Sosial şəbəkələrdə rusiyalı mərhum siyasətçi Boris Nemtsovun 2008-ci ildə Rusiyanın gələcəkdə nələrlə üzləşəcəyi ilə bağlı çıxışının görüntüləri yenidən paylaşılıb.

Nemtsovun çıxışını rusiyalı biznesmen, YUKOS-un keçmiş rəhbəri Mixail Xodorkovski də özünün Feysbuk səhifəsində yerləşdirib.

Nemtsov çıxışında qeyd edib ki, rusiyanın özünü Amerika kimi aparması böyük səhvdir və bu səhv ilk növbədə silahlanma uğrunda yarışa gətirib çıxaracaq:
“Hazırda Rusiya silaha 40 milyard dollar vəsait xərcləyir. Bu dövlət büdcəsinin 20%-dir. Tutaq ki, Rusiya bu məbləği iki dəfə artırdı. Bəs onda bu pul hardan götürüləcək?
Təqaüdçüdən, müəllimdən, həkimdən. Bu yolla da Rusiyanın əsas problemi məhz yoxsulluq səviyyəsi artacaq. İkincisi, beynəlxalq təcrid. Yəni Rusiyanın böyük səkkizlikdən çıxarılması, AB ilə Rusiya arasında çox böyük münaqişənin yaranması. Mən bundan əminəm. Aydındır ki, Rusiyaya qarşı sanksiyalar olacaq. Ardınca isə biznes.
Qərb Rusiya biznesini öz işindən uzaqlaşdıracaq. İndi o “Qazprom”u öz işindən uzaqlaşdırır ki, şirkət Qərbdə nələrisə almasın, harasa qoşulmasın. Hesab edirəm ki, “Qazprom” biznes deyil, siyasətdir.
Bu andan sonra isə onlar hesab edəcəklər ki, hər bir xırda rus biznesi siyasətdir. Bununla da biznesə ağır zərbə vurulacaq. Və nəhayət, Rusiya düşmən həlqəsinə düşəndə ölkənin daxilində ksenofobiya güclənəcək”.

Nemtsovun 13 il əvvəl səsləndirdiyi proqnozlar demək olar ki, düz çıxıb. Rusiya son 10 ildə silahlanmaya külli miqdarda böyük maliyyə vəsaiti xərclədi. Neft qiymətlərinin sürətlə düşməsindən sonra rublun çökməsi ölkə iqtisadiyyatına böyük zərbə vurdu. Daha sonra Krımın və Donbasın işğalından sonra Qərb Rusiyaya qarşı böyük sanksiyalar tətbiq etdi.
Xüsusilə, “Qazprom”un layihəsi olan Şimal Axını-2 tamamlanmasına baxmayaraq, ABŞ-ın böyük təzyiqləri nəticəsində fəaliyyətə başlaya bilməyib.

Qeyd edək ki, rusiyalı siyasətçi Boris Nemtsov 2015-ci ilin fevralın 27-də qətlə yetirilmişdi. Nemtsovun qətli ilə bağlı 5 nəfər həbs olunmuşdu./axar.az