Dünyada 1.5 milyard doza vaksin vurulub -
Çin və ABŞ bu siyahıda öndədirlər
İndiyədək dünyada COVID infeksiyalarına qarşı azı 1.5 milyard doza vaksin vurulub. Bu barədə hesablamanı “Frans Pres” Agentliyi aparıb.
Agentliyin mayın 18-də rəsmi mənbələrə əsasən yaydığı məlumata görə, 210 ölkədə və ərazidə 1 milyard 500 milyon 17 mindən çox doza vurulub.Ümumi dozaların 60 faizi cəmi üç ölkədə – 421 milyondan çoxu Çində, 274 milyondan artığı Birləşmiş Ştatlarda, 184 milyondan çox isə Hindistanda vurulub.
İsrail əhalinin peyvənd olunmuş qisminə görə liderdir, 60 faizə vaksinin hər iki dozası vurulub. Britaniyada 54 faizə, Birləşmiş Ştatlarda 48 faizə azı bir doza vurub. Rəsmi statistikaya görə, Avropa Birliyi əhalisinin 32 faizinə vaksinin azı bir dozası vurulub.
Mayın 19-da Hindistanda COVID-19-dan gündəlik ölüm hallarında daha bir rekord qeydə alınıb. Səhiyyə Nazirliyi 4 min 529 nəfərin öldüyünü bildirib, ümumi ölü sayı 283 mini keçib. Gündəlik yoluxmalar isə artıq üçüncü gündür 300 mini keçmir. Ancaq hər iki rəqəmin reallığı əks etdirmədiyi güman edilir.
Nyu Dehlidə hakim orqanlar koronavirusun valideynsiz qoyduğu uşaqların təhsilinə sponsorluq edəcəyini, onlara maliyyə yardımı ayrılacağını bildirib. Valideynlərini itirmiş uşaqlar 25 yaşına çatanadək aya 2 min 500 rupi (35 dollar) alacaqlar, təhsil haqqını Dehli hökuməti ödəyəcək.Hindistan 25 milyon yoluxma ilə dünyada Birləşmiş Ştatlardan sonra ikinci yeri tutur.
Parisdə keçirilən sammitdə isə Afrikanın pandemiya ilə mübarizəsinə kömək vəd edilib. Fransa Prezidenti Emmanuel Makronun ev sahibliyi etdiyi sammitə Afrika liderləri, qlobal maliyyə qurumlarının rəhbərləri qatılıb.
Pandemiyanın iqtisadi bədəli böyük olub. Beynəlxalq Valyuta Fondu (BVF) 2020-ci ilin sonlarında xəbərdarlıq edib ki, 2023-cü ilədək Afrikanın inkişaf hədəflərinə çatması üçün 290 milyard dollara ehtiyacı yaranacaq.Sammitdə vaksinlərin qitədə istehsalına yol açmaqdan ötrü patent qadağalarının qaldırılmasına çağırış səslənib. BVF rəhbəri Kristalina Georgiyevanın sözlərinə görə, Afrikada vaksinləmə sürətləndirilməsə, bunun iqtisadi fəsadları olar.