"Biz NATO üçün düşmənik. Bu, NATO sənədlərində yazılıb. Təhlükəsizliyimizi təmin etmək üçün lazım olan hər şeyi edəcəyik". 

Bunu Vladimir Putinin mətbuat katibi Dmitri Peskov deyib. O, Ukraynada, Rusiya sərhədləri yaxınlığında xarici kontingentin olmasının Moskva üçün “təhlükəli” olduğunu bildirib.

Peskov jurnalistlərə açıqlamasında deyib: “Biz bunu bizim üçün təhlükə kimi qiymətləndiririk - beynəlxalq qüvvələrin və ya hansısa xarici qüvvələrin, NATO qüvvələrinin sərhədlərimizə yaxın Ukrayna torpaqlarında olmasını”.

Peskov əlavə edib ki, Avropa təmsilçiləri Ukraynanın ərazisinə Avropa qoşunlarını yerləşdirməklə onun təhlükəsizliyinin təmin olunmasından danışırlar: "Siz bir ölkənin təhlükəsizliyini digər ölkənin təhlükəsizliyini pozmaqla təmin edə bilməzsiniz. Bu, Ukrayna münaqişəsinin həllinə yaxınlaşmağa kömək etməyəcək. Xarici, xüsusilə də Avropa və Amerika hərbi kontingentləri Ukraynanın təhlükəsizliyini təmin edə bilərmi? Qətiyyən yox, edə bilməzlər. Bu, Ukraynanın təhlükəsizliyinə Rusiya üçün uyğun təminat ola bilməz".

Kremlin mətbuat katibinin sözlərinə görə, NATO-nun Rusiya ilə sərhədlərə yaxınlaşması Ukraynadakı müharibənin “əsas səbəblərindən” biri olub.

Peskov həmçinin bildirib ki, təkcə Ukraynaya deyil, həm də Rusiyaya təhlükəsizlik zəmanəti verilməlidir.

Göründüyü kimi, Kreml yenə əvvəlki narrativlərindən və bəhanələrindən əl çəkmir. Qarşısında qətiyyətsiz, riyakar, qorxaq Qərb liderlərini gördükcə də bu cür davam edəcək.

Xatırladaq ki, Ukraynaya təhlükəsizlik təminatları çərçivəsində xarici hərbi kontingentin yerləşdirilməsi variantı bir gün əvvəl baş tutan “İstəklilər koalisiyası”nın iclasında müzakirə olunub. Danışıqlardan sonra Fransa Prezidenti Emmanuel Makron 26 ölkənin missiyada iştirak etməyə hazır olduğunu bildirib. Burada söhbət yalnız atəşkəs əldə olunandan sonra Ukraynada "yerdə, dənizdə və havada olmaq"dan və ya Ukrayna ordusuna dəstək verməkdən gedir. 

Lakin daha sonra Aİ-nin üç ölkəsi - İtaliya, Polşa və Rumıniya öz qoşunlarını Ukraynaya göndərməkdən imtina etdilər. Onlar Ukraynaya “başqa yardım göstərməyə” hazır olduqlarını bildirdilər. Ancaq həmin “başqa yardımlar” artıq dörd ilə yaxındır ki, Ukarynaya göstərilsə də, işğalı və Ukraynadakı qırğınları dayandırmağa yetmir…

C.Məmmədli