Beynəlxalq Jurnalistlər Şurası (Global Journalism Council) 6–9 noyabr tarixlərində 41 ölkədən 310 jurnalistin iştirak edəcəyi tədbirlərlə, media diplomatiyası missiyasına uyğun olaraq geniş proqramla həm milli, həm də beynəlxalq media gündəminə yenidən daxil olmağa hazırlaşır.

Dünyanın 41 müxtəlif ölkəsi və Türkiyədən gələcək jurnalistlər, media nümayəndələri, akademiklər və kommunikasiya mütəxəssisləri, ümumilikdə 310 nəfər Alanyada beşulduzlu EFTELYA MARİN Oteldə keçiriləcək proqramda bir araya gələcək.

Tədbirlərdə rəqəmsal dövrdə jurnalistikanın gələcəyi, süni intellektin rolu, dezinformasiya ilə mübarizə, etik jurnalistika, yerli medianın gücləndirilməsi və media təhsili kimi mövzular müzakirə ediləcək.

Təşkilatın sədri Mehmet Ali Dim bildirib ki, Alanya toplantısı hər il olduğu kimi, bu dəfə də çox möhtəşəm olacaq:

"Bu, Türk mediasının beynəlxalq səviyyədə səsini daha güclü çatdırmaq üçün atılmış strateji addımdır. Jurnalistlərimiz bu proqram sayəsində həm təcrübələrini bölüşəcək, həm də peşənin gələcəyinə yön verəcək bilik və bacarıqlar qazanacaqlar. Bundan əlavə, 41 ölkədən gələcək həmkarlarımız arasında əməkdaşlıq və dostluq əlaqələri üçün də zəmin yaranacaq".

Beynəlxalq Jurnalistlər Şurasının xarici media üzrə sədri Elşad Eyazlı isə deyib ki, görüşün ən diqqətçəkən məqamlarından biri 8 noyabr Zəfər günümüzdə Lonicera World Otelin bal zalında keçiriləcək mükafatlandırma mərasimidir.

310 jurnalist, 100-dən artıq digər sahələrin adamalarının iştirak edəcəyi mərasimdə Zəfər günümüzdə bağlı videosüjet nümayiş olunacaq, Azərbaycanın Xalq artistinin ifasında musiqi səsləndiriləcək.

"Bu imkanı bizə verdiyinə görə təşkilatımızın rəhbəri Mehmet Ali Dimə Azərbaycan adından sonsuz təşəkkürümü bildirirəm. Bütün dönəmlərdə, istər Qarabağın işğalı zamanı, istər savaş vaxtı, istərsə də sonrakı günlərdə hər zaman Mehmet Ali Dimin dəstəyini gördük. O, gerçək qardaşlıq nümunəsidir. Məlumat üçün bildirim ki, Azərbaycandan Mətbuat Şurasının sədri Rəşad Məcid də toplantıda iştirak edəcək.".

Qeyd edək ki, tədbir müddətində jurnalistika sahəsində seçilən şəxslər, beynəlxalq layihələrdə uğur qazanmış media peşəkarları, eləcə də qlobal miqyasda tanınmış dövlət xadimləri, alimlər, idmançılar və sənət adamları mükafatlandırılacaq.

Bu il mərasimə Şimali Makedoniya Parlamentinin sədri Afrim Qaşi və Türkiyə Nəqliyyat naziri Abdulkadir Uraloğlu fəxri qonaq qismində qatılacaqlar.

Bir çox tanınmış şəxsə təqdim ediləcək 5-ci Qlobal Uğur Mükafatları ilə yanaşı, ilk dəfə olaraq İsmayıl Qaspıralı adına müxtəlif kateqoriyalarda şərəf mükafatları veriləcək.

Mükafat alacaq şəxslər arasında azərbaycanlılar da var./modern.az