Nurlana Həsənovanın kombinasiyası: 3 müəllimin işini doğma bacısına ötürdü 

Globall.az xəbər verir ki, Samuxda artıq fevral ayından bu günə təhsil şöbəsinin müdiri Nurlana Həsənovanın bir neçə ay davam edən rəhbərliyi dövründə xanım müdirə rəhbərlik etdiyi qurumu təhsil qanunları ilə yox, məktəb direktoru olarkən etdiyi kimi, öz bildiyi metodlarla idarə edir. Maliyyə maxinasiyaları da öz yerində. Axı bu aksiomadır: Adam xarakterinə görə kombinatorluğa meyillidirsə və bu bacarığını kiçik kollektivə rəhbərlik edərkən nümayiş etdiribsə, məntiq də deyir ki, ona daha geniş imkanlar yaratmaq, böyük kollektivə rəhbər təyin etmək elə bəri başdan o kombinatorluğa, maliyyə maxinasiyalarına yol açmaq, əliəyriliyə geniş meydan vermək deməkdir. 

İndiki halda Nurlana Həsənovanın məktəb direktoru olarkən etdikləri Samux rayonunun təhsil sahəsində çalışanlarına bəllidirsə, xanım təhsil şöbəsinə müdir təyin ediləndən sonar o təhsil işçiləri bu haqda nə və necə düşünməlidir? Zənnimcə, heç kimdə təzadlı təsəvvür yaranmayıb. Heç kim də şübhə etmir ki, xanım Həsənova direktor olarkən etdiklərini təhsil şöbəsinin müdiri olarkən daha şövqlə edəcəkdir. Çünki… proteksiya onu daha da cəsarətləndirir və daha da qorxu-hürküsüz edir.  Sözgəlişi qeyd edim ki, təzə təhsil naziri bu faktora nəzər salsa özünün perspektiv planlarını bir bölgənin adamlarının nəzərində kölgədən qorumuş olardı… 

İndi isə keçək mətləbə. Bəs məktəb direktoru olduğu zaman Nurlana Həsənova hansı saxtakarlıqlara əl atıb ki, onun haqqında belə bədgüman fikir yaranıb?

Əvvəla ondan başlayaq ki, Nurlana Həsənova Samux rayon 3 saylı orta məktəbdə direktoru olarkən tədris prosesində bir çox qanunsuzluqlara imza atıb. Globall.az-ın araşdırması zamanı məlum oldu ki, o, məktəbdə tədris olunan 76 saat ingilis dili dərsinin ikinci yarım ildə 34 saatının boş keçməsinə nail olub. Bu halda buraxılış siniflərinin aqibətini düşünün: onların ingilis dili fənni üzrə ikinci yarım ildə qiymətləndirilməsi özünü
necə doğrulda bilərdi? Təbii ki, heç necə! Bəs bu böşluq necə yaranıb, zərurətdən, yoxsa?.. 

Sözügedən məktəbdə ikinci yarım ildə ingilis dilini tədris edən müəllimlərdən biri dünyasını dəyişir, digəri isə təqaüd vaxtı tamam olan günü tədris ilinin sonuna bir neçə ay qalmasına baxmayaraq 8 saylı Ərazi Hesablaşma Mərkəzinin məsləhətlərinə belə önəm vermədən sabiq direktor, indiki Samux Rayon Təhsil Şöbəsinin müdiri Nurlana Həsənova tərəfindən dərhal işdən azad olunur…

Bu abzasa kiçik bir şərh versək deyə bilərik ki, bu boşluq heç də zərurətdən yaranmayıb. Bəlkə də mənfəət marağından yaranıb, dəqiq deyə bilmərik (kiçicik bir araşdırma ilə bu faktın altından nə çıxacaq, dəqiq demək olar-müəllif). Bir müəllim dünyasını dəyişib, buna sözümüz yox. Bəs təqaüd vaxtı tamam olan müəllim necə, onu niyə həmən işdən azad edirdi? Bəyəm müəllimin işdən azad edilməsi dərslərin yarım il boş keçməsindən, şagirdlərin savadsız qalmasından daha zəruri və gərəkli idi? Əlbəttə ki, yox. Burda sadəcə Nurlana müəllimənin mənəmliyi və az əvvəl qeyd etdiyim və araşdırma mövzusu olan faktor önəm kəsb edir…

Kimya-biologiya fənnlərinin tədrisinə gəlincə, burada iş bir az da qəlizləşir. Nədəni o ki, məktəbdə kimya-biologiya tədrisindən 35 saat dərs məhz sabiq direktor Nurlana Həsənovanın… bacısına ayrılıb - Nuridə Həsənovaya (indiki direktor-?!). Üstəlik, bu dərs saatından əlavə Nuridə Həsənovanın 0,5 ştat vahidi üzrə Samux Rayon Uşaq və Gənclər İnkişaf mərkəzində də “dərs dediyi” ortaya çıxıb. 

Təhsil nazirliyinin dərs bölgüsü haqqında qərarını nəzərə alsaq, yəni maksimum dərs yükünün 36 saat olmasını, belə çıxır ki, Nurlana Həsənova dogma bacısına üzgörənlik, daha doğrusu, görüm-baxım edib. Yeri gəlmişkən qeyd edək ki, hazırda bir ştat dərs vahidi bu günkü gün də 12 saatdır. 

Nurlana Həsənova

Sonucu görürsünüzmü, Nurlana Həsənovanın kombinatorluğu sayəsində onun bacısı… üç müəllimin yerini tutur. Və o bunu qorxu-hürkü bilmədən külli-ixtiyar sahibi kimi edir. Sual olunur: Əcəba, kimdir ona bu səlahiyyət aşma sərbəstliyini verən?.. 

Biz hələ Nurlananın təhsil şöbəsinin müdiri vəzifəsinə keçəndən sonra yerinə öz bacısını "direktor" təyin etməsindən danışmırıq (bu ayrı bir araşdırma yazısının mövzusudur-müəllif).

Son üç ildə sözügedən məktəbə rus dili müəllimliyinə tələbat olsa da, sabiq direktor (yeri gəlmişkən qeyd edək ki, o, təhsil şöbəsinin müdiri keçən kimi direktorluq vəzifəsini üç müəllimin yerini tutan bacısına ötürüb-müəllif) , indi təhsil şöbəsinin müdiri olan xanım Həsənova qonşu kənd məktəbindən müəllim dəvət edərək mövcud müəllim yerini vakansiyaya çıxarmır. Buradan da ortaya təbii və yeni bir sual çıxır: Hələ direktor ikən nəinki təhsil idarəsini, eləcə də Təhsil nazirliyini ustalıqla özünə ram edən bu kombinator müəllimə təhsil şöbəsinin müdiri kimi nələri saxtalaşdırıb məngirləyəcək? 

Bütün bunlardan sonar isə bölgə adamlarını düşündürən, onların da cavabı qarşısında naçar qaldıqları bir sual da var: gün bu təhsil şöbə müdirinin arxayın maliyə maxinasiyaları etməsinə, onun az müddətdə təhsil sektorunda qanunsuz əməllərlə davamlı addımlamasına kimlər dəstək olur?..
Özünün dediyinə inansaq, bu proteksiyaçı şəxslər rayonun yüksək vəzifə sahibləri (burada bizə məlum olduğu halda ad çəkməyə lüzum görmürük) olmalıdır.
Məsələnin ilginc tərəfi odur ki, özünün rayonda mötəbərlərin qanadı altında olduğunu dolayı hiss etdirən, bəzən də bunu  az qala aşkar gözə soxan bu xanım hələ dünənə qədər bilərəkdən və ya bilməyərəkdən özbaşınalıq edərək ölkə başçısının, təhsil nazirinin islahat siyasətinə qarşı çıxdığının fərqində belə deyil. 

Bəs bu gün Samux Təhsil şöbəsini, mövcud orta məktəbləri nələr gözləyir? Xatırladaq ki, yaxın zamanlara qədər rayon təhsil işçilərini, yəni məktəblərdə yoxlama apartdırarkən adı komendaturada olan (cəzaçəkmə məntəqəsində) qardaşına yoxlatdıran bu müdirə bu gün hələ də iş başındadır. 

Görünür hansısa qüdrətli əl ona həqiqətən dəstək verir. Əks halda Nurlana Həsənova ölkə Prezidentinin, onun təyin etdiyi təhsil nazirinin islahat siyasətini şəxsi mənfəəti üçün oyuncağa çevirə bilməz, ona qarşı çıxmağa ürək belə eləməzdi. 

Maraqlıdır, yerdə Samux Rayon İcra Hakimiyyətinin başçısı Alı Qocayevin, paytaxtda isə Təhsil naziri Emin Əmrullayevin bundan xəbəri varmı? Varsa və tədbir görmürlərsə, pis. Yox, xəbərləri yoxdursa, onda çox pis. Amma ümid edirik ki, kimsə Samuxdakı Nurlana xanıma “dur” komandası verəcək. Lap “Slavyan”dakı adaşı Nurlana xanıma verilən kimi…

Mehriban ƏZİZQIZI,
Globall.az
Bu da sosial şəbəkələrdə yayılmış və reallığı əks etdirən FOTOFAKT