Tezliklə Putin-Zelenski görüşünün olacağı barədə gözləntilər getdikcə mənasını itirir. Rusiya tərəfinin açıqlamaları onu deməyə əsas verir ki, nəinki yaxın günlərdə, yaxın perspektivdə belə təkbətək görüş və sülh razılığı olmayacaq.

“İnterfaks” agentliyi xəbər verir ki, Moskvada keçirdiyi mətbuat konfransında bu barədə danışan Rusiya xarici işlər naziri Sergey Lavrov ABŞ prezidenti Donald Trampın təşəbbüsü ilə gündəmə gətirilən Putin–Zelenski görüşünün tezliklə keçirilməsi mümkünsüz olduğunu bildirib.

Lavrov bildirib ki, avqustun sonunadək belə bir sammitin keçirilməsi ehtimalı sıfırdır, gələcəkdə də şanslar ya çox azdır, ya da ümumiyyətlə yoxdur. 

"Moskva Ukrayna ilə istənilən formatda danışıqları davam etdirməyə hazırdır, lakin liderlər arasında görüş yalnız ciddi hazırlıqdan sonra keçirilməlidir və danışıqlar prosesinə yekun vurmalıdır” - deyə, Lavrov bildirib.

Lavrov iddia edib ki, Tramp  Putinin mövqeyini səhv anlayıb: “Bu sammit Trampın fantaziyasından başqa bir şey deyil. O, ya Putinin mövqeyini səhv anlayıb, ya da aldadılıb”. 

Rusiya XİN rəhbəri onu da qeyd edib ki, Putinlə Zelenskinin görüşü yalnız danışıqların yekun mərhələsində, bütün əsas məsələlər razılaşdırıldıqdan sonra mümkün ola bilər. Əks halda bu cür sammit təşkil etmək məntiqsizdir.

Nazirin sözlərinə görə, Rusiya Prezidenti Vladimir Putin ABŞ Prezidenti Donald Trampla telefon danışığında Ukrayna ilə danışıqların davam etdirilməsi və nümayəndə heyətlərinin rəhbərlərinin səviyyəsinin artırılması təklifini irəli sürüb.

“Tramp bu ideyanı müsbət qarşıladı. Biz gözləyirik ki, o, bunu Kiyev nümayəndələrinə də çatdıracaq və onların reaksiyasını alacağıq”, – deyə Lavrov əlavə edib.

Lavrov Zelenskinin Putinlə görüş barədə açıqlamalarını da tənqid edib.

O bildirib ki, Zelenski uzun müddət Putininlə danışıqlar aparmayacağını bəyan edib: “Hətta təxminən üç il əvvəl imzaladığı fərmanı ləğv etməyib, bu fərmanda Putinlə danışıqlar aparmaq qəti qadağan olunub. Onun Rusiya Prezidenti ilə sammit təşkil etmək cəhdi guya sülh prosesinə konstruktiv yanaşdığını göstərmək üçündür. Əslində isə bu, davamlı böhranın həlli prinsiplərini razılaşdırmaq üçün ağır, ciddi işi “KVN”, “Kvartal 95” ilə əvəz etməkdir. Hazırkı Ukrayna rəhbəri bu cür hiylələrdən çox fəal istifadə edir.”

Lavrov Ukrayna Prezidenti Volodimir Zelenskinin legitimliyini də növbəti dəfə şübhə altına alıb. O, Kremlin köhnə və heç bir qanuni əsasları olmayan bəhanəsini təkrarlayıb.

Məlum olduğu kimi, Moskva artıq xeyli müddətdir ki, Zelenskinin prezidentlik müddətinin başa çatdığını iddia edir. Lakin Ukrayna qanunları müharibə zamanı seçkilərin keçirilməsini açıq şəkildə qadağan edir. Həmçinin, digər dünya dövlətləri və beynəlxalq təşkilatlar Zelenskinin legitimliyinə şübhə etmirlər.

Lakin Lavrov köhnə nağılları təkrarlayaraq deyib ki, Volodimir Zelenski ilə Vladimir Putin arasında görüş o zaman baş tuta bilər ki, “iş gələcək sazişlərin imzalanmasına gedib çatarsa, Ukrayna tərəfindən bu müqavilələri imzalayan şəxsin legitimliyi məsələsi həll olunacaq”.

Bu o deməkdir ki, Rusiya yenə də Zelenskinin legitimliyini tanımır və onunla hər hansı bir görüş keçirmək, həmçinin sənəd imzalamaq fikrində deyil.

Maraqlıdır ki, Tramp və ətrafı dəfələrlə yaxın günlərdə Putin və Zelenskinin görüşünün keçirilə biləcəyini bəyan edib. Bir çox Avropa liderləri də bu görüş haqda danışıb. Hətta İsveçrə və Macarıstan ev sahibi ölkə kimi çıxış etməyə hazır olduqlarını bildiriblər. Onlar bu barədə Trampın Alyaskada Putinlə görüşündən, eləcə də Zelenski və Avropa liderləri ilə sammitindən sonra danışmağa başlayıblar.

Lavrovun açıqlaması isə tezliklə belə bir görüşün olmayacağını göstərir.  Rusiya rəsmiləri deyirlər ki, Kreml rəhbəri Zelenski ilə yalnız müharibənin dayandırılması ilə bağlı ilkin razılaşmalar əldə edildikdən sonra görüşə bilər. Üstəlik, yalnız Zelenskinin legitimliyi məsələsinin həll olunması şərti ilə. Bütün bunlar bir daha Rusiyanın vaxt uzatmaq, buna paralael olaraq isə Ukraynanı məhv etmək planlarından əl çəkmədiyinin növbəti göstəricisidir. 

Tramp isə bu planda özünün alət kimi istifadə olunmasına imkan verməkdədir…

C.Məmmədli