəsmi jurnalı Federal Register-də ABŞ prezidenti Donald Trampın Azərbaycana aid Azadlığa Dəstək Aktının 907-ci düzəlişinin tətbiqinin dayandırılması barədə imzaladığı memorandumun mətni dərc olunub.

Press-fakt xəbər verir ki, sənəddə deyilir:

“ABŞ Konstitusiyası və qanunlarının, o cümlədən 2002-ci il Xarici əməliyyatların maliyyələşdirilməsi, ixracatın maliyyələşdirilməsi və əlaqədar proqramlar haqqında Qanunun (Qanun №107-115) II bölməsi ilə mənə verilmiş səlahiyyətlərə əsaslanaraq müəyyən edir və təsdiq edirəm ki, Azadlığa Dəstək Aktının (Qanun №102-511) 907-ci düzəlişinin Azərbaycana münasibətdə dayandırılması:

- ABŞ-ın beynəlxalq terrorizmə qarşı mübarizə səylərini dəstəkləmək üçün zəruridir;

- ABŞ Silahlı Qüvvələrinin və ya koalisiya tərəfdaşlarının beynəlxalq terrorizmə qarşı mübarizədə döyüş hazırlığını təmin etmək üçün vacibdir;

- Azərbaycanın sərhədlərinin təhlükəsizliyi baxımından əhəmiyyətlidir;

- Ermənistan və Azərbaycan arasında sülhün təmin olunması üzrə aparılan danışıqlara mane olmayacaq və Ermənistana qarşı hücum məqsədilə istifadə edilməyəcək.”

Trampın qərarına əsasən, 907-ci düzəlişin tətbiqinə qoyulan məhdudiyyətlərin qüvvədən düşməsi müddəti uzadılıb.

ABŞ dövlət katibinə bu qərarı Federal Register-də dərc etmək və izahat məktubu ilə birlikdə Konqresin müvafiq komitələrinə göndərmək tapşırılıb.

Qeyd edək ki, Donald Tramp bu sənədi 8 avqust 2025-ci ildə imzalayıb.