Üzərindən bircə ay keçib. Oxucu dairəsindən, auditoriyasından, spesifikasından asılı olmayaraq o gün rəsmi və qeyri-rəsmi dövlət himayəsində olan və olmayan, özünü müstəqil adlandıran bütün xəbər agentlikləri, portallar, saytlar, bir sözlə, özünü KİV kimi görən bütün quruluşlar, hətta sosial şəbəkələr belə ölkə ictimaiyyəti arasında zəlzələ effekti yaradan bir mövzudan bəhs edirdilər. Xatırladınızmı? Yəqin ki, xatırladınız: Axı dərc olunan həmin yazılarda məzmunca eyni, formaca müxtəlif sensasion, cəmiyyətə “gəl, gəl” deyən sərlövhələr necə deyərlər, göylərdə uçuşurdu. Bəli, əminik ki, bəhs edilən yazılar unudulmasa da və... eyni mövzunu davam etdirəcəyimizdən, oxucunun təsəvvürünü yeniləmək üçün həmin yazıların məğzini bir daha göz önünə sərməyə əşhədü-ehtiyac var. Demək belə: O gün rəsmi media yazırdı:

“Maliyyə Nazirliyinin Dövlət Maliyyə Nəzarəti Xidmətinin 2025-ci il üçün təsdiq olunmuş iş planına uyğun olaraq Abşeron-Xızı Regional Təhsil İdarəsində dövlət büdcəsindən ayrılmış vəsaitlərin təyinatı üzrə xərclənməsi yoxlanılıb.

Nazirlikdə  Azərtac-a bildirilib ki, nəzarət tədbirləri idarənin tabeliyindəki 103 ümumi, 6 məktəbdənkənar və 96 məktəbəqədər təhsil müəssisəsini əhatə edib.

Aparılan yoxlamalar zamanı bəzi təhsil müəssisələrində dərnək və dərsdənkənar məşğələlərin təşkilində, dərslərin əvəzolunması ilə bağlı əməkhaqqının ödənilməsində, qruplarda komplektləşdirmənin aparılmasında, ştatların müəyyən olunmuş normalara uyğun saxlanılmasında, eləcə də qida təchizatında nöqsanlar aşkar edilib. 205 təhsil müəssisəsində son 3 il üzrə aparılmış nəzarət tədbirləri ilə aşkar olunan nöqsan və çatışmazlıqlara əsasən müəyyənləşdirilmiş 594,6 min manat vəsait cavabdeh şəxslər tərəfindən dövlət büdcəsinə bərpa edilib, inzibati xəta törətmiş 26 vəzifəli şəxs isə inzibati məsuliyyətə cəlb olunaraq cərimə olunub.

Nöqsanlara yol vermiş 134 vəzifəli şəxsə əmək qanunvericiliyinə uyğun olaraq intizam tənbehi (şiddətli töhmət, töhmət, xəbərdarlıq) verilib, 6 rəhbər şəxslə bağlanılmış əmək müqaviləsinə xitam verilməsi nəzərdə tutulur. Bununla yanaşı, Abşeron-Xızı Regional Təhsil İdarəsi üzrə aparılan nəzarət tədbirləri nəticəsində aşkar edilmiş maliyyə pozuntuları və digər nöqsanlara görə 33 təhsil müəssisəsinin rəhbəri tutduğu vəzifədən azad olunub.

Digər Regional Təhsil İdarələrində də bənzər halların araşdırılması istiqamətində tədbirlər həyata keçirilir.”

Gördüyünüz kimi, bu, dövlətin rəsmi media qurumunun dərc etdiyi yazıdır. Axı yuxarıda yazmışıq ki, dövlətin himayəsində olan qeyri-rəsmi media qurumları və hətta media holdinqləri də var. Ad sadalamağa ehtiyac duymadan qeyd edə bilərik ki, rəsmi dövlət agentliyi Azərtac-ın yazdıqları həmin media qurumlarının çoxsaylı mətbu vasitələrində olduğu kimi, yəni sözbəsöz, cümləbəcümlə dərc olunub. Yəni rəsmi yoxlamanın rəsmi nəticəsi ictimaiyyətə açıqlanır. Yəni ölkənin bir bölgəsinin 205 təhsil müəssisəsində 594,6 min manat mənimsəmə aşkar edilib(!), 33 təhsil müəssisəsi rəhbəri, yəni məktəb direktoru işdən azad olunub(!). Qeyd etdiyimiz kimi, bunlar dövlətin Maliyyə nazirliyinin rəsmi yoxlamasının rəsmi nəticəsidir ki, onu da dövlətin rəsmi media qurumları dərc edib.

İndi də keçək rəsmi olmayan və özünü müstəqil adlandıran mətbuata. Bəs rəsmi yoxlama və rəsmən aşkar edilən mənimsəmə, yəni cinayət-korrupsiya haqqında onlar nə yazıblar? Rəsmilərin tam tərsini. Əslində tam tərsi də deyil. Rəsmilərdən olduğu kimi, qeyri-rəsmi mətbuatdan da yalnızca birinin yazdığına nəzər salaq: “Hurriyyet.az” onlayn İnformasiya Agentliyinin həmin yoxlama ilə bağlı dərc etdiyi yazıya da yox, təkcə onun sərlövhəsinə baxmaq kifayətdir ki, rəsmilərin yazdıqlarında “mərhəmət hissinin” çooox qabardığını, hətta ifrat həddə olduğunu görəsən. Başlığa baxın və rəsmilərin yazdıqları ilə qeyri-rəsmilərin yazdıqları mənimsəmə fərqindən heyrətə gəlin: “Abşeron-Xızı regional Təhsil İdarəsinin müdiri İlhamə Abdullayeva 26 milyonluq yeyinti edib, niyə idarə müdiri işləyir?” Yazının içinə girib araşdırmaçı xanım jurnalistin İlhamə xanım haqqında yazdıqlarını tam oxumanızı tövsiyə etməzdim – ürpənərsiniz, səksənərsiniz.

Mənimsəmədəki (rəsmilər “mənimsəmə”, “yeyinti” əvəzinə maliyyə pozuntuları yazır) fərq (594,6 min manat hara, 26 milyon hara) nədən, hansı “razborka”lardan sonra yaranıb, korrupsiyaya qurşanın, ağlı mədəsinə işləyən təhsil buqələmunları - məllimlər (bəli, məhz məllimlər) nə əcəb cinayət edərək mənimsəyib yedikləri qusdurulduqdan sonra azadlıqda qalıblar, onların himayədarları kimdir (bu barədə qeyri-rəsmi, müstəqil mətbuatda çoxsaylı araşdırma yazıları var. İnterneti vərəqləmək kifayətdir ki, bu sistemdəki proteksiya zənciri, tükürpədən korrupsiya faktları ilə üz-üzə gələsən-müəllif) ki, belə toxunulmazlıq statusu qazanıblar? Hələlik... bütün bu sadalananlar bir başqa araşdırma yazısının mövzusu olduğundan keçək mətləbə.Yuxarıda qeyd etdik axı, bu mövzunu davam etdirəcəyimizdən bəhs etmişdik. Etdiririk.

Demək Gəncə-Daşkəsən Regional Təhsil İdarəsinin tabeliyində 240 məktəb, 125 məktəbəqədər, 10 məktəbdənkənar ümumi təhsil müəssisəsi fəaliyyət göstərir.

AzEdu.az-ın sorğusuna cavab olaraq Gəncə-Daşkəsən Regional Təhsil İdarəsindən bildirilib ki, hazırda bölgədə ümumilikdə 124 məktəbəqədər təhsil müəssisəsi fəaliyyət göstərir: “Belə ki, Gəncə rayonu üzrə 42, Goranboyda 33, Samuxda 19,

Göygöldə 18, Daşkəsəndə 11, Naftalanda isə 1 bağça fəaliyyət göstərir deyə”,- qeyd olunub.

Bəri başdan qeyd edək ki, Maliyyə Nazirliyinin Dövlət Maliyyə Nəzarəti Xidməti hələ ki, Gəncə-Daşkəsən Regional Təhsil İdarəsinin tabeliyindəki müəssisələrdə “Abşeron-Xızı”-dakı kimi kompleks yoxlamalar aparmayıb.

Amma... Press-fakt olaraq hadisələri bir balaca qabaqlamaq istərdik. Nədəni bu ki, Gəncə-Daşkəsən Regional Təhsil İdarəsində baş verən qanunsuzluqlar barədə bizə edilən şikayətlər (təbii ki, biz də həmin şikayətləri prokurorluğa yönləndirmişik), yerlərdən verilən siqnallar əsasında prokurorluğun müraciətinə rəğmən Dövlət Maliyyə Nəzarəti Xidməti sözügedən müəssisələrdə yoxlamalara başlayıb və bu yoxlamalar bu gün də davam etdirilir. Artıq 1, 5, 8, 9, 11, 14, 39, 44 saylı məktəblərdə yoxlamalar demək olar ki, tamamlanıb. Güman ki, yaxın günlərdə bir neçəsi də tamamlanar. Adıgedən məktəblərdə aparılan yoxlamaların nəticələri barədə rəsmi məlumatlar açıqlanmasa da, səhih mənbələrdən aldığımız bilgiyə görə yoxlanılan hər bir subyektdə ciddi nöqsanlar aşkarlanıb. Sözümüzə söykək üçün isə tək bir məktəbdə aparılan yoxlamanın nəticəsi kimi sorğumuza rəğmən Baş prokurorluqdan bizə göndərilən məktubu fotofakt kimi təqdim edirik:

(Yeri gəlmişkən 39 nömrəli məktəbdə 2024-cü ilin fevral-may aylarında təkrar maliyyə pozuntuları ilə bağlı məlumatları Gəncə Şəhər prokurorluğuna ünvanlamışıq. İndiyədək hələ ki, heç bir cavab yoxdur.)

Amma nə sirdisə, adına rəsmilər kimi nöqsan dediyimiz, xalq dilində yeyinti, ciddi maliyyə pozuntusu, bir az da öz adı ilə desək, nə qədər mənimsəmə olsa da, hələ ki heç kimə “gözün üstə qaşın var” deyən olmayıb. Hələ bunlar nədir ki... Məktəbəqədər müəssisələrdə vəziyyət daha acınacaqlıdır. Belə ki, maliyyə və mənimsəməsi bir yana, bu müəssisələrdə sırf pedaqoji profilli, yəni pedaqoji fakultəni bitirənlər işləməli olsa da, səd heyf, yad ixtisaslı adamlar hətta müdir vəzifəsinə təyin olunub. Bunlardan biri isə... 13 saylı körpələr evi-uşaq bağçasıdır. Ki, bu haqda zamanında biz də yazmışdıq... Amma...

Son olaraq... ümid edək ki, Azərtac və digər rəsmi və qeyri-rəsmi dövlət nəzarətində olan KİV şəbəkəsi yaxın zamanda Abşeron-Xızı Regional Təhsil İdarəsində aparılan yoxlamadan sonra yazdığı kimi yazacaq. Yəni  “digər Regional Təhsil İdarələrində də bənzər halların araşdırılması istiqamətində tədbirlər həyata keçiriləcək.” Əlavə edək ki, sözügedən regionlar arasında yoxlanmalı olan subyektlərin sayı da çox fərqlidir. Təsəvvür edin ki, tək Gəncə təhsil idarəsinin tabeliyində olan məktəblərin sayı  45-dir. Yəni demək istəyirik ki, subyekt sayına görə “Abşeron-Xızı” hara, “Gəncə-Daşkəsən” hara... Hətta bu "hara"nı maliyyə pozuntusuna da şamil etmək olar.

Gözləyək, görək Maliyyə Nazirliyinin Dövlət Maliyyə Nəzarəti Xidmətinin əməkdaşları, el dilində desək, “qara maskalıları” Gəncə-Daşkəsən Regional Təhsil İdarəsinə nə vaxt təşrif buyuracaqlar...

Mehriban Əzizqızı,

Press-fakt

Qeyd: Zamanında 13 saylı körpələr evi-uşaq bağçasından bəhs etdiyimiz yazının linki. 

https://Globall.az/index.php?newsid=17546