Ukraynanın Lvov şəhərində Ukrayna Ali Radasının keçmiş sədri Andrey Parubiy qətlə yetirilib. İlkin məlumatlara görə, Parubiyə bir neçə güllə vurulub.

Hüquq-mühafizə orqanları atəş açan şəxsin şəxsiyyətini və onun harada olduğunu müəyyən etmək üçün tədbirlər görür.

Lvov polis idarəsinin yaydığı məlumatda deyilir: "Bu gün günorta saatlarında 102-ci xəttə Lvovun Sıxov rayonu ərazisində atışma olması barədə məlumat daxil olub. Aldığı xəsarətlər nəticəsində zərərçəkən yerindəcə dünyasını dəyişib. Ölən şəxsin 1971-ci il təvəllüdlü tanınmış ictimai-siyasi xadim olduğu müəyyən edilib. Hüquq-mühafizə orqanlarının əməkdaşları qatilin harada və nə yerdə olduğunu müəyyən etmək üçün bütün tədbirləri görürlər".

Ukrayna mediasının məlumatına görə, Parubiyin qatili “Qlovo” xidmətinin kuryeri olub.

Ukraynanın Daxili İşlər naziri İqor Klimenko və baş prokuror Ruslan Kravçenko istintaqın gedişin barədə məlumatlandırılıb. Ukrayna Prezidenti Volodimir Zelenski Radanın keçmiş sədrinin yaxınlarına başsağlığı verib.

Parubiy qətlə yetirildiyi günə qədər parlamentin deputatı olub. O, sabiq prezident Pyotr Poroşenkonun partiyasını təmsil edib və son seçkilərdə partiya siyahısında ikinci şəxs olub. 14 aprel 2016-cı il tarixindən 29 avqust 2019-cu il tarixədək Ali Radanın sədri olan Parubiy, eyni zamanda Ukrayna Milli Təhlükəsizlik və Müdafiə Şurasının katibi vəzifələrində çalışıb. Maydan hərəkatının ən aktiv rəhbərlərindən olan və millətçi baxışları ilə tanınan Porubiy Maydan Özünümüdafiə Təşkilatının da başçısı olub.

Buna qədər də Parubiyə qarşı sui-qəsdlər edilib və bu cinayətlərin Rusiya xüsusi xidmət orqanları tərəfindən sifariş edildiyi məlum olub.

Press-fakt