Paşinyan ordudakı islahatlardan, Azərbaycanla sərhəddən DANIŞDI
Bunu Ermənistanın Baş naziri Nikol Paşinyan çərşənbə günü hökumətin iclasında deyib.
O, ordunu ölkənin xarici təhlükəsizliyinin təmin olunmasında əsas amil adlandırıb. Paşinyan aktiv xarici siyasəti təhlükəsizliyin başqa bir ön şərti hesab edir.
Paşinyan Ermənistan-Rusiya strateji müttəfiqliyini və respublikanın Kollektiv Təhlükəsizlik Müqaviləsi Təşkilatına üzvlüyünü Ermənistanın təhlükəsizliyində vacib amil hesab edir.
Baş nazir regional sabitlik baxımından ATƏT-in Minsk Qrupu çərçivəsində yekun statusun müəyyən edilməsinə yönələn danışıqların davam etdirilməsinin vacibliyini qeyd etdi.
Nikol Paşinyan hökumətin 2021-2026-cı illər üçün proqramını təqdim edərkən bildirib ki, Ermənistan Azərbaycanla sərhədin bəzi hissələrinin mühafizəsini sərhəd qoşunlarına verməyi planlaşdırır.
"Proqramımız və planımız budur ki, Ermənistan Milli Təhlükəsizlik Xidmətinin sərhəd qoşunları tezliklə daha çox ərazini Silahlı Qüvvələrdən təhvil alacaq. Bu baxımdan sərhəd qoşunları artırılmalı və islahatlar aparılmalıdır", - Paşinyan bildirib.
Onun sözlərinə görə, bu, Ermənistanın dinc regional gündəmi təşviq etmək istəyini sübut edir.
Qeyd edək ki, indi erməni sərhədçiləri yalnız Gürcüstanla sərhədi qoruyur. İran və Türkiyə ilə sərhəd Rusiya sərhədçilərinin nəzarətindədir. Ermənistan Silahlı Qüvvələri yalnız Azərbaycanla sərhədə nəzarət edir.
Nikol Paşinyan Nazirlər Kabinetinin iclasında onu da deyib ki, Ermənistan beş il ərzində Xarici Kəşfiyyat Xidməti yaradacaq.
"2050 -ci ilə qədərki inkişaf strategiyamızda qeyd etdiyimiz kimi, yaxın 5 ildə Ermənistanda Xarici Kəşfiyyat Xidməti yaradılacaq".
Hökumətin proqramı Nazirlər Kabineti tərəfindən təsdiqləndikdən sonra parlamentdə müzakirə olunacaq. Paşinyana görə, parlament müzakirələri gələn həftə baş tutacaq.