Xəbər verdiyimiz kimi, Gəncə şəhərində yaşıllıqların artırılması, qanunsuz müdaxilələrin və sui-istifadə hallarının qarşısının alınması məqsədilə qurumuş, qəzalı və ətraf mühitə mənfi təsir göstərən ağacların nişanlanması işləri həyata keçirilir. 

Pilot layihə

Ekologiya və Təbii Sərvətlər Nazirliyinin Dövlət Ekoloji Ekspertiza Agentliyinin İdarə Heyətinin sədri Mirsalam Qənbərovun sözlərinə görə, bioloji müxtəlifliyin dəstəklənməsi və iqlim dəyişikliyinə qarşı adaptasiya tədbirləri baxımından da bu cür planlı işlər olduqca əhəmiyyətlidir:

“Qurumuş, qəzalı, ağacların götürülmədən öncə inventarlaşdırılması, nömrələnməsi, etiketlənməsi, sayı, yerləri və onların yerinə mövsümdə əkiləcək yeni ağaclar barədə məlumatların olması, bu informasiyaların www.agac.az səhifəsinə yerləşdirilməsi həm də sui-istifadə hallarının qarşısını alacaq.


İlk dəfə Gəncədə pilot layihə olaraq belə yanaşma tətbiq olunur. İstənilən vərəndaş səhifəyə daxil olaraq, ağacın müqəddəratı ilə bağlı məlumatlana bilər. Bundan sonra o siyahıda hansısa uyğunsuzluq olarsa, aşkarlanacaq ki, ağaclar haradan və necə götürülüb”, - qurum rəsmisi bildirib.

O qeyd edib ki, görülən bu tədbirlərin ictimaiyyətə daha əlçatan olması üçün nişanlanan ağacların sayı, yerləri və onların yerinə mövsümdə əkiləcək yeni ağaclar barədə məlumatlar mütəmadi şəkildə www.agac.az səhifəsində əks olunacaq ki, bununla da ictimaiyyət bu məlumatları daha asan əldə edə biləcək.

Yeni layihənin hansı üstünlükləri var?

Gəncədə ağacların nömrələnməsi və pilot layihənin əhəmiyyəti ilə bağlı Ekologiya və Təbii Sərvətlər Nazirliyi yanında İctimai Şuranın sədri Amin Məmmədov bildirib ki, bu ümumilikdə təqdirəlayiq haldır:

“Yaşıllıqların qorunmasından daha çox onların düzgün idarə olunması kimi qiymətləndirilə bilər. Bu baxımdan Gəncə böyük şəhərdir və turizm baxımından da əhəmiyyət kəsb edir. Burada yerli və beynəlxalq layihələr həyata keçirilir. Ona görə də şəhərin həm estetik baxımdan qorunması, həm də sakinlərin yaşıllıqlardan düzgün şəkildə faydalanması məqsədilə müvafiq dövlət qurumları bu işi həyata keçirirlər.


Nazirlər Kabinetinin müvafiq qaydalarına əsasən yararsız ağaclar çıxarılır, digər ağaclara xəstəlik yaya biləcək ağacların yerləri dəyişdirilir. Bu baxımdan ağacların yenilənməsi və təbiətə göstərilən qayğı müsbət hal kimi dəyərləndirilir”, - deyə o bildirib.

Əgər bir ağac nömrələnirsə...

Mövzu ilə bağlıdanışan “Səma və Eko” İctimai Birliyinin sədri İradə Həsənova qeyd edib ki, Azərbaycanda yaşıllıqların qorunması istiqamətində genişmiqyaslı tədbirlər görülür. Onun sözlərinə görə, Gəncədə həyata keçirilən layihə də yüksək qiymətləndirilməlidir:

“Əgər bir ağac nömrələnirsə, demək ki, həmin ağac təbiətə zərər verir və ətraf mühit üçün təhlükə yaradır. Onlar məhv edilmir, əksinə, daha dekorativ, sağlam və ilhamverici ağaclarla əvəzlənir”./bizim media