Putin Moldovada çevrilişə hazırlaşır - O, axtarışda olan oliqarx İlan Şorla görüşüb
Rusiya prezidenti Vladimir Putinlə Moldovada korrupsiya və seçki pozuntularına görə beynəlxalq axtarışda olan oliqarx İlan Şorun görüşü böyük rezonans doğurub.
Görüş Vladivostokda keçirilən Şərq İqtisadi Forumu çərçivəsində baş tutub.
Rusiya mediasının məlumatına görə, Putin “A7” fintex-şirkəti və “Promsviazbank”ın iştirakı ilə yaradılan Beynəlxalq Maliyyə Hesablaşmaları Mərkəzinin açılışında iştirak edib. Tədbirdə “A7”nin rəhbəri kimi İlan Şor və PSB sədri Pyer Fradkov da çıxış ediblər.
Fradkov mərkəzin Qərb sanksiyalarına cavab olduğunu, transsərhəd ödənişlərin milli texnologiyalar əsasında aparılacağını deyib. Şor isə 10 ay ərzində sistem üzərindən 7 trilyondan çox rubl dövr etdiyini, gündəlik 1500-dən artıq əməliyyat həyata keçirildiyini bildirib. Onun sözlərinə görə, 2025-ci ildə Rusiya büdcəsinə bu mexanizmlə 20 milyard rubldan çox vergi daxil olacaq.
Moldovada isə seçkiqabağı gərginlik artır. 28 sentyabrda keçiriləcək parlament seçkilərində Şor Partiyası ilə bağlı “Pobeda” bloku iştirakdan məhrum edilib. Ədliyyə Nazirliyi həmin blokdakı partiyaların - “Dirçəliş”, “Şans”, “Alternativ və Xilas”, həmçinin “Pobeda”nın ləğv edildiyini elan edib. Bununla belə, tərəfdarlar yeni “Patriotlar Bloku” adı altında seçkilərə qatılmaq niyyətindədirlər.
Şor Vladivostokda çıxışında əsas məqsədlərinin prezident Maya Sandunun hakimiyyətdən uzaqlaşdırılması olduğunu bildirib. O, Moldovanın gələcəyini yalnız Rusiya ilə müttəfiqlikdə gördüyünü vurğulayıb.
Moldova parlamentinin sədri İqor Qrosu görüşü Kremlin birbaşa müdaxiləsi adlandırıb:
“Şor faktiki olaraq Putinə hesabat verir. O, seçicilərin rüşvətlə ələ alınması, zorakılığın maliyyələşdirilməsi və korrupsiya şəbəkələrinin qurulması ilə məşğuldur. İndi Putinin bütün namizədləri Şor üçün işləyəcək,” – deyə Qrosu bəyan edib.
Rumıniya prezidenti Nikuşor Dan isə xəbərdarlıq edərək bildirib ki, əgər Moldovada Rusiyameyilli qüvvələr hakimiyyətə gələrsə, ölkə Gürcüstanın taleyini yaşayacaq. Onun sözlərinə görə, bu halda Pridnestrovyedə əlavə Rusiya qoşunlarının yerləşdirilməsi və həm Moldovanın, həm də Ukraynanın Avropa yolunun bloklanması qaçılmaz olacaq./modern.az