GDRTİ-i rəhbərliyinin təəccüb doğuran addımları nələrdən

Gəncə şəhər İsmət Qayıbov adına 1nömrəli tam orta məktəbin müəlliməsi Zeynalova Elvira Oruc qızının “GLOBALL” onlayn ictimi -siyasi qəzetinin redaksiyasına təqdim etdiyi müraciətin məzmunu ilə tanış olduqda, şoka deyil, birbaşa “şökə” düşməli olduq. Çünki, təqdim olunan müraciətin məzmunundan bəlli olur ki, “şökə” düşməyimizin kifayət qədər əsasları var. O da hər kəsə məlumdur ki, Azərbaycan Respublikasının Prezidenti İlham Əliyev cənabları 29 sentyabr 2022-ci il tarixdə 2023-cü ilin ölkəmizdə “Heydər Əliyev İli” elan edilməsi haqqında Sərəncam imzalayıb və bu sərəncam Ulu Öndərin böyük şəxsiyyət olmasına, onun dövlətimizin və xalqımızın tarixində xüsusi rola malik olmasına verilən qiymətdir. Faktdır ki, Azərbaycan xalqı yeni əsrə, yeni minilliyə Heydər Əliyev zəkasının işığında qədəm qoymuşdur. Bundan əlavə, ölkəmizdə 2023-cü ilin “Heydər Əliyev İli” elan edilməsi, cəmiyyətin bütün təbəqələri tərəfindən sevinclə qarşılanır. Bir sözlə, Ulu Öndərin dövlətimizin və xalqımız qarşısındakı xidmətləri hər an, hər gün gözlərimiz önündədir. Qeyd edək ki, ölkə rəhbəri tərəfindən imzalanmış Sərəncam, bir daha dahi şəxsiyyətin fəaliyyətinin ayrı-ayrı istiqamətlərinin dərindən araşdırılmasına, zəngin irsinin geniş təbliğinə lazımi imkanlar yaradacaq.

    Bütün bunlara baxmayaraq, Gəncə şəhər İsmət Qayıbov adına 1 nömrəli tam orta məktəbin müəlliməsi Elvira Zeynalova redaksiyamıza təqdim etdiyi müraciətində qeyd edir ki, “Möhtərəm Prezidentimizin imzaladığı Sərəncamdan sonra, Gəncə şəhərinin ümumtəhsil məktəblərində 2023-cü ilin “Heydər Əliyev İli” elan olunması ilə əlaqədar keçirilən kütləvi tədbirlər zamanı, bir çoxları kimi mən də müəyyən maneələrlə üzləşməli oldum. Bir neçə gün bundan öncə möhtərəm Prezidentimizə yazdığım müraciətimdə qeyd etmişdim ki, hər il Heydər Əliyevin doğum günü ərəfəsində geniş anım tədbirləri keçirmişəm. 2023-cü il yubiley ili olduğu üçün, Heydər Əliyevlə bağlı daha möhtəşəm tədbir hazırlasam da, Gəncə şəhər İsmət Qayıbov adına 1 nömrəli tam orta məktəbdə direktor vəzifəsini icra edən Nüşabə Məmmədova və onun müavini Səbinə İmamverdiyeva, nəinki keçirdiyim tədbiri bəyənib alqışladılar, hansısa formada  dəstək göstərdilər, əksinə müxtəlif bəhanə və vasitələrlə mənə maneçilik yaratmağa çalışdılar. Bir sözlə, onlar bu gün də məni kollektiv və valideyinlər arasında nüfuzdan salmağa çalışırlar, eyni zamanda mənə qarşı mənəvi-psixoloji təzyiq göstərməkdən də əl çəkmirlər. Hətta, onlar saxta yolla məni cəzalandırmaq qərarına gəlib, heç bir əsas olmadan mənə töhmət də verdilər. Bu barədə Gəncə Daşkəsən Regional Təhsil İdarəsinə (GDRTİ) yazılı şəkildə müraciət etsəm də, təəssüflər olsun ki, bu qurumun rəhbərliyi müraciətimi susqunluqla qarşıladı və etdiyim müraciət əsasında heç bir tədbir görmədi. Bundan sonra, GDRTİ-nin tabeliyində fəaliyyət göstərən 43 nömrəli məktəbdə keçirilən tədbirə qarşı, bu qurumun rəhbərliyinin münasibəti tam şəkildə mənə aydın oldu. O halda ortaya belə bir sual çıxır ki, görəsən doğrudanmı GDRTİ-nin rəhbərliyi, möhtərəm Prezidentin imzaladığı Sərəncama, Ulu Öndər Heydər Əliyevin Azərbaycan xalqı və dövləti qarşısındakı xidmətlərinə əhəmiyyət vermir?”

     Bəli, baş verənləri təhlil edib belə qənaətə gəlmək olar ki, GDRTİ-nin rəhbərliyi ilə bərabər, Gəncə şəhər İsmət Qayıbov adına 1 nömrəli tam orta məktəbdə direktor vəzifəsini icra edən Nüşabə Məmmədova və onun müavini Səbinə İmamverdiyeva, bu gün öz düşüncə tərzlərinə uyğun addımlarını atıb, bəlli yanaşmalarını ortaya qoyurlar. Çox təəssüf! Qarşı tərəfində mövqeyini dinləyə bilərik.

Mövzu diqqətimizdədir.

Mehriban ƏZİZQIZI