Rusiyada ötən həftə 44 günlük müharibənin gedişatına və nəticələrinə həsr olunmuş “Qafqazda fırtına” kitabının təqdimatı keçirildi. 128 səhifəlik kitabda qüvvələr nisbəti, hərbi əməliyyatların xronologiyası, qoşun növlərinin taktikası və s. ətraflı analiz olunub.
 
Rusiyanın Strategiya və Texnologiya Analizi Mərkəzinin direktoru Ruslan Puxovun rəhbərliyi altında həyata keçirilən layihənin redaksiya heyətinə D.Barri, M.Kazalet, S.Markedonov, D.Trenin, A.Lavrov, K.Xas, K.Makienko, R.Puxov, M.Şepovalenko kimi hərbi və siyasi ekspertlər daxil idi.
Paralel olaraq, redaksiya heyətində Q.Derqulyan, L.Nersisyan və A.İsgəndəryan kimi erməni ekspertlər də daxil edilmişdi. Bunun əvəzində, kitabının hazırlanmasında heç bir azərbaycanlı ekspert dəvət olunmayıb.
 
“Qafqazda fırtına” kitabı Ermənistan ordusunun müharibəyə qədər və müharibə gedişində fəaliyyətini obyektiv işıqlandırsa da, Azərbaycan Ordusu ilə bağlı hissədə qərəz və qeyri-obyektivlik hiss olunur. Kitab müəllifləri çalışsalar da, Ermənistana rəğbətini gizlədə bilmirlər və müharibənin gedişatından təəssüf hissi keçirirlər.
 
Bəs obyektivliyə iddialı olan və geniş ictimaiyyətə 44 günlük müharibə barədə obyektiv analiz verməyə iddialı olan layihə rəhbərləri nə üçün 3 erməni ekspertlə yanaşı, Azərbaycandan heç bir hərbi eksperti dəvət etməyiblər?
 
Beynəlxalq Münasibətlərin Təhlili Mərkəzinin (BMTM) İdarə Heyətinin sədri Fərid Şəfiyev bildirib ki, bu qərəzli münasibət ilk belə hal deyil.
Onun fikrincə, “Qafqazda fırtına”nın idarə heyəti həqiqəti bildikləri üçün azərbaycanlı müəllifləri dəvət etməyib:
 
“Bu hal ilk dəfə deyil. Yəni Qərbdə, Rusiyada müəyyən bir nəşrlər çap olunur və Azərbaycan müəllifləri ora dəvət olunmur. Bu halla ən çox Qarabağ müharibəsi zaman və ondan sonrakı vaxtlarda rastlaşmışıq. Yəni yeni bir hal deyil. Bizim mərkəzin cavabı ayrı olacaq və mən indidən demək istəmirəm.

Amma Mərkəz tərəfindən bilavasitə Dağlıq Qarabağla bağlı materiallar hazırlanır. Eyni zamanda xaricdə xarici müəlliflər tərəfindən bu mövzu haqqında müvafiq layihələr həyata keçirilir”.
 
Fərid Şəfiyev yaxın zamanlarda Beynəlxalq Münasibətlərin Təhlili Mərkəzinin “Qafqaz fırtınası” kitabına elmi cavab verəcəyini əlavə edib.
“Hesab edirəm ki, indi onlarla hansısa dava aparmaq mənasızdır. Onlar yaxşı bilirlər ki, belə həssas mövzuda araşdırma aparırlar və ora Azərbaycan müəlliflərini də dəvət etməli idilər. Bunu bilərəkdən etmədilər.

 Bildirim ki, bizim əks tədbirlərimiz elmi sahədə də olacaq. Əvvəlcədən demək istəmirəm, amma xarici müəlliflərin iştirakı ilə nəşrlər olacaq və bu da bizim onlara cavabımız olacaq. Qeyd edim ki, xaricdə olan layihələrin kökündə erməni pulu, donorları var. Ona görə belə layihələrdə azərbaycanlı müəlliflərin dəvətini gözləmək sadəlövhlük olardı”.
 
Fidan İlqar