İlham Əliyev:
"Onların bütün silahlarını məhv edəcəyik"
“Bu, erməni faşizminin növbəti təzahürüdür. Onlar adətən döyüş meydanında məğlubiyyətə uğrayanda dinc əhaliyə atəş açırlar. Bunu biz Birinci Qarabağ müharibəsində də görmüşdük”.
Bunu Azərbaycan Prezidenti İlham Əliyev Türkiyənin “A Haber” televiziya kanalına müsahibəsi zamanı Tərtərə hücumu şərh edərkən bildirib.
“Xocalı soyqırımını törədən həmin bizim mənfur qonşularımızdır. Bu dəfə də görəndə ki, artıq döyüş meydanında Azərbaycan Ordusunun qarşısında acizdirlər və işğal edilmiş torpaqlarda bizə müqavimət göstərə bilmirlər onlar yenə də mülki vətəndaşları hədəfə aldılar və namərd təcavüz nəticəsidnə bizim insanlarımız həlak oldu: həm Gəncədə, həm də dünən Tərtərdəki qəbiristanlıqda.
Bu da insanların dəfn mərasimində iştrak etdiyi bir yerdir. Hər bir insan üçün müqəddəs bir yer sayılır. Ancaq bizim mənfur qonşularımız üçün müqəddəs anlayışı, görünür ki, yoxdur. Bu, insanlığa qarşı cinayətdir. Bir daha Ermənistanın yırtıcı xislətini göstərir. Bir də onu göstərir ki, bu namərd təcavüzlər bizi yolumuzdan döndərə bilməz”, - Prezident qeyd edib.
Dövlət başçısı bildirib ki, ermənilər atəşkəsdən sonra Hadrud qəsəbəsini yenə də işğal etmək istəyiblər: “Atəşkəsdən sonra 3 dəfə Hadrud qəsəbəsini yenə də işğal etmək istədilər, 3 dəfə ora həmlə etdilər”.
“Amma 3 dəfə də məğlub oldular. Onların niyyəti itirilmiş və onlara mənsub olmayan torpaqları yenə də qaytarmaq və beləliklə işğalçılıq siyasətini davam etdirməkdir”, - Prezident əlavə edib.
Dövlət başçısınını sölərinə görə, hər gün yeni əraziləri işğaldan azad edilir: “Azad edilmiş torpaqların ərazisini hesablamaq o qədər də çətin məsələ deyil. Halbuki, hər gün bu, dəyişir”.
Prezident dünən 6 kəndin işğaldan azad edilməsini Azərbaycan xalqına çatdırdığını deyib: “Ondan əvvəlki gün də daha çox sayda kəndlər azad edilib. Bu proses davam edir. Demək olar ki, hər gün biz yeni əraziləri işğaldan azad edirik. Hər gün strateji yüksəklikləri azad edirik. Ona görə bu rəqəmlər dəyişir”.
“İrandan Ermənistana silahların göndərilməsi ilə əlaqədar bizdə hər hansısa məlumat yoxdur” - deyə, İlham Əliyev bildirib
Prezident bildirib ki, İran və Gürcüstan öz hava məkanlarını və quru yollarını Ermənistana silahların daşınması üçün bağlayıb: “Əksinə, deyə bilərəm ki, İran və Gürcüstan öz hava məkanlarını və quru yollarını Ermənistana silahların daşınması üçün bağlayıb. Buna görə biz İran və Gürcüstan hökumətlərinə təşəkkürümüzü bildirmək istəyirik. Gürcüstan ərazisindən, bizdə olan məlumata görə, bu gün mülki, eyni zamanda karqo təyyarələri ilə qaçaq silah göndərilib.
Ermənistan bu yaxınlarda bir təyyarə alıb. Bizdə olan məlumata görə, hardasa 30-40 milyon dollara alıb. Bu təyyarəni alan Rusiyada yaşayan zəngin erməni iş adamlarıdır: Karapetyan, Abramyan və başqaları. Onlar Rusiyada yaşayan erməniləri bizə qarşı vuruşmaq üçün muzdlu kimi Qarabağa göndərirlər.
Eyni zamanda bu İL-76 təyyarəsinin alınması Ermənistana imkan verdi ki, qaçaq yolla bu silahları Ermənistana ötürsün. Çünki hər dəfə hərbi təyinatlı məhsullar göndəriləndə bu bəyan edilir. Onların bəyanatlarında isə bu mülki karqodur. Amma bunun içində “Kornet” (tank əleyhinə silahlar), “Konkurs” (tank əleyhinə silahlar), “İqla” (hava hücumuna qarşı silahlar).
Eyni zamanda, bizdə olan məlumata görə, Rusiyadan qaçaq yolla alınmış raketlər göndərilir. Ona görə biz ICAO-ya (Beynəlxalq Mülki Aviasiya Təşkilatı – red.) rəsmən müraciət etdik ki, ICAO bu məsələni araşdırsın, bunu dayandırsın. Bu, beynəlxalq cinayət sayılır. Bu qaçaq silahların Ermənistana göndərilməsi qəbuledilməzdir”, - ölkə başçısı söyləyib.
Prezident qeyd edib ki, Ermənistan ordusuna böyük zərbə vurulub: “Bizim hesablamalarımıza görə haradasa 2 milyard dollar ətrafında Ermənistan ordusuna ziyan dəyib. Bu, davam edir”.“Demişəm, Ermənistan rəhbərliyinə də müraciət etmişəm – siz atəşkəsə əməl edin, bizə təqvim verin, torpaqlarımızdan çıxın bu müharibə dayansın, siz də qalan silahlarınızı qoruyun. Yoxsa belə gedərsə onların bütün silahlarını biz məhv edəcəyik” ,- deyə, Prezident əlavə edib.
Prezident bildirib ki, şuşasız bizim işimiz yarımçıq olar: “İstiqamət hər tərəfdir. İşğal edilmiş torpaqların hər bir qarışı bizim üçün doğmadır, əzizdir. Mənim üçün hər bir kəndin dəyəri, qiyməti o biri kəndlərlə müqayisədə eynidir, bərabərdir”.
“Siz də yaxşı bilirsiniz ki, Şuşanın Azərbaycan xalqının qəlbində xüsusi yeri var. Bu, bizim tarixi şəhərimzidir. Qədim mədəniyyət ocağıdır. Şuşa Azərbaycan xalqına bir çox istedadlı, dahi şəxslər bəxş edib. Əlbəttə ki, Şuşasız bizim işimiz yarımçıq olar. Müzakirələr zamanında da hər zaman bu məsələ gündəlikdə idi” ,-deyə, Prezident əlavə edib.
Prezident qeyd edib ki, Ermənistan 30 il ərzində işğal edilmiş bölgələrdə bütün təmas xətti boyunca çox güclü istehkamlar qurub: “Bəzi yerlərdə onların 4 müdafiə xətti var. Çox böyük beton plitələri var, sığınacaqları, bunkerlər var. Bir də ki, o bölgənin relyefi elədir ki, o həm də təbii istehkamdır. Çünki o dağlıq ərazidir və biz aşağıdan yuxarı gedirik. Hər bir ordu üçün bu böyük çətin və risklidir. Ona görə bu istiqamətdə bizim gördüyümüz işlər böyük qəhrəmanlıq tələb edirdi.
Düşmənin texnikasını dəqiq məhv etmək üçün mütləq pilotsuz uçan aparatlarına ehtiyacımız var idi. Çox xoşbəxtik ki, qardaş Türkiyənin inkişaf etmiş hərbi sənaye kompleksi gözəl PUA və zərbə PUA-larını istehsal etməyə başlayıb. Azərbaycan ilk ölkələrdəndir ki, bu zərbə PUA-larını ala bilib. Yalnız Türkiyə istehsalı PUA-lar ilə bir milyard dollar dəyərində olan erməni silahlı texnikası məhv edilib. Müharibənin gedişatını çox dəyişdirib”.
“İslamofob qüvvələrlə yanaşı Türkiyənin gücündən narahat olan dairələr var, çünki bugünkü Ərdoğan Türkiyəsi 20 il öncəki Türkiyə deyil. Biz də bunu bilirik, Türkiyədə yaşayan qardaşlarımız da bilir”- Prezident İlham Əliyev “A Haber” televiziya kanalına müsahibəsi zamanı bildirib.
“Bu gün Türkiyə dünyada söz sahibidir. Heç kim Türkiyəyə nəyisə diktə edə bilməz. Nəyəsə məcbur edə bilməz. Türkiyə öz maraqlarını, öz müttəfiqlərinin maraqlarını layiqincə dünyada müdafiə edir. Öz təhlükəsizliyini bildiyi kimi təmin edir. Beynəlxalq ictimaiyyətdə söz sahibidir. Bölgədə Türkiyənin iştirakı, razılığı olmadan heç bir məsələ həll oluna bilməz: Suriya, Liviya, Aralıq dəniz...
Bunlar onu göstərdi. Ona görə Türkiyənin gücünü istəməyən və bundan narahat olan qüvvələrdir bunlar. Türk dünyası üçün Türkiyə böyük bir gücdür və bizi gücləndirir. Türkiyə-Azərbaycan birliyi bölgə üçün sabitlik gətirir. Əgər Türkiyədən qarşıdurmanın ilk saatlarında konkret mesajlar gəlməsəydi, bəlkə də, başqaları bu işlərə qarışa bilərdi. Türkiyənin bu mesajları hər kəsə “dayan”, “Azərbaycan yalnız deyil”, “Türkiyə sonacan Azərbaycanın yanındadır” dedi.
Əlbəttə ki, Azərbaycan-Türkiyə birliyi çox ciddi geosiyasi faktora çevrilib. Bizim birliyimiz hər hansısa ölkənin maraqlarına qarşı deyil. Biz sadəcə öz maraqlarımızı müdafiə etməliyik, öz yolumuzu davam etdiririk, heç kimsə bizim işimizə qarışmasın, heç kim bizim daxili məsələlərimizə burnunu soxmasın – biz bunu istəyirik”, - dövlət başçısı qeyd edib.
Prezidenti İlham Əliyev seyib ki, Soros Ermənistanda hakimiyyətə gəldi, amma iflasa uğradı: “Mən Soros deyəndə təkcə Corc Sorosu nəzərdə tutmuram. Bu, bir anlayışdır, bu bir hərəkətdir, dağıdıcı bir hərəkətdir, yırtıcı bir hərəkətdir, bu, müstəmləkəçi bir hərəkətdir”.
“Ermənistanda çevrilişin təşkil edilməsində Soros qruplarının böyük rolu olub. Paşinyan əslində hər zaman anti-Rusiya mövqeyində olub. Onun partiyası “Yolka”nın adını tərcümə etsək, “çıxış” deməkdir. Hardan çıxış? ODKB-dən və Avrasiya Birliyindən. O millət vəkili kimi həmişə Rusiyanın əleyhinə idi. Anti-Rusiya mövqeyində idi. Ona görə mən təəccüb edirəm ki, bu günədək Rusiyada bəzi siyasi dairələr onun tərəfini tuturlar.
Axı bu ruspərəst qüvvələrə qarşı inqilab etdi, ruspərəst prezidentləri həbsə atdı, ruspərəst ana müxalifət partiyasının sədrini həbsə atdı. Hər şeyi Rusiyanın əleyhinə etdi. Rusiyanın “Qazprom” şirkətinə, dəmir yolu şirkətinə cinayət işi açdı. Kollektiv Təhlükəsizlik Müqaviləsi Təşkilatının (NATO tipli təşkilatdır) erməni əsilli baş katibini həbsə atdı. Bu, Sorosun sözü ilə oturub-duran adamdır. Bir də ki, onun komandasına baxın: “Soros Foundation”, “Açıq Cəmiyyət” təşkilatı, “Amnesty International” – hamısı bunlardır. Yəni Soros bu gün Ermənistanda hakimiyyətə gəldi, amma iflasa uğradı”, - Prezident söyləyib.