Müstəqil Azərbaycan dövlətinin qanunverici orqanı olan Milli Məclisə ilk dəfə 1995-ci ildə seçkilər keçirilib. Həmin vaxtdan indiyədək yüzlərlə fərqli şəxs deputat mandatı qazanaraq parlamentdə təmsil olunub. Lakin onlardan heç də hamısı mandatlıq müddətini sona çatdıra bilməyib. Bəzi millət vəkilləri vəzifəyə təyin olunduğu, bəziləri isə cinayət əməlləri törətdiklərinə görə mandatlarından məhrum ediliblər.

Press-fakt mandatından məhrum edilən deputatların siyahısını təqdim edir:

İqbal Ağazadə

15-16 oktyabr 2003-cü ildə baş verən iğtişaşlarla bağlı İqbal Ağazadə cinayət məsuliyyətinə cəlb olunub. O, məhkəmənin müvafiq qərarı ilə həbs olunub və deputat mandatını itirib. 2005-ci ilə qədər həbsdə qalan eks-deputat həmin il əfv fərmanı ilə azadlığa çıxıb.

Fikrət Sadıqov

2005-ci ilin oktyabrında Azərbaycanda dövlət çevrilişinə cəhd ittihamı ilə bir sıra yüksək rütbəli məmurlar həbs edilib. İqtisadi inkişaf naziri Fərhad Əliyev, səhiyyə naziri Əli İnsanov, Prezident Administrasiyasının işlər müdiri Akif Muradverdiyevlə yanaşı, Milli Məclisin deputatı Fikrət Sadıqov da onların arasında idi. Sumqayıtdan deputat seçilmiş F.Sadıqov mandatından məhrum edildikdən sonra bir müddət ev dustaqlığına məhkum edilib. O, hazırda Azərbaycan Milli Elmlər Akademiyasının institutunda çalışır.

Hüseyn Abdullayev

2007-ci ilin martında Milli Məclisin iclaslarından birində, hökumətin illik hesabatının müzakirəsi zamanı Hüseyn Abdullayevlə digər deputat, Ana Vətən Partiyasının sədri Fəzail Ağamalı arasında əlbəyaxa dava olub. Həmin hadisədən sonra H.Abdullayevə qarşı cinayət işi açılıb və o, məhkəmənin qərarı ilə həbs olunub. Bu səbəbdən Hüseyn Abdullayevin deputat mandatına xitam verilib.

Gülər Əhmədova

2012-ci ilin sentyabrın 25-də Azərbaycan Beynəlxalq Universitetinin sabiq rektoru Elşad Abdullayev tərəfindən Milli Məclisin sabiq deputatı Gülər Əhmədova ilə bağlı kütləvi informasiya vasitələrində yayımlanmış videoçəkilişlərdə əks olunan məlumatlar Bakı şəhər prokurorluğunda araşdırılıb.

Qeyd edilən audio və videoyazılarda dələduzluğun, yəni etibardan sui-istifadə etmə yolu ilə özgə əmlakını ələ keçirmənin əlamətləri olduğundan həmin məlumatların hərtərəfli, tam və obyektiv araşdırılmasını təmin etmək məqsədilə çoxsaylı təxirəsalınmaz istintaq və istintaq-əməliyyat tədbirlərinin keçirilməsinin zəruriliyini nəzərə alaraq toplanmış material üzrə Cinayət Məcəlləsinin 178.3.2-ci (etibardan sui-istifadə etməklə özgənin külli miqdarda əmlakını ələ keçirmə) maddəsi ilə cinayət işi başlanılıb. Nəticədə cinayət məsuliyyətinə cəlb olunan Gülər Əhmədova deputat mandatı ilə vidalaşmalı olub.

Əli Əhmədov

19 saylı Nərimanov birinci seçki dairəsindən deputat seçilmiş Əli Əhmədov Prezident İlham Əliyevin Sərəncamı ilə 2013-cü il oktyabrın 22-də baş nazirin müavini təyin edilib. Bu səbəbdən, Konstitusiyanın 85-ci maddəsinə əsasən onun deputat mandatına xitam verilib.

Mübariz Qurbanlı

IV çağırış Milli Məclisin üzvü olmuş Mübariz Qurbanlı 21 iyul 2014-cü ildə prezident İlham Əliyevin sərəncamı ilə Dini Qurumlarla İşlər üzrə Dövlət Komitəsinə sədr təyin edilib. Həmin təyinatdan sonra Mərkəzi Seçki Komissiyası tərəfindən Mübariz Qurbanlının deputat səlahiyyətlərinə xitam verilib.

Asəf Hacıyev

8 saylı Nizami ikinci seçki dairəsindən seçilən deputat Asəf Hacıyevin deputatlıq fəaliyyətinə 2015-ci ildə xitam verilib. Buna səbəb onun 9 dekabr 2014-cü ildə Qara Dəniz İqtisadi Əməkdaşlıq Təşkilatı (QDİƏT) Parlament Assambleyasının baş katibi seçilməsi olub.

Muxtar Babayev

43 saylı Sumqayıt ikinci seçki dairəsinin deputatı M.Babayev 2018-ci ildə Ekologiya və Təbii Sərvətlər naziri təyin olunub. Bununla əlaqədar Muxtar Babayevin deputat mandatına xitam verilib.

Vüsal Hüseynov

91 saylı Ucar seçki dairəsinin deputatı V.Hüseynov da vaxtından əvvəl deputatlıq mandatını itirən millət vəkillərindəndir. O, 2018-ci ildə Dövlət Miqrasiya Xidmətinin rəisi təyin olunması əlaqədar parlamentdəki fəaliyyətini vaxtından əvvəl dayandırıb.

Fuad Muradov

34 saylı Xətai ikinci seçki dairəsindən deputat seçilən Fuad Muradov 2018-ci ildə Diasporla İş üzrə Dövlət Komitəsinin sədri təyin olunduqdan sonra onun da deputat mandatına xitam verilib.

Rövşən Rzayev

101 saylı Göygöl-Daşkəsən seçki dairəsindən Milli Məclisin deputatı seçilən Rövşən Rzayev 2018-ci ilin 21 aprel tarixində Azərbaycan Prezidenti İlham Əliyevin sərəncamı ilə Qaçqınların və Məcburi Köçkünlərin İşləri üzrə Dövlət Komitəsinin sədri təyin olunub. Qanuna müvafiq olaraq Rövşən Rzayev deputat mandatını vaxtından əvvəl təhvil verib.

Elşad Həsənov

V (2015-2019-cu illər) çağırış Milli Məclisin deputatı Elşad Həsənov 12 noyabr 2019-cu ildə Bakı şəhəri Yasamal Rayon İcra Hakimiyyətinin başçısı təyin edilib və qanunverici orqanda fəaliyyətini dayandırıb.

Rüstəm Xəlilov

Milli Məclisin V çağırış deputatı R.Xəlilov 4 dekabr 2019-cu il tarixli sərəncamla Hacıqabul rayonuna icra başçısı təyin olunduğu üçün deputat mandatını itirib.

Şahin Seyidzadə

Milli Məclisinin VI (2020-2025) çağırış deputatı Ş. Seyidzadə 3 mart 2022-ci il tarixində Prezident İlham Əliyevin sərəncamı ilə İçərişəhər Dövlət Tarix-Memarlıq Qoruğu İdarəsinin İdarə Heyətinin sədri təyin olunduğuna görə, deputat mandatına vaxtından əvvəl xitam verilib. Lakin Şahin Seyidzadə VII çağırış Milli Məclisə seçkilərdə yenidən namizəd olaraq, deputat seçilib. O, 23 sentyabr 2024-cü ildə "İçərişəhər" Dövlət Tarix-Memarlıq Qoruğu İdarəsinin İdarə Heyətinin sədri vəzifəsindən azad olunub.

Valeh Ələsgərov

Prezident İlham Əliyevin 25 noyabr 2019-cu il tarixli sərəncamı ilə Valeh Ələsgərov Ələt azad iqtisadi zonasının səlahiyyətli qurumu və onun İdarə Heyəti formalaşana qədər Ələt azad iqtisadi zonasının müvəqqəti idarəetmə qurumunun sədri təyin olunub. Həmin vaxt V.Ələsgərov V (2015-2019-ci illər) çağırış Milli Məclisin üzvü idi. Qanunvericiliyə müvafiq olaraq o, deputat mandatını itirib.

Eldəniz Səlimov

E. Səlimov iyulun 29-da Xaçmazdakı “Starıy Dvor” restoranında polis əməkdaşına zor tətbiq etdiyinə görə, Cinayət Məcəlləsinin 309.2-ci (vəzifə səlahiyyətlərini aşma) maddəsi üzrə cinayət məsuliyyətinə cəlb edilib və 3 il 6 ay müddətinə azadlıqdan məhrum olunub. O, 2021-ci ilin avqustunda deputat mandatından məhrum edilib.

Ramin Məmmədov

2020-ci ildə 64 saylı Sabirabad ikinci seçki dairəsindən VI çağırış Milli Məclisin deputatı seçilmiş Ramin Məmmədov 2024-cü il aprelin 8-də Azərbaycan Respublikasının Dini Qurumlarla İş üzrə Dövlət Komitəsinin sədri vəzifəsinə təyin olunub. 2024-ci il mayın 2-də isə onun deputat mandatına xitam verilib.

Ramil Həsən

Milli Məclisin VII çağırış deputatı Ramil Həsən bu ilin iyul ayında Türk Dövlətləri Parlament Assambleyasının (TÜRKPA) Qazaxıstanın paytaxtı Astana şəhərində keçirilən 14-cü plenar sessiyasında təşkilatın yeni Baş katibi seçilib. Oktyabrın 15-də isə Mərkəzi Seçki Komissiyası Ramil Həsənin deputat səlahiyyətlərinə vaxtından əvvəl xitam verib.