ABŞ Apellyasiya Məhkəməsi Trampın tarif siyasətinin əksəriyyətini qeyri-qanuni saydı.

Bu barədə “Reuters” məlumat yayıb.

ABŞ-ın apellyasiya məhkəməsi prezident Donald Trampın administrasiyası tərəfindən tətbiq edilən tariflərin böyük əksəriyyətinin qanunsuz olduğuna qərar verib. Qərar 7 əleyhinə 4 səs nisbəti ilə qəbul olunub.

Məhkəmə Trampın aprel ayında ticarət müharibəsi çərçivəsində tətbiq etdiyi “qarşılıqlı” tariflərin, eləcə də fevral ayında Çin, Kanada və Meksikaya qarşı yönəlmiş xüsusi tariflərin qanuniliyini araşdırıb.

Hakimlər qərarda qeyd ediblər ki, Trampın istinad etdiyi Beynəlxalq Fövqəladə İqtisadi Səlahiyyətlər Aktı (IEEPA) prezidentə tariflər tətbiq etmək üçün birbaşa səlahiyyət vermir:

“Çətin ki, Konqres IEEPA-nı qüvvəyə mindirməklə prezidentə məhdudiyyətsiz tarif səlahiyyəti vermək niyyətində olub”, – deyə məhkəmə bəyan edib.

Buna baxmayaraq, apellyasiya məhkəməsi Tramp administrasiyasına ABŞ Ali Məhkəməsinə müraciət etmək imkanı yaratmaq üçün tariflərin oktyabrın 14-dək qüvvədə qalmasına icazə verib.

Bu qərar Federal Ehtiyat Sisteminin müstəqilliyi ilə bağlı davam edən məhkəmə çəkişməsi fonunda verilib və Ali Məhkəməyə qədər gedə biləcək yeni bir hüquqi qarşıdurmaya səbəb ola bilər. Bu, Trampın iqtisadi siyasəti ilə bağlı ciddi presedent yarada bilər.

Tramp dövründə tətbiq edilən bu tariflər ABŞ-a ticarət tərəfdaşları ilə danışıqlarda iqtisadi təzyiq vasitəsi qazandırsa da, maliyyə bazarlarında qeyri-sabitliyə səbəb olmuşdu.

Press-fakt