Son günlər ciddi qalmaqallarla gündəmə gələn Milli Məclisin üzvü Ramil Həsən teleqraf.com-a müsahibə verib. Globall.az olaraq həmin müsahibənin rezonans doğurduğunu nəzərə alıb ixtisarla dərc edirik. Beləliklə, oxuyun və görün ki, Milli Məclisdə kimlər var.

- Diplomatiya sahəsində çalışmısınız, fövqəladə və səlahiyyətli səfir olmusunuz. Maraqlıdır, niyə diplomatiyadan ali qanunverici orqana keçid etmək fikrinə düşdünüz? Bu, YAP rəhbərliyinin seçimiydi, yoxsa özünüzün?..

- Ümumiyyətlə, 1995-ci ildən YAP-ın sıralarında fəaliyyət göstərirəm və bununla fəxr edirəm. 25 ildir siyasi proseslərin içərisindəyəm. Hər zaman qeyd etdiyimiz açıq və aydın bir fikir var: dövlətimizə və ölkə rəhbərinin həyata keçirdiyi siyasətə uyğun fəaliyyət göstəririk. Ağlımız, qabiliyyətimiz, məntiqimiz və imkanlarımızla ancaq dövlətimizə və millətimizə qulluq edirik. Bu minvalla mənim bir müddət ölkə daxilində, sonra ölkə xaricində fəaliyyət göstərməyim, yenidən ölkənin qanunvericilik orqanında fəaliyyət üçün geri qayıtmağım, bütün bunlar hamısı ölkə rəhbərliyinin vermiş olduğu qərarların nəticəsidir. Ona görə də bunu müzakirə etməyin tərəfdarı deyiləm. Sadəcə olaraq partiya rəhbərliyinin verdiyi təlimatları yerinə yetirmişəm. Bundan sonra da cənab Prezidentin verəcəyi təlimatları yerinə yetirəcəyəm.

- Milli Məclisin dünənki iclasında viza rejiminin sadələşdirilməsi ilə bağlı çıxışınız, xüsusilə Türkiyə ilə Azərbaycan arasında viza rejiminin ləğvini təklif etməyiniz müzakirələrə səbəb olub. Məgər siz Türkiyə ilə Azərbaycan arasında viza rejiminin ləğv olunduğunu bilmirsiniz?

- Azərbaycan Prezidentinin qətiyyəti və iki qardaş ölkə arasında olan mükəmməl münasibətlər ona gətirib çıxardı ki, keçən il iki ölkə arasında vizadan azad, sadələşdirilmiş rejimə keçildi. Yəni Türkiyə vətəndaşları Azərbaycana vizasız gəlib-gedə bilərlər. Bununla bağlı hər hansı problem yoxdur. Mənim dünən demək istədiyim o idi ki... Əslində əvvəl 15 gün müraciət müddəti qoyulduğu üçün Azərbaycana səfər etmək istəyən turistlər, başqa insanlar hava limanında gəlib hər hansı problemlə rastlaşmamaq üçün çox zaman səfirliklərə və konsulluqlara üz tuturdular. Azərbaycanın innovativ prosesləri tətbiq edib ASAN xidmətin asan viza verməsi nəticəsində ölkəmizə turist axını çoxaldı. Dünən demək istədiyim məqam onunla bağlı idi ki, miqrasiya qaydalarına düzəlişlə Azərbaycana səfər etmək istəyən şəxslər artıq 3 iş günündə səfirliklər və konsulluqlarımızdan viza alacaqlar. Viza üçün müraciətin müddətinin 15 gündən 3 günə endirilməsi turist axınını daha da sürətləndirəcək. Bu, irəliyə doğru atılan addımdır. Hər birimiz hökumətdən gələn bu təklifi dəstəkləməliyik. Çünki xarici ölkə vətəndaşlarının səfirliklərə müraciət etdiyi zaman artıq 15 gün gözləməsinə ehtiyac qalmayacaq. Bu, mütərəqqi bir addımdır. Bunun Türkiyə ilə əlaqəsi yoxdur. Mən misal olaraq Türkiyənin adını çəkirdim ki, Türkiyə Azərbaycana səfər etmək istəyən minlərlə turistin tranzit yoludur. Bildiyiniz kimi hər bir vətəndaş tranzit olaraq istifadə etdiyi ölkədə və yaxud yaşadığı dövlətdə diplomatik korpusa vizanın rəsmiləşdirilməsi ilə bağlı müraciət edə bilər. Bu yeniliyi qəbul etməklə Azərbaycan dövləti ASAN-ın sürətli elektron viza xidmətinə ikinci bir dəstək olaraq diplomatik missiyalarda da vizaların elektron formada 3 gün ərzində verilməsi qərarı qəbul etdi.

- Sizin sosial məsafənin qorunması məqsədilə parlamentin iclasında qonaqlar üçün nəzərdə tutulan yerdə əyləşdirildiyinizə görə Milli Məclisin rəhbərliyinə şikayət etməyiniz barədə eşitdik. Bildirmisiniz ki, niyə sizi YAP üzvü olduğunuz halda qabaq cərgədə yox, qonaqlar üçün nəzərdə tutulan arxa tərəfdə əyləşdiriblər? Bu, doğrudurmu? Sizcə, ön cərgələrdə yaşlı deputatların əyləşdirilməsi daha məqbul deyilmi?

- Bunlar hamısı boş şayiələrdir, belə şey yoxdur.

- CBC telekanalında rus dilində müsahibəniz ətrafında da sosial şəbəkələrdə geniş müzakirə açılıb. Bir çoxları belə fikirlər səsləndirir ki, niyə deputat rus dilini mükəmməl bilmədiyi halda bu dildə müsahibə verib. Bu müzakirələrlə yəqin ki, tanışsınız. Münasibətiniz necədir və özünüzün rus dili biliklərinizi qənaətbəxş sayırsızmı?

- Bu məsələyə hər hansı şərh vermək istəmirəm. Bu məsələ ilə bağlı bəyanatım var, məncə, artıq yetərlidir.

- Bəyanatınız mediada və sosial şəbəkələrdə yayılıbmı? Çünki bu yöndə müzakirələr fonunda açıqlamanıza rast gəlmədim...

- Artıq rəsmi bəyanat vermişəm. Əlavə şərhə ehtiyac duymuram... Təşəkkür edirəm.

- Ümumiyyətlə, hansı xarici dilləri bilirsiz?

- Bununla bağlı danışmağa ehtiyac yoxdur. Fəaliyyətimlə bağlı axtarış etsəniz, internetdə istənilən qədər məlumat əldə edə bilərsiz. Yutubda kifayət qədər fəaliyyətim, çıxılarımla bağlı görüntülər var. İndi mənim şəxsi məsələlərimin ön planda qabardılmasının heç bir əhəmiyyəti yoxdur. Hər birimiz birləşib birlikdə koronavirus bəlasından qurtulmağa çalışmalıyıq.

- Eləcə də Moldovada uşaq oğurluğunda iştirakınız və bununla bağlı haqqınızda cinayət işi açılması barədə də adınız hallanır. Son günlər yayılan bu iddialar nədən qaynaqlanır? Söhbət hansı uşaqdan gedir? Bütün hallarda uşaq oğurluğu ciddi ittihamdır, buna cavabınız maraqlıdır...

- Bir daha qeyd etmək istəyirəm ki, şəxsi məsələlərlə bağlı danışmıram...