Ukrayna ordusunun məlumatına görə, Rusiya avqustun 19-na keçən gecə ölkəyə qarşı indiyədək ən kütləvi hücumlarından birini həyata keçirib. Bildirilir ki, düşmən 270 pilotsuz uçuş aparatı, beş ballistik və beş qanadlı raketdən istifadə edib. Hücumlarda strateji aviasiya da iştirak edib.

Rəsmi açıqlamaya əsasən, hava hücumundan müdafiə qüvvələri əksər hədəfləri məhv edə bilsə də, 40-dan çox zərbə qeydə alınıb. Xüsusilə “X-101” tipli qanadlı raket və üç “İsgəndər-M” ballistik raketi hədəflərinə çatıb.

Məlumatlara görə, ən güclü zərbələr Poltava vilayətinə, xüsusən də Kremençuq şəhərinə endirilib.

Vilayətin hərbi administrasiyasının rəhbəri Vladimir Koqutun sözlərinə görə, hücum nəticəsində 1,5 mindən çox insan işıqsız qalıb.

Rusiyanın bu kütləvi hücumu Vaşinqtonda Ukrayna böhranı ilə bağlı danışıqlar fonunda baş verib. Avqustun 18-də ABŞ prezidenti Donald Tramp Ağ Evdə Ukrayna lideri Volodimir Zelenski və bir sıra Avropa ölkələrinin rəhbərlərini qəbul edib.

Qapalı görüşlərdən sonra Tramp bildirib ki, yaxın günlərdə Zelenski ilə Rusiya prezidenti Vladimir Putinin şəxsi görüşü keçirilə bilər. Hətta bəzi məlumatlara görə, sammitin avqust ayında baş tutması ehtimal olunur.

Press-fakt