"Nikol Paşinyan başa düşür ki, artıq oyunları sona yetdi" -
RƏY
"Nikol Paşinyan başa düşür ki, artıq oyunları sona yetdi. Hətta bəyan etmişdi ki, Rusiya onunla üzlüşə bilərdi. Çünki Rusiya da bu vəziyyətdə Ermənistana kömək etmək istəmir. Gəlib sərhədlərimizdə qışqırdılar, öz evlərinə qayıtdılar. Paşinyan təkləndi. Hətta müxalifət qüvvələri ona qarşı mitinq təşkil etmişdi. Paşinyan da yeni bəyanatlarla çıxış edir ki, hakimiyyətdə qalsın, onu hakimiyyətdən atıb tullamasınlar. Çünki başa düşür ki, Qarabağı itirdi və onu dəstəkləyən konkret güclü bir qüvvə yoxdur, bütün çabalamaları sona yetir..." Globall.az bildirir ki, bu sözləri Pravda.az-a müsahibəsində politoloq, sabiq diplomat Fikrət Sadıqov deyib. F.Sadıqov Araik Arutunyanın istefası fonunda baş verənləri belə şərh edib: "Arutunyan qaçıb getdi, o da başa düşdü ki, belə bir şəraitdə hərbi xuntaya rəhbərlik etmək mümkün deyil. Qarabağdakı qondarma qurumun özündə də Ruben Vardanyan və digərləri buna qarşı çıxırlar. Beləliklə, başa düşdü ki, qaçmaq vaxtıdır, bundan sonra heç nəyə nail ola bilməz. Gördü ki, artıq erməni ailələri, Xankəndi "meri"nin ailəsi də Qarabağdan qaçdılar. Faktiki bütün bunlar hərbi təzyiqimizin nəticəsidir. Arutunyan anladı ki, Ermənistan ona köməklik etməyə qadir deyil. Belə bir şəraitdə onun başqa çıxış yolu da yox idi. Bunların artıq hakimiyyətdən getmə prosesi başlandı.Onların yerinə kimin gələcəyi isə hələlik məlum deyil. Hər halda yeni gələn Azərbaycanla danışmalıdır. Dialoq olmasa, heç bir nəticə olmayacaq". F.Sadıqov proseslərdə Rusiyanın rolunu belə dəyərləndirib: "Aydın məsələdir, Rusiya başa düşür ki, regionda mövqeyi itirmək olmaz. Köçəryan-Sarkisyan cütlüyünün dayaq nöqtəsi Ermənistandır. Digər tərəfdən isə görünən budur ki, Köçəryanla Sarkisyanın tərəfdarları o qədər də çox deyil. Çünki erməni xalqı da Qarabağ "klanı"ndan artıq yorulub. Başa düşürlər ki, Vətən müharibəsindən sonra bu qədər itki verən Ermənistanın Azərbaycanla yenidən müharibə aparmağa gücü yoxdur, gücü çatmayacaq. Ermənistanda artıq səhnəyə başqa qüvvələr gəlir. Digər siyasi partiyalar, siyasi qüvvələr. Köçəryanla Sarkisyan ancaq onlarla birləşib nəsə edə bilərlər. Əlbəttə, Rusiya da öz oyununu oynayacaq. Bu vəziyyətdən çox məharətlə istifadə edəcək. Paşinyanı hakimiyyətdən götürsələr, çalışacaq ki, öz adamını onun yerinə gətirsin. Rusiya başa düşür ki, Paşinyan gedirsə, deməli, öz mövqelərini möhkəmləndirmək lazımdır".