Çox hörmətli İTV rəhbərliyi, bu üç deputat üçün xüsusi verilişlər hazırlayın...-
Kubra Məhərrəmova yazır...
Ölkəmiz əmin-amanlıqda, dövlətimiz güclü olsun. Həm iqtisadi, həm siyasi mənada.
Arzu edirəm ki, şirniyyat dükanında mühafizəçidən tutmuş, icra hakimiyyətində çalışan böyük məmurlara qədər hamı gələn ildən halal işləsin, pul silməkdən, oğurluq etməkdən çəkinsin.
Ən böyük arzum da odur ki, deputat əmilər mandatından istifadə edərək onu-bunu əzməsin. Və unutmasınlar ki, uzağı beş illik “ömürləri” var. Onu da bir işə sərf etsinlər. Daha obyekt işlətməyə yox.
Elə deputat əmilər var ki, mən gözümü açandan oturublar Milli Məclisdə, gördükləri bir iş yoxdur. Amma onları tənqid edən kimi daş atıb başlarını tuturlar. Hələ üstəlik ona-buna da hücum çəkirlər.
Elə bu gün millət vəkilləri Fazil Mustafa, Siyavuş Novruzov və Fəzail Ağamalı İctimai Televiziyanı ağ yuyub, qara səriblər.
Fazil Mustafa bildirib ki, İTV-nin Yayım Şurasının seçilən üzvləri kölgədə qalır:
“İsmayıl Ömərovun vaxtında televiziya daha uğurlu funksional işini görürdü. Sonra isə bərbad günə düşdü. Əgər İTV funksiyasını yerinə yetirməyi bacarsaydı, “Media haqqında” qanun da bu qədər müzakirəyə səbəb olmazdı.
Açığı, mən İsmayıl Ömərovun vaxtında İctimai Televiziyada fövqəladə bir şey görməmişəm. Büdcədən pul alıb, efiri doldurublar.
İkincisi də, belə çıxır ki, “Media haqqında” qanunun yaranmasına səbəb İctimai Televiziya və onun fəaliyyətidir?
Məncə ölkədə ən kor adam belə İctimai Televiziyanın necə yüksək səviyyədə verilişlər təqdim etdiyini görür. Vətən müharibəsində İctimai Televiziyanın necə peşəkar çalışdığına şahid olduq.
Ölkədə baş verən sosial-ictimai hadisələri işıqlandırır.
Yox, əgər sizin kimi deputat əmiləri tənqid edibsə və bu sizin şəstinizə toxunubsa, bu, ayrı məsələ.
Deməli məsələ şəxsidir. Şəxsi məsələləri isə deputat kürsüsündən həll etmirlər. Ya tənqiddən nəticə çıxarıb daha yaxşı iş görürlər, ya da tənqid qeyri-obyektivdirsə, bunu aydınlaşdırırlar.
Daha sonra Fazil Mustafa bildirib ki, İTV büdcədən xeyli vəsait alır, cəmiyyətin işinə yararlı olsun.
Əvvəla diqqətinizə çatdırım ki, İctimai Televiziyanın yeni komandasının gördüyü iş sizin kimi millət vəkillərinin gördükləri işlərdən dəfələrlə yararlıdır cəmiyyət üçün. Əgər siz, biz cəmiyyətin, xalqın dərdini çəkiriksə, biz xalq olaraq İctimai Televiziyadan razıyıq. Bizə görə narahat olmayın.
Bir vaxtlar Fazil Mustafa yaman dini mövzulara baş qoşurdu. Dinşünas olmaq arzusunda idi. Sonra nəsə yolunda getmədi, ya da sərf etmədi.
Bu gün də yəqin yeni əyləncəsi mediaya daş atmaqdır. Çıxışının sonunda da bildirib ki, “Necə olur ki, parlamentlə bağlı müzakirə verməyi bu televiziya özünə sığışdırmır.
Siz kimsiz ki?! Ümid edirəm ki, tənqidlərdən nəticə çıxaracaqsınız”.
Baxırsan ki, o boyda millət vəkildir, dediyi sözə bax.
***
Deputat Siyavuş Novruzov da bildirib ki, “Deputatlar ictimaiyyətin maraqlarını təmsil edir və onlara uyğun qanunları qəbul edir. İTV-də bu fəaliyyət öz layiqincə həllini tapmır”.
Bir nəfər çıxsın və desin ki, Siyavuş Novruzov nə vaxt və harada ictimaiyyətin maraqlarını təmsil edib. Mənim yadıma gəlmir. Kəşfiyyatçı olması yadıma gəlir, karantində toya getməyi yadıma gəlir, sonra gülməli söhbətlər etməyi də yadıma gəlir.
Amma ictimaiyyətin maraqlarını təmsil etməsi yadıma gəlmir. Və bu kimi hadisələri də İctimai Televiziya işıqlandırıb yayıbsa, keçmiş kəşfiyyatçının xoşuna gəlməyib. Bunu da anladıq.
***
Millət vəkili Fəzail Ağamalı da tez özünü söhbətə çatdırıb: “Biz düşünürük ki, deputat olaraq onları məhkəməyə verməyək. Ancaq siz az qala deputatları təhqir edirsiniz. Bunlar yığışdırılmalıdır. Bilirsiniz ki, məni “3D” verilişinə dəvət etmişdilər, getmədim. Ondan sonra məni bir daha bu televiziyaya çağırmırlar”.
Deyirəm Allah sizdən razı olsun, necə də genişürəkli, mərhəmətli adamlarsınız.
İctimai Televiziyada sizin üçün heç nə yox, bir saatlıq tərif edən, həyat-yaradıcılığınızdan ibarət ədəbi-bədii gecə keçirsin, veriliş hazırlasın, şeir desinlər sizin üçün, mahnı oxusunlar. Çünki bu cür xəcalətin altından çıxmaq mümkün deyil. Qardaş-qardaşa etməz bu yaxşılığı.
Çox hörmətli İctimai Televiziyanın rəhbərliyi, sizdən acizanə xahiş edirəm ki, bu üç deputat üçün xüsusi verilişlər hazırlayın. 10 il əvvəl olduğu kimi tərifləyin bunları, qoyun sevincdən bərq vursunlar. Sevinsinlər, alqışlasınlar sizi. Biz də pultun düyməsini basıb keçək türk-rus kanallarına və deyək ki, bizim kanallar dəyişmir də.
Kubra MƏHƏRRƏMOVA