Qərb ölkələri öz davranışları ilə Ukraynada gərginləşən vəziyyətdə od üzərinə ancaq yağ tökürlər, Moskva isə onun təhlükəsizliklə bağlı narahatlıqlarına məhəl qoyulmadığını hiss edir və hərəkətə keçməyin vaxtının yetişdiyini düşünür. 
Bu böhranın həllində son nəticədə NATO və Aİ-nin əhəmiyyəti yoxdur, ona görə də Rusiya və Amerika danışıqlar aparmalı olacaq.

Bunu “Daily Express” nəşrinə açıqlamasında britaniyalı politoloq Riçard Sakva bildirib. 
Ukrayna ilə sərhəddə Rusiya qoşunlarının toplanması və Moskvanın gələn ayın əvvəlində müdaxilə etməyi planlaşdırdığı barədə xəbərlər fonunda potensial müharibə qorxuları artır. 
Nəşrin məlumatına görə, Rusiya və ABŞ prezidentləri Vladimir Putin və Co Bayden son virtual görüşlərində böhranı tam neytrallaşdıra bilməyiblər.



Kent Universitetinin Rusiya və Avropa siyasəti üzrə professoru Riçard Sakva “Daily Express”ə eksklüziv müsahibəsində deyib ki, Qərb ölkələri öz davranışları ilə od üzərinə ancaq yağ tökürlər. 
“Son günlərdə baş verən kəskinləşmə tamamilə diplomatiya ilə bağlıdır. Moskva hesab edir ki, 1991-ci ildən bəri onun təhlükəsizlik narahatlığına məhəl qoyulmayıb (bu hissi Yeltsin də bölüşürdü) və indi həlledici məqamın yetişdiyini düşünür”, - deyə Ukrayna məsələsinin kəskinləşməsinin əsas səbəbləri ilə bağlı sualı cavablandıran ekspert qeyd edib.
 
Sakvanın sözlərinə görə, “Ukraynanın məsuliyyətsiz və təhlükəli silahlanması” şəraitində tərəflər nəhayət təhlükəsizlik sahəsində hər hansı yeni razılaşmaya gəlmək üçün indi hərəkətə keçməlidir. Moskva bunu hiss edir və buna görə də keçən həftə ABŞ və NATO ilə saziş layihələri ilə bağlı iki sənədlə çıxış etdi.
O, alyansın Rusiya sərhədləri yaxınlığında təlimlərinin dayandırılmasını və əslində Ukraynanın bloka qoşulmasına qadağa qoyulmasını özündə əks etdirir.
 
Professorun fikrincə, sərhəddə real qarşıdurma baş verərsə, az inandırıcı olsa da, Ukraynanın özü müəyyən addımlar atmasa, Rusiyanın tam müdaxiləsi son dərəcə qeyri-mümkün görünür. "Moskva soyuq müharibənin sonunda qüvvədə olan sazişlərə qayıtmaq istəyir", - deyə analitik düşünür.
 
Rusiyaya qarşı potensial münaqişə və cəza tədbirlərinə qayıdaraq Sakva vurğulayıb ki, beynəlxalq maliyyə ödənişlərinin SWIFT sistemindən ayrılması, müxtəlif embarqolar və digər bu kimi sanksiyalar sərt olacaq, lakin bu, dünya iqtisadiyyatına mənfi təsir göstərəcək. “Və nəzərə alın ki, istənilən addım çinlilərlə birlikdə atılacaq”, - deyə ekspert əlavə edib.
 
Kiyevin təkidlə Ukraynanın NATO-ya qoşulması perspektivlərindən danışan professor xəbərdarlıq edib: “Məncə, əksər ekspertlər Ukraynanın NATO-ya üzvlüyünün yaxın gələcəkdə nəzərdən keçirilməməsi ilə razılaşırlar. Bununla belə, ABŞ-la istənilən ikitərəfli razılaşma sabitliyi poza bilər. Mənə elə gəlir ki, Birləşmiş Ştatlar indi bunu başa düşür - bu yaxınlarda diplomatik fəallığın canlanması da buna sübutdur”.
 
Sakvanın sözlərinə görə, Moskva ilə Vaşinqton arasında böhranın həllində “son nəticədə NATO və Aİ-nin rolu əhəmiyyətsizdir” - hər şeyi ABŞ administrasiyası həll edəcək, “hərənd ki, ona müttəfiqlərini və konqresi öz tərəfinə çəkmək də lazım gələcək”.
 
Professor əmindir ki, Rusiya və ABŞ razılığa gələ bilməsə, bəlkə də müharibə alternativ variant olacaq. O, vəziyyəti "hər bir tərəfin simasını xilas etmək və uçurumdan uzaqlaşmaq üçün bir yol tapdığı" Karib böhranı ilə müqayisə edir və bildirir ki, barışıqdan danışmaq "intihara bərabərdir".
 
“Daily Express”in diqqət çəkdiyi kimi, son vaxtlar Rusiya da getdikcə daha sərt bəyanatlar verir. Lakin Qərb ölkələri fəlakətin qarşısını almaq üçün diplomatiyaya ümid edir. “Əgər onlar yanılırlarsa, ukraynalılar ümid edirlər ki, qanlı və uzun sürən müharibə perspektivi hələ də Rusiya prezidentini iki dəfə düşünməyə vadar edə bilər”, - deyə nəşr yekunlaşdırır./moderator