General həyəcan təbili çalır:
“Rusiya Yaponiyaya qarşı inadla hərbi təqiblər həyata keçirir...”
Yaponiya özünümüdafiə qüvvələrinin Hərbi Hava Qüvvələri kəşfiyyat xidmətinin keçmiş rəhbəri Eydzi Sudzuki Rusiyanın ölkəsinə qarşı inadla həyata keçirdiyi hərbi təqiblər barədə xəbərdarlıq edir.
Xarici KİV bildirir ki, istefada olan general Yaponiyanın “Shukan Gendai” nəşrində dərc olunan məqaləsində yazır: dünyanın harasında hansısa bir hərbi münaqişə baş verərsə, bu, Yaponiya üçün artıq gözlənilməz olmayacaq, çünki Yaponiya özünümüdafiə qüvvələri və Amerika ordusu daim birgə təlimlər keçirir və Rusiyaya istənilən dəyişikliyə hazır olduqlarını nümayiş etdirirlər.
Eydzi Sudzuki həyəcan təbili çalır: Rusiya ordusu Yaponiyaya qarşı inadla hərbi təqiblər həyata keçirir. O yazır ki, oktyabr ayında Yaponiyanı əhatə edən sularda Rusiya-Çin birgə patrulundan sonra Şimal-Şərqi Asiya akvatoriyasında Rusiya və Çinin hərbi mövcudluğu demək olar ki, daimi xarakter alıb.
Dekabrın 14-də Rusiya hərbi radioelektron kəşfiyyat təyyarəsi Oxot dənizindən Yaponiya ətrafı boyunca Sakit Okeana qədər kəşfiyyat uçuşu həyata keçirdi. Ertəsi gün, dekabrın 15-də doqquz təyyarə Yapon dənizindən Oxot dənizi vasitəsilə dörd adanın üzərindən uçaraq Hokkaydo ətrafında dövrə vurub Yaponiyaya doğru istiqamət götürdü.
Dekabrın 15-də Rusiya Müdafiə Nazirliyi “Marşal Şapoşnikov” esminesinin dənizdə sualtı qayıqlara qarşı raket buraxılışı təlimi keçirdiyini açıqladı. Eyni zamanda Rusiya hökuməti Yaponiyanı məlumatlandırdı ki, dekabrın 16-dan sonra Rusiya Kunaşir adasının cənub-şərqindəki sularda artilleriya və raket atəşi təlimləri keçirəcək.
Sudzuki qeyd edir ki, regionda hər dəfə belə təlimlər keçiriləndə Yaponiya Rusiya hökumətinə etirazlarını bildirir, lakin bu təlimlərin bitəcəyinə dair heç bir əlamət yoxdur.
Əksinə, son vaxtlar Yaponiya ətrafındakı dənizdə və hava məkanında belə hərbi təqiblər artmaqdadır. Və Rusiyanın son vaxtlar niyə israrla bu cür hərəkətlər etdiyini başa düşmək üçün Moskvanın təkcə Avropadakı fəaliyyətinə - Ukrayna ilə sərhədə qoşun cəmləşdirməsinə deyil, həm də Rusiya sərhədləri yaxınlığında vəziyyətin gərginləşdiyi Uzaq Şərqdə, o cümlədən Yaponiya ətrafında döyüş hazırlığının artmasına nəzər salmaq lazımdır.
Bununla belə, məqalə müəllifi xəbərdarlıq edir ki, dünyanın istənilən yerində, istər Ukraynada, istər Tayvanda, istər Şimali Koreyada, istərsə də İranda hansısa hərbi münaqişə baş verərsə, bu, artıq Yaponiya üçün gözlənilməz olmayacaq. Yaponiya özünümüdafiə qüvvələri və ABŞ ordusu daim birgə təlimlər keçirir və Rusiyaya istənilən dəyişikliyə hazır olduqlarını nümayiş etdirirlər.
“Mümkün hərbi toqquşmanın qığılcımları hər yerdədir. Üçüncü dünya müharibəsi artıq elmi fantastika sayılmadığından Yaponiyanın öz milli təhlükəsizlik strategiyasını yenidən nəzərdən keçirməsinə və ölkənin yeni milli müdafiə strategiyasını formalaşdırmaq üçün təcili tədbirlərə ehtiyacı var", - deyə Eydzi Sudzuki fikrini yekunlaşdırır.
Miraslan