Tayvan yaxın gələcəkdə müdafiə qabiliyyətini gücləndirmək üçün mühüm addımlar atmağa hazırlaşır.

“Taipei Times” xəbər verir ki, ABŞ istehsalı olan M142 HIMARS reaktiv yaylım atəş sistemlərinin ikinci partiyası, əvvəlki plana görə bir il erkən, yəni 2026-cı ilin sonunadək Tayvana təhvil verilə bilər. Əvvəlcə bu silahların çatdırılması 2027-ci ilə planlaşdırılmışdı.

Yeni partiyada 18 HIMARS start qurğusu, 20 ATACMS taktiki raket (300 km-ə qədər məsafə) və 864 yüksək dəqiqlikli idarəolunan raket (70 km-ə qədər məsafə) yer alacaq. Bu silahlar Tayvanın quru qoşunlarının uzaqmənzilli zərbə gücünü artıracaq. Ekspertlər hesab edirlər ki, ATACMS raketləri Tayvanın Çinin sahilboyu, xüsusilə də Fuczyan əyalətinə qarşı cavab zərbəsi imkanlarını genişləndirəcək.

Bu, Tayvanın ABŞ-dan aldığı ikinci HIMARS partiyası olacaq. İlk mərhələdə ada 29 start qurğusu sifariş etmişdi və onlardan 11-i 2024-cü ildə təhvil veriləcək. Həmin il Tayvan ordusu HIMARS sistemləri ilə ilk canlı atış sınaqlarını keçirib, bu da Tayvanın yeni silahlarla operativ inteqrasiyaya başladığını göstərir.

Bununla yanaşı, ABŞ-ın Tayvana digər hərbi tədarükləri ilə bağlı bəzi gecikmələr mövcuddur. Xüsusilə, Tayvana veriləcək 66 F-16V Block 70 qırıcı təyyarəsinin tam çatdırılması 2026-cı ilin sonuna qədər qeyri-müəyyən bir tarixə təxirə salınıb. Həmçinin, AGM-154C tipli idarəolunan aviabombalar və 24 Mark 48 ağır torpedanın tədarükü də gecikib. Bu, Tayvanın hava qüvvələrinin modernləşməsi prosesinə mənfi təsir göstərə bilər.

Vaşinqtonun Tayvana silah tədarükünü sürətləndirməsi, Çinin sərt etirazına səbəb olub. Pekin bu addımları “ölkənin daxili işlərinə müdaxilə” və “Tayvanın müstəqilliyini dəstəkləmək” kimi qiymətləndirir. Analitiklərə görə, HIMARS və ATACMS sistemlərinin erkən verilməsi, regionda gərginliyi artırmaqla yanaşı, Pekin üçün strateji balansı dəyişdirə bilər.

HIMARS sistemləri Tayvanın 300 kilometrədək zərbə endirmə qabiliyyətini gücləndirəcək, bu da ona potensial qarşıdurma halında daha çevik və effektiv müdafiə mövqeyinə gətirəcək. Müdafiə analitikləri qeyd edirlər ki, HIMARS-ların yeni partiyası Tayvanın yerüstü zərbə və artilleriya qüvvələrini ciddi şəkildə gücləndirəcək. Lakin bununla yanaşı, yeni sistemlərin logistik təminatı və hədəf koordinasiyası kimi kompleks hazırlıq prosesləri tələb edəcək.

Bəzi ekspertlər, ABŞ-ın Tayvanın hava qüvvələri üçün nəzərdə tutulan tədarükləri gecikdirməsinə baxmayaraq, HIMARS kimi raket sistemlərinin tezləşdirilmiş verilməsini Vaşinqtonun Tayvanla müdafiə əməkdaşlığında yeni prioritetlər formalaşdırması kimi qiymətləndirirlər.

Press-fakt