Emin Əmirullayevin daha bir təhsil müəssisəsindəki biabırçılıqların həddi-hüdudu bilinmir.

  Elvira Zeynalova: “Bir neçə gün bundan əvvəl 9-cu sinifə aid jurnalın yerində olmadığını gördüm və bu barədə direktor müavini Səbinə İmamverdiyevadan səbəbini soruşdum. O halda o, rəhbər şəxsə yaraşmayan tərzdə, yüksək tonla üstümə qışqırdı və onun bu hərəkəti əsəblərimə çox böyük təsir etdi”

  Bu günlərdə redaksiyamıza Gəncə şəhər İsmət Qayıbov adına 1 nömrəli tam orta məktəbin müəlliməsi Zeynalova Elvira Oruc qızının Azərbaycan Respublikasının Prezidenti İlham Əliyev cənablarına, Azərbaycan Respublikasının Birinci vitse-prezidenti Mehriban xanım Əliyevaya, Elm və Təhsil naziri cənab Emin Əmirullayevə, İnsan Hüquqları üzrə Müvəkkil (Ombudsman) Səbinə xanım Əliyevaya, Dövlət Təhlükəsizlik Xidmətinin rəisi cənab Əli Nağıyevə, Gəncə – Daşkəsən Regional Təhsil İdarəsinin müdiri cənab Anar Qədiməliyevə, Milli Məclisin deputatı cənab Etibar Əliyevə  yazmış olduğu şikayət ərizəsinin bir surəti daxil olub. Elvira Zeynalova yazdığı ərizəsində qeyd edir: “Uzun müddətdir ki, mən Gəncə şəhər İsmət Qayıbov adına 1 nömrəli tam orta məktəbdə ingilis-dili müəlliməsi işləyirəm. Bir müddət bundan öncə bu məktəbdə direktor əvəzi vəzifəni daşıyan Nüşabə Məmmədova ilə bağlı aidiyyatı dövlət qurumlarına, məktəbin idarə olunmasında yol verilən ciddi nöqsanlar, təhsilin təşkili sahəsindəki hərc-mərcliklər, qol qoyulan saxtakarlıqlar, rəhbərlik tərəfindən mənə qarşı göstərilən qərəzli münasibətin varlığı və qanunsuz cəza tədbirlərinin verilməsi və s. haqda şikayət ərizəsi yazmışdım. Təəssüflər olsun ki, şikayət ərizəsində qeyd etdiyim faktlarla bağlı lazımi araşdırmaların araşdırılması, rəhbərliyin əməllərinə hüquqi qiymət verilməsi əvəzinə, məhz mənə qarşı göstərilən təzyiqlər daha da artmağa başladı. Etdiyim şikayət əsasında məktəbə GDRTİ-nin Şəhriyar adlı əməkdaşı gəldi və ərizə yazdığıma görə o, məni günahlandırdı. Bu şəxs ərizəmdə qeyd etdiyim faktların heç biri ilə araşdırma aparmadı. Hal-hazırda  GDRTİ-də dil-ədəbiyyat fənni üzrə metodist vəzifəsində çalışan, eyni zamanda direktor əvəzi Nüşabə Məmmədovanın yaxın qohumu olan Qənirə müəllimə isə, bir neçə gün bundan əvvəl iş otağıma gəldi və o, etdiyim şikayətləri ört-basdır etməyə çalışdı. Hesab edirəm ki, yazdığım şikayət ərizəsində qeyd olunan faktları ilk növbədə təhsil idarəsinin müdiri müavini və Gəncə səhər üzrə təhsil sektorunun müdiri, yaxud da kadr məsələləri üzrə inspektor vəzifəsini daşıyan İqbal Kərimov araşdırmalı idi. Bir neçə gün bundan əvvəl 9-cu sinifə aid jurnalın yerində olmadığını gördüm və bu barədə direktor müavini Səbinə İmamverdiyevadan səbəbini soruşdum. O halda o, rəhbər şəxsə yaraşmayan tərzdə, yüksək tonla üstümə qışqırdı və onun bu hərəkəti əsəblərimə çox böyük təsir etdi. Artıq Nüşabə Məmmədova vəziyyəti eləbir həddə gətirib çatdırıb ki, valideyinlər onun vasitəsilə mənə təzyiq edirlər. Hətta bu azmış kimi, mobil telefonuma hədə-qorxu mesajları da yazırlar. Belə bir səbəblər üzündəndir ki, bu gün sağlamlığım təhlükə qarşısındadır. Bir neçə gün bundan əvvəl mənə qarşı göstərilən təhqir və təzyiqlər üzündən vəziyyətim çox pisləşdi. Hətta, elə bir hal yarandı ki, məktəbə təcili-tibbi yardım briqadası cağırmaq məcburiyyətində qaldım. Faktdır ki, Gəncə şəhər İsmət Qayıbov adına 1 nömrəli tam orta məktəbdə baş verən  özbaşınalıqlar, haqsızlıqlar və s. gündəngünə daha şiddətli hal alır”.

 Baş verənləri təhlil edib belə qənaətə gəlmək olar ki,  direktor əvəzi Nüşabə Məmmədovanın Gəncə şəhər İsmət Qayıbov adına 1 nömrəli tam orta məktəbdə həyata keçirdiyi idarəçilik,  sanki “dərə xəlvət, tülkü bəydir”  prinsipi ilə həyata keçirilir. Amma onu da unutmaq olmaz ki, biz bu gün 21-ci əsrdə yaşayırıq və tülkünün bəy olması çoxdan keçib. Ona görə də düşünürük ki, GDRTİ-nin rəhbərliyi bu təhsil müəssisəsində yaşanan biabırçılıqlara hansısa maraqlar çərçivəsində göz yumsa da, Təhsil Nazirliyinin rəhbərliyi Nüşabə xanımın qol qoyduğu əməllərə,  baş verən biabırçılıqlara güzəştə getməyəcək. Yazıda adı çəkilən hər kəsin mövqeyini dinləyə bilərik.

Mövzuya qayıdacağıq.