Tailandda keçirilən 2025-ci il Voleybol üzrə Dünya Çempionatında (FIVB 2025) “Filenin Sultanları” adlandırılan Türkiyənin A Milli Qadın Voleybol Komandası  tarix yazdı.

Dünya Çempionatının yarımfinal mərhələsində Türkiyənin A Milli Qadın Voleybol Komandası Yaponiyaya qarşı meydana çıxdı. Böyük gərginlik və mübarizə şəraitində keçən qarşılaşmada “Filenin Sultanları” rəqibini 3-1 hesabı ilə məğlub edərək tarixdə ilk dəfə finala yüksəldi.

Final görüşündə Türkiyənin rəqibi Braziliya – İtaliya matçının qalibi olacaq.

Tarixi oyun sabah keçiriləcək. Final qarşılaşması Bakı vaxtı ilə 15:30-da start götürəcək.

Bugünkü oyunla bağlı qeyd edək ki, oyunun ilk dəqiqələrində tərəflər bərabər mübarizə aparsa da (6-6), Yaponiya ardıcıl xallarla üstünlüyü ələ keçirərək (15-11) fərqi artırdı və ilk seti 25-16 hesabı ilə qazandı.

İkinci setdə toparlanan ay-ulduzlular Melissa Vargas və Eda Erdem Dündarın önəmli xalları ilə üstünlüyü ələ alaraq fərqi açdılar. Millilər bu seti 25-17 hesabı ilə qazanaraq ümumi hesabı 1-1-ə gətirdi.

Üçüncü setdə də ritmini qoruyan Türkiyə yığması müdafiədə və hücumda inamlı çıxışı ilə rəqibinə şans vermədi – 25-18. Beləliklə, millilər ümumi hesabda 2-1 önə keçdi.

Sonuncu – dördüncü set isə gərgin mübarizə şəraitində keçdi. Uzun müddət bərabərlik davam etdi (6-6, 14-14). Sonlara yaxın Yaponiya fərqi açdı- 24-21 önə keçdi. 

Ancaq Türk xarakteri öz sözünü dedi. Türkiyə komandası son anlarda təsirli servislərlə bərabərliyi (24-24) təmin etdi. Çox çətin keçən seti 27-25 hesabı ilə qazanan millilər, ümumilikdə 3-1 hesabı ilə böyük qələbəyə imza atdı.

Beləliklə, Türkiyənin A Milli Qadın Voleybol Komandası təşkilat tarixində ilk dəfə dünya çempionatının finalına adladı. Ay-ulduzlular həlledici görüşdə İtaliya – Braziliya qarşılaşmasının qalibi ilə üz-üzə gələcək.

Tarix yazan Türkiyənin heyəti belədir: Ebrar Karakurt, Zehra Güneş, Melissa Vargas, İlkin Aydın, Eda Erdem Dündar, Cansu Özbay, Gizem Örge, Elif Şahin, Yaprak Erkek, Hande Baladın.

Press-fakt