Hakim Yunis Səfərov və digərlərinin qollarındakı qandalları açdırdı
Bu gün yanvarın 8-də Sabunçu rayon Məhkəməsində Gəncənin icra başçısı Elmar Vəliyevi güllələməkdə ittiham olunan Yunis Səfərovun və digərlərinin cinayət işi üzrə məhkəmənin hazırlıq iclası davam etdirilib.
Virtualaz.org-un xəbərinə görə, prosesə Gəncə Ağır Cinayətlər Məhkəməsinin hakimi Natiq Əliyev sədrlik edib.
Hakimin göstərişinə əsasən konvoy vasitəsilə məhkəmə zalına gətirilən, şüşə kabinaya salınan dustaqların ilkin hazırlıq iclasından fərqli olaraq qollarındakı qandallar açılıb.
“Biz jest edib sizin qollarınızdakı qandalları açırıq. Bəzən deyirlər ki, guya Avropada dustaqların qollarına qandal vurulmur. Amma Avropada təkcə əllərə deyil, hətta ayaqlara da qandal vurulur...”- hakim bildirib.
Qeyd edək ki, dünənki prosesdə təqsirləndirilən şəxslər məhkəmə önündə qolları qandallı vəziyyətdə dayanıblar. Təqsirləndirilənlərin vəkilləri vəsatət qaldıraraq məhkəmə iclasında dustağın əlləri qandallı vəziyyətdə saxlanmasını ədalət mühakiməsi prinsiplərinə zidd olduğunu bildiriblər. Avropa məhkəməsinin bu barədə qərarları olduğunu qeyd ediblər.
Müdafiəçilərin prosesin audio və videoyazısının aparılması, cinayət işinin ibtidai istintaqa qaytarılması, maddi sübutlarla baxış keçirilməsi, bəzi təqsirləndirilən şəxslər barədə həbs qətimkan tədbirinin dəyişdirilməsi ilə bağlı verdikləri vəsatətləri təmin etməyib.
Həmçinin, Yunis Səfərovun istədiyi vəkilin – Elçin Sadıqovun onun hüquqlarını müdafiə etməsinə icazə verilməyib. Bu qadağanı belə əsaslandırıblar ki, vəkil E.Sadıqov istintaq dövründə prokurorluğun qərarıyla Y.Səfərovun müdafiəsindən uzaqlaşdırılıb. E.Sadıqov isə bildirib ki, istintaq dövründə olanların məhkəməyə heç bir aidiyyəti yoxdur, istintaq və məhkəmə dövrü üçün vəkillə ayrı-ayrı müqavilə bağlanır.
Onu da bildirək ki, ilkin hazırlıq iclasında Y.Səfərov dövlət hesabına təyin edilən vəkil Elman Ağayevin hüquqi yardımından imtina etdiyini, hüquqlarını Elçin Sadıqovun müdafiə etməsini istədiyini bildirib.
Məhkəmə baxışı yanvarın 16-a təyin edilib.
Sözügedən cinayət işi üzrə təqsirləndirilən şəxslərin sayı 12 nəfər olsa da, məhkəmə önündə 10 nəfər dayanıb. İki nəfər - Ağa Sərxani və Anar Bağırov tutularkən öldürülüb. Həbs edilənlərə qarşı 30-dan artıq maddə ilə ittiham irəli sürülüb.
Cinayət işi üzrə Gəncənin sabiq icra başçısı Elmar Vəliyev və daha 5 nəfər zərərçəkən şəxs qismində tanınıb.
Xatırladaq ki, ötən il iyulun 3-də Gəncə şəhər İcra Hakimiyyətinin başçısı Elmar Vəliyevə (artıq həmin vəzifədə çalışmır) və bir polis serjantına silahlı sui-qəsd olub, onlar xəsarət alıblar. Sui-qəsdi törətdiyi bildirilən Yunis Səfərov həbs edilib. Hüquq-mühafizə qurumları bunu terror əməli sayır və Yunis Səfərovun əsas məqsədinin Azərbaycanda şəriət qanunları ilə yönəldilən İslam dövləti qurmaq olduğunu iddia edirlər.