300 nəfərin öldürülməsi əmri haradan verilib? -
Niderland məhkəməsindən sensasiyalı qərarlar çıxa bilər
Niderlandda Ukraynanın Donbas regionu üzərində vurulmuş "Boeing" sərnişin təyyarəsi ilə bağlı məhkəmə prosesinə başlanıb.
Xatırladaq ki, 2014-cü ilin iyulunda vurulmuş MH17 reysi ilə uçan təyyarədəki 298 nəfərin hamısı həlak olub. Onlar 10 ölkənin vətəndaşları idilər. Beynəlxalq Birgə İstintaq Qrupunun (JIT) gəldiyi nəticəyə görə təyyarə Rusiya istehsallı "Buk" qurğusundan vurulub.
Bu da bildirilir ki, raket qurğusu separatçıların “Donetsk Xalq Respublikası” adlandırdıqları ərazidəki Snejnoye kəndinin yaxınlığında yerləşirdi.
"Current Time" jurnalının yazdığına görə, istintaqın gəldiyi nəticəyə görə sözü gedən "Buk" qurğusu Rusiyanın Kursk şəhərində yerləşən 53-cü zenit-raket briqadasına məxsusdur və təyyarə vurulmazdan az əvvəl oradan Ukraynaya gətirilmişdi.
Müstəntiqlər bildirirlər ki, bilavasitə raket atəşinin açılmasında dörd nəfərin iştirakı olub. Bunlar aşağıdakılardır:
Rusiya Federal Təhlükəsizlik Xidmətinin (FTX) keçmiş zabiti Iqor Girkin (Strelkov). O təyyarə vurularkən “DXR” separatçılarının “silahlı qüvvələrinin” başçısı vəzifəsini tuturdu;
Rusiya Hərbi Hava Desantı qüvvələrinin keçmiş podpolkovniki Oleq Pulatov. O 2014-cü ilin iyulunda “DXR Baş Kəşfiyyat İdarəsinin (GRU)” 2-ci bölməsinin komandiri idi;
Rusiyalı Sergey Dubinin 2014-cü ildə “DXR Baş Kəşfiyyat İdarəsinin” başçısı olub. O təyyarə vurulub salındıqdan sonra Girkinə (Strelkova) zəng edib və onlar Boeing təyyarəsini vurmuş Buk qurğusunun ərazidən çıxarılaraq Rusiyaya qaytarılmasını müzakirə ediblər;
Ukrayna vətəndaşı Leonid Xarçenko: O da Strelkovla telefonla danışır və Ukrayna qoşunlarının mövqelərinin artilleriya atəşinə tutulmasını əmr edirdi.
Moskva MH17 təyyarəsinin qəzası ilə bağlı bütün ittihamları rədd edir. Rusiya Müdafiə Nazirliyi israr edir ki, "Boeing" qəzaya uğradığı vaxt Rusiyadan Ukraynaya heç bir "Buk" qurğusu keçirilməyib.
Lakin Rusiyanın "The Insider" saytı "Boeing" təyyarəsinin qəzasına dair açıq mənbələrdən informasiyanın toplanmasında iştirak edib və onun redaktoru Roman Dobroxotov əmindir ki, bu iş üzrə müttəhim olanların siyahısı adları çəkilən dörd nəfərlə məhdudlaşmayacaq.
Dobroxotov inanır ki, müttəhimlərin siyahısına hazırda Rusiya Mərkəzi Ordu Dairəsinin baş müfəttişi olan general-mayor Nikolay Tkaçev və GRU-nun yüksək vəzifəli zabiti Oleq Ivannikovu da əlavə etmək lazım gələcək. Bu adamlar "Buk" qurğusunun Rusiyadan Ukraynaya gətirilməsində bilavasitə iştirak ediblər.
Dobroxotov siyahını bir az da genişləndirir:
“Məncə kifayət qədər əminliklə demək olar ki, Putinin keçmiş müşaviri Vladislav Surkov, eləcə də müdafiə naziri Sergey Şoyqu və FTX-nin başçısı Aleksandr Bortnikov da müttəhimlərin siyahısında olacaqlar. Hətta az da olsa belə bir ehtimal var ki, bu prosesdə Rusiya silahlı qüvvələrinin ali baş komandanı Putinin də adı çəkilsin. Biz başa düşürük ki, ağır texnikanın bir dövlətin ərazisindən başqa bir dövlətin ərazisinə aparılması ali baş komandanın əmri olmadan həyata keçirilə bilməz. Bu, fiziki və hüqiqi baxımdan mümkün deyil”.
Dobroxotov düşünür ki, hardasa may ayınadək bu iş üzrə yeni şahidlərin və müttəhimlərin adları çəkiləcək: “Əlbəttə, bu o demək deyildir ki, Putini əli qandallı Niderlanda aparıb müttəhimlər kürsüsünə oturdacaqlar və o orada ifadə verəcək. Hamı başa düşür ki, məhkəməyə nəinki GRU generallarının, hətta "Buk" qurğusunun ekipajındakı adi əsgərlərin də gətirilməsi Rusiyanın siyasi iradəsi olmadan mümkün deyil”.
Dobroxotov deyib ki, Putin hakimiyyətdə qaldıqca bu iradə olmayacaq.
"The Insider" saytı redaktorunun qənaətinə görə bütün hallarda bu işlə bağlı Rusiyaya qarşı yeni sanksiyalar elan oluna bilər: “Mən düşünmürəm ki, bundan sonra hansısa Makron və ya başqa bir siyasətçi indi gəldiyi kimi rahatca Moskvaya gəlib Putinlə əl tutacaq...”. /"Azadlıq" radiosu