Siyasi təhlilçi, ABŞ-də yaşayan azərbaycanlı ekspert, Xəzər Universitetinin professoru Ramiz Yunus dünyada gedən geosiyasi prosesləri şərh edərək bildirib ki, Qərbdə uzun illər dominant mövqedə olmuş sol-liberal ideologiyanın çökməsi qlobal miqyasda dərin böhranı üzə çıxarıb.

Onun sözlərinə görə, BMT başda olmaqla beynəlxalq institutların səmərəsizliyi açıq görünür və Rusiyanın Ukraynaya qarşı başladığı genişmiqyaslı müharibə bu böhranın kulminasiya nöqtəsinə çevrilib.

“Çin ABŞ və Qərbə mesaj göndərdi”

Ramiz Yunus qeyd edib ki, Şanxay Əməkdaşlıq Təşkilatının sammiti və Pekində keçirilən hərbi parad Çin rəhbərliyi tərəfindən ABŞ və onun Avropa İttifaqı və NATO-dakı müttəfiqlərinə verilən açıq mesaj idi.

Ekspertin sözlərinə görə, bu nümayiş göstərdi ki, 1991-ci ildə SSRİ dağıldıqdan sonra formalaşmış “vahidqütblü dünya” artıq başa çatıb.

“Dünya yeni mərhələyə qədəm qoyur”

Yunus vurğulayıb ki, hazırda dünya I və II Dünya müharibələrindən sonrakı mərhələlərlə müqayisə edilə biləcək tarixi dəyişikliklərin astanasındadır.

“Əgər o dövrlərdə kimlərin qalib, kimlərin məğlub olduğu aydın idisə, bu gün geosiyasi xaos şəraitində ‘günahkarı’ tapmaq uğrunda mübarizə gedir. Bu isə gələcəkdə həmin dövlətlər və onların müttəfiqləri üçün ciddi nəticələr doğura bilər. Birinci Dünya müharibəsində Almaniyanın başçılıq etdiyi Üçlər İttifaqı və ya İkinci Dünya müharibəsində nasist Almaniyası və onun müttəfiqləri kimi”, – deyə R. Yunus bildirib.

Onun sözlərinə görə, məhz buna görə də Pekindəki parada çoxsaylı qonaqlar qatıldı – Hindistan, qlobal Cənubun əsas liderləri, postsovet məkanının demək olar ki, bütün dövlət başçıları, həmçinin Cənubi Koreya və Tayvandan nümayəndələr iştirak etdilər.

“ABŞ və Qərb 3,5 ildir böhran içindədir”

Professor deyib ki, Çin rəhbəri Si Cinpin uzun illərdir bu güc nümayişinə hazırlaşırdı və təsadüfi deyil ki, bunu məhz indi nümayiş etdirdi: “Artıq 3,5 ildir ABŞ, Avropa İttifaqı və NATO dərin böhran içindədir. Onlar Kremlin imperiya iddialarının qarşısını almaqda acizliklərini və hazırlıqsız olduqlarını göstərirlər”.

“Azərbaycan öz gücünü nümayiş etdirdi”

Ramiz Yunus vurğulayıb ki, bu geosiyasi xaos hələ uzun müddət davam edəcək. Belə şəraitdə düzgün mövqe seçmək, balanslı siyasət yürütmək və coğrafi üstünlüklərdən səmərəli istifadə etmək son dərəcə vacibdir.

“Məhz bunu mənim doğma Azərbaycanım uğurla nümayiş etdirir. Son illərdə ölkəmiz təkcə suverenliyini və ərazi bütövlüyünü tam bərpa etmədi, həm də Cənubi Qafqazda lider və lokomotiv dövlətə çevrildi”, – deyə professor bildirib.

“Nəhənglərin savaşı indi başlayır”

Ekspertin fikrincə, ABŞ və Çin arasında Avrasiya uğrunda başlayan “nəhənglərin savaşı” indi yeni mərhələyə qədəm qoyur və nəticələri bütün bəşəriyyətin gələcəyini müəyyən edəcək.

“Amerikalı strateq Zbiqnev Bjezinskinin məşhur “Böyük şahmat taxtası” kitabında dediyi kimi, ‘Avrasiyaya nəzarət – dünyaya nəzarət deməkdir’”, – deyə Ramiz Yunus xatırladıb.

Press-fakt