Məlum olduğu kimi, artıq ölkədə Prezident İlham Əliyevin müxtəlif illərdə imzaladığı sərəncamlar və göstərişləri ilə qeyri neft sektorunun dirçəldilməsi Azərbaycanın iqtisadi inkişaf prioritetinə çevrilib. Son bir neçə ildə hazırlanan proqramlar, həyata keçirilən layihələr məhz bu amala xidmət edir. Bu sahəyə necə önəm verildiyinin ən bariz nümunəsi isə ölkə başçısı İlham Əliyevın 2017-ci ildə Azərbaycan Respublikasında baramaçılığın və ipəkçiliyin inkişafına dair 2018–2025-ci illər üçün DÖVLƏT PROQRAMI imzalamasıdır. Sovet dovründən son illərə qədər unudulan sahələrdən olan pambıqçılıq , üzümçülük , arıçılıqla yanaşı baramaçılığın da inkişaf etdirilməsi ölkə başçısının diqqətini təsadüfi çəkməmişdir.

Baramaçılıq Azərbaycanın ənənəvi məşğulluq və həm də gəlirli təsərrüfat subyektlərindən olmuşdur. Üstəlik, bu sahənin inkişafı və perspektivi üçün ölkəmiz münbit şəraitə, müəyyən təcrübi bazaya malikdir. PROQRAMın yaranmasına da fikrimizcə, məhz bu amillər zəmin yaratmışdır.

Əgər belə isə, yəni ölkə başçısı baramaçılığın inkişafı üçün belə israrlı addımlar atırsa, hətta DÖVLƏT PRQRAMI hazırlanırsa, Kənd Təsərrüfatı nazirliyinin buna reaksiyası necə olmuşdur? 

Ona görə Kənd Təsərrüfatı Nazirliyini subyekt seçirik ki, sözügedən Dövlət Proqramından irəli gələn vəzifələr - bu işin canlandırılması, həyata keçirilməsi məsuliyyəti bilavasitə bu qurumun üzərinə düşür. Üstəlik də bunun üçün ölkənin müxtəlif regionlarında Kənd Təsərrüfatı Nazirliyinin kifayət qədər bazası – institutları, maliyyə vəsaiti, torpaq sahələri, təcrübə-sınaq laboratoriyaları, texniki resursları və s. var. Bəs bu potensialın  qarşılığında bu səlahiyyətli qurum ötən illər ərzində baramaçılığın inkişafı üçün nə edib?

Fikrimizi konkret regionun timsalında konkret faktlarla davam etdirək.   

Kənd təsərrüfatnda  məhsulu əkib becərmək, onun məhsuldarlığı üçün yararlı torpaq və iqlim şəraitinin seçilməsi ən mühüm şərtlərindən sayılır. Tərəddüdsüz deyə bilərik ki, Gəncə ölkəmizin məhz belə bölgələrindən biridir. Odur ki, zamanında kənd təsərrüfatının inkişafı üçün Bitki Mühafizəvə Texniki Bitkilər Elmi-Tədqiqat İnstitutu bu regionda yaradılıb. Məhz bölgə ərazisində ixtisaslaşdırılmış müəyyən yönümlü iqtisadi inkişafa nail olmaq üçün.

...İllər öncə regionda, konkret olaraq sovet dönəmində   Gəncədə Bitki Mühafizə və Texniki Bitkilər Elmi-Tədqiqat İnstitunun (BMTBETİ) bazasında (qeyd edək ki, vaxtilə Kənd Təsərrüfatı Nazirliyinin tabeliyində İpəkçilik İnstitutu yaradılıb və həmin İnstitut sonradan BMTBETİ-nin tərkibinə verilib-red.) baramaçılığın inkişafı üçün 8,3 hektar ərazidə tut bağı salınır. İllər sonra, yəni 2017-ci ildə ölkə başçısı İlham Əliyev “Azərbaycan Respublikasında baramaçılığın və ipəkçiliyin inkişafına dair 2018–2025-ci illər üçün DÖVLƏT PROQRAMI” nı elan edir.

Baza ərazisində satışa çıxarılan tikilidən biri

Sağlam düşüncə və sağlam məntiqlə 8.3 hektarda salınan bu tut bağının dövlət başçısının imzaladığı Dövlət Proqramına (DP) töhfəsi olmalıydı, deyilmi? Diqqət edin: biz bunu təəssüf ki, təsadüfən “olmalıydı” yazmadıq. Bəli, yerli əhaliin “Çəkillik” adlandırdığı o tut bağından bu gün bir əlin barmaq sayı ağac qala, ya qalmaya.
Ölkə Prezidenti İlham Əliyevin 2017-ci ildə baramaçılıqla bağlı elan etdiyi Dövlət Proqramı yumşaq desək, Gəncədə iflasa uğrayıb. O bağın o Proqrama töhfəsinə qalanda, o ola bilməzdi, çünki... o bağı kökündən qazıyıblar-qəsdinə durmuş kimi Prezidentin elanından keçən üç ildə üç ağac da saxlamayıblar... Nəinki tut bağını, hətta İnstitutun ərazidəki tikililərini də dədə malı kimi satıb həzm-rabedən keçiriblər...Təsəvvür edirsinizmi?- İşbazlar dövlətə məxsus 8.3 hektar ərazini paramparça edərək əhaliyə həyətyanı sahə kimi sotunu ən müxtəlif qiymətdən sırıyıblar... Göz də qırpmadan - qorxusuz, hürküsüz. 

...Fərqindəyik. Az qala görürük - təbii olaraq bu sətirlərin arxasından bir az tərəddüd və inamsızlıq, bir az da qorxu və heybət qarışıq boylanan sualları: Əcəba, qurd ürəyi yeyib də gözlərini qan örtmüş bu ikiayaqlı ac kaftar kim və ya kimlərdir ki, ilin-günün bu vaxtında - məmurlara qəzəblənib “MƏNİM DƏ ARTIQ SƏBRİM TÜKƏNİR...” deyən müzəffər Prezident İlham Əliyevin Dövlət Proqramının qabağına daş dığırlayan? Kimdir bu dünyaya qarnının gözü ilə baxdığından burnunun ucundan uzağı görə bilməyən “cəsur” tamahkar?

...Həə, gəldik mətləb üstünə. Təbii, düz düşündünüz, bir abzas yuxarıda yazılanları və əmin olun ki indən sonra yazacaqlarımızı sıradan adamlar edə bilməz.

Nə vaxtsa seçki ilə bağlı çox tutarlı bir cümlə oxumuşdum: “Hər şey oqqqədər şəffaf olub ki, heç kim heç nə görməyib” (Tam şəffaf olan şey gözlə görünmür ki...-red.). Bunu təsadüfi xatırlatmadım və irəlidə təhqiqat filminə bənzər mövzumuza çox bağlı və dəxli olduğunu görəcəksiniz.

Keçək xronoloji ardıcıllığa. 

Kənd Təsərrüfatı (KT) Nazirliyinin Gəncədəki Bitki Mühafizə və Texniki Bitkilər Elmi-Tədqiqat İnstitutunun tabeliyində olan və barəsində bəhs etdiyimiz kimi, paramparça edilib satılan “Çəkillik” bazasının müdiri Eldar Ələsgərovdur. Yeri gəlmişkən qeyd edək ki, bu şəxsin əli tabe olduqları KT nazirliyinin ətəyindədir.
Yəni ki, sözügedən baza müdiri ilə Kənd Təsərrüfatı nazirinin müavini Elçin Zeynalovun yaxın qohumluq əlaqələri var. Əldə etdiyimiz məlumata görə, Eldar Ələsgərov hələ İpəkçilik İnstitutu dövründən “Çəkillik” bazasının nəzarətçisi olub və institutların birləşməsindən sonra bazaya müdirliyi əlində saxlamaqla eyni zamanda Bitki Mühafizə və Texniki Bitkilər Elmi-Tədqiqat İnstitutun Həmkarlar Təşkilatına sədr seçilib.
Ona bu “etimadı” isə... həmyerlisi Elçin Xəlilov göstərib. O Elçin Xəlilov ki, Bitki Mühafizə və Texniki Bitkilər Elmi-Tədqiqat İnstitutuna direktor təyinatı zamanı məhz Eldar Ələsgərovla nazir müavini olan Elçin Zeynalovun qohumluğundan bəhrələnir.– Deyilənə görə nazir müavini öz adaşı Elçin Xəlilovu məhz “Çəkilliy”in müdiri və Həmkarlar Təşkilatının sədri Eldar Ələsgərovun “təqdimatı” və araçılığı ilə İnstituta rəhbər təyin etdirib. 

...Günlərin bir günü Kənd Təsərrüfatı naziri İnam Kərimov Gəncəyə səfər edir. Nazirliyin tabeliyindəki qurum və obyektlərlə tanışlıq zamanı öyrənir ki... artıq bizim yuxarıda yazdıqlarımız baş verib – ziyalı qılığındakı dəllallar İnstitutun baza torpağında elə bir əməliyyat aparıblar, elə satıb sümürüblər ki, necə deyərlər, bağ köçüb (köçürülüb), yurd qalıb – halal pul verib haram torpaqda ev tikən camaatın yurdu.  

...Hazir heç tərəddüd etmədən bu cinayətin araşdırılması və cinayətkarların cəzalandırılması, qanunun bərpası üçün Baş Prokurorluğa məktub göndərir. Beləcə, çoxsaylı insanların gözü qarşısında baş verən və çoxlarının bilib də içinə saldığı, hətta qanunsuz alqı-satqı iştirakçılarının reaksiya vermədiyi cinayət əməlinin araşdırılmasına rəsmi start verilir.Vaqeə baş verir 2018-ci ilin sonlarında.

Bəs Baş Prokurorluq nəyə nail olub? De-fakto İnstitutun bazası-dövlət torpağı külli-Gəncənin gözü qarşısında satılıb. Üstündən də 2 il vaxt keçib. Baş Ptrokurorluq-qanunların icrasına nəzarət edən rəsmi dövlət qurumu öhdəsində olan kifayət qədər müddət ərzində cinayətkarların məsuliyyətə cəlb edilməsinə nail olubmu? 

Xronolojini qabaqlayaraq elə bəri başdan deyək ki, prosesə maraq və təəccüb qatan, cavabsız suallar doğuran olaylar məhz prokurorluğun işə müdaxiləsindən - araşdırmasından sonra baş verib.

...Təhqiqat başlayan kimi ilk öncə, necə deyərlər, ilk əməliyyatdaca isti-isti Gəncə şəhər İcra Hakimiyyəti Memarlıq və Şəhərsalma İdarəsinin rəisi olmuş  Məharət Mustafayevi həbs edib qoyurlar içəri (Fikrimizcə olaylara rəğmən bu şəxsin həbsinə əlavə araşdırma tələb edir-red.). Çünki... satılan torpaqların layihə sənədlərində onun da imzası var.
Fikir verdinizmi, biz “onun imzası” yox, “onun da imzası” yazmışıq. Niyəsi, maraqlısı və həm də anlaşılmaz olanı odur ki, satılan torpaqların sənədlərində tək onun yox... eyni zamanda Gəncə Şəhər Kəpəz Rayon İcra Hakimiyyətinin başçısı Eldəniz Xudiyevin də imzası var.


Bəli, qeyri-qanuni satılan torpaqların layihəsini məsul şəxs kimi Məharət Mustafayev, sərəncamı isə İH başçısı Eldəniz Xudiyev imzalayıb. Hansı tərəfə çəksək, hara yozsaq da məntiqi bir suala cavab tapmaq zərurəti yaranır: Əgər dövlət torpaqları qeyri-qanuni satılıbsa və cinayət müştərək edilibsə, bəs niyə ayrı-seçkilik edilib? Niyə bu qanunsuzluğu edənin biri –Azərbaycan reallığı ilə yanaşsaq, daha az məsuliyyətlisi həbs edilib, daha çox məsuliyyətlisi isə heç nə etməmiş kimi hələ də vəzifəsinin başındadır?.. 

Hələlik aktuallığını itirməyən bu sualı bir qırağa qoyub bir az daha maraqlı nüansa nəzər salaq. 

Yazıya sənəd kimi qoyduğumuz İH başçısının imzaladığı sərəncamın və M. Mustafayevin imza qoyduğu layihənin fotoda görünən tarixinə fikir verdinizmi? Bəli, sənəd 2014-cü ilə aiddir. Yəni 2018-ci ildə satılan torpağa geri tarixə-2014-cü ilə aid sənəd veriblər. Axı biz qeyri-qanuni torpaq alqı-satqısının 2018-ci ildən başladığını, KT naziri İnam Kərimovun prokurorluğa məhz 2018-ci ildə müraciət etdiyini və cinayət işinin də bu zaman başlandığını yazmışdıq? Bəlli, bu son cual cümləsi tərəfimizdən faktın konstatasiyasıdır.
Məsələ burasındadır ki, araşdırmalar zamanı məlum olub ki, foto-surətini gördüyünüz bu sənədlər... saxtadır. Yəni Gəncədəki Bitki Mühafizə və Texniki Bitkilər Elmi-Tədqiqat İnstitunun bazası olan “Çəkillik” adlı tut bağını satan fırıldaqçı işbazlar torpaq alan hər kəsə belə saxta sənəd veriblər. İstintaq orqanları sözügüdən sənədləri və imzaları ekspertizadan keçirdikdən sonra bu qənaətə gəliblər. Bu isə o qənaəti yaradır deyək ki, o sənədlər saxta isə demək İH başçısı da, M.Mustayev də “Çəkilliy”in satılmasından xəbərsiz olublar. 

Yenə məntiqi olaraq bir sual, həm də  çox zorba bir sual yaranır: Yaxşı, bəs o boyda Gəncənin gözü qabağında 8.3 hetar torpağı kim satdı ki, iki il ərzində bizim rəşadətli istintaqçılarımız onun izinə düşə bilmədilər? Yəni doğrudanmı bu sənədləri kimin hazırladığını, o sənədə saxta imza atanın kimliyini aydınlaşıra, tapa bilmirlər?
Sərt də olsa konkret deyək: heç inandırıcı deyil. Çünki saxta deyilən o sənədi alan hər bir şəxs istintaq orqanlarında ifadə verib və ən başlıcası da o ki, saxta deyilən o sənədi adamlara... məlum şəxs - “Çəkillik” adlanan bazanın müdiri Eldar Ələsgərov verib. Bu ki hamıya bəllidir?!
Bəlli isə doğrudanmı Baş Prokurorluq Eldar Ələsgərovdan müdiri olduğu və paramparça edərək camaata PAYLADIĞI dövlət torpağının əvəzindən camaata PAYLADIĞI o saxta deyilən sənədlərə kimin möhür və ştamp vurduğunu, məsul şəxslərin yerinə kimlərin imza atdığını öyrənə bilmir?!

İnandırıcı deyil və heç biz də inanmırıq. Amma hər ehtimala qarşı yenə də deyirik: O Baş Prokurorluqda Şerlok Holmsun kölgəsi ola biləcək bir xəfiyyə yoxdursa və hələ də İnstitutun 8.3 hektarlıq tut bağını-“Çəkilliy”i saxta və ya həqiqi sənədlərlə kimin satdığını öyrənmək, bilmək istəyirlərsə, ümumiyyətlə mövzu hələ də araşdırılırsa, zatən biz kömək edə bilərik. Globall.az-ın redaksiyasında İnstitutun sözügedən bazasının müdiri Eldar Ələsgərovun həmin bazadakı köhnə tikilini satan zaman dəllallıq edib 7 min manata razılaşarkən sözlərini əks etdirən səs yazısı var.

Adam “Çəkillik” adlanan ərazinin bişəkk onların balansında olduğunu və tərtəmiz Azərbaycan dilində “BURANIN SAHİBİ BİZİK” deyir. Həm də səs yazısında təkcə o söz yox –həmin ərazidəki binanı satmaq üçün dəllallıq edərkən dediyi və istintaqa gərəkli ola biləcək, mühüm əhəmiyyət kəsb edən digər cümlələr də var. O cümlələr ki, istintaqçılarda vəzifə borcuna sədaqət, üstəlik də istək və cürət olsa, Eldar Ələsgərovun KT nazirinin müavini Elçin Zeynalovla qohumluğu onlarda xof yaradıb əllərini bu işdən soyutmasa, o cümlələr onları birbaşa Bakıya-cinayət əlaqəsində olduqları bir Komitənin qapısına  gətirib çıxara bilər...

Əks təqdirdə... yuxarıda şəffaflıqla bağlı xatırlatdığım cümlə tam yerinə düşmüş olacaq. Zatən indiyədk külli-Gəncə belə düşünürdü: Hər şey oqqqədər şəffaf olub ki, heç kim heç nə görmür. Eynən Prezident İlham Əliyevin elan etdiyi Dövlət Proqramı kimi. 

Amma biz ümidimizi itirmirik. Zənn edirik ki, indən sonra görəcəklər, görməlidirlər və görməyə məhkumdurlar. Həm Kənd Təsərrüfatı Nazirliyində, həm balansında olduğu torpağı bazar piştaxtasına çıxaran Gəncədəki Bitki Mühafizə və Texniki Bitkilər Elmi-Tədqiqat İnstitununda, həm də məmur-oliqarx iddiasında olan bu işbazları hara layiqdilərsə orada oturtmalı olan Baş Prokurorluqda.  Təbii, “gözü çıxan qardaşlarının”- ağlı mədəsinə yenik düşdüyündən qandallanıb içəri qoyulan “qardaşlarının” taleyini yaşamaq istəmirlərsə...

Mehriban ƏLƏSGƏROVA (Əzizqızı)
GLOBALL.AZ