Xəbər verdiyimiz kimi, son günlər bəzi azərbaycanlı müğənnilərin Rusiyaya buraxılmadıqları barədə informasiyalar ictimailəşdirilir. Məsələn, meyxanaçı Namiq Qaraçuxurlu, müğənni Şəbnəm Tovuzlu sosial şəbəkələrdə belə xəbərlər yayıblar.

Onlar iddia edirlər ki, Rusiyaya girişlərinə qadağa qoyulub.

Ancaq hüquqşünas Əkrəm Həsənov bunun yalan olduğunu ifşa edib.

Əkrəm Həsənov həmin şəxslərin bu cür informasiyaları bilərəkdən ictimailəşdirdiklərini bildirib: “Yeni dəb düşüb: müğənnilərimizin Rusiya hava limanlarında saxlanılmaları haqda xəbərlər yayılır. Əslində, bu, saxlanma deyil. Sadəcə, Rusiya ərazisinə buraxılmadan öncə əlavə yoxlamadır. Sırf Azərbaycanla da bağlı deyil. Ümumən Rusiyadakı faktiki hərbi vəziyyətlə bağlıdır. Mən Moskvaya iyulun 1-də, yəni bu həngamənin lap başlanğıcında getmişdim və məni də bir neçə saat buraxmadılar. Digər azərbaycanlılar kimi. Amma yalnız bizə aid deyildi. Məsələn, tacikləri də gözlətdirirdilər. Odur ki, bizim müğənnilərimiz heç bir dövləti maraq kəsb etmir ki, onları orada kimsə saxlasın. Onlar bizim əksəriyyəti bisavad və get-gedə zövqü korlanan kütlədən başqa heç kimə lazım deyillər…”.

Press-fakt