Tanınmış tibb alimi, professor, həkim Adil Qeybulla Milli Məclisə hansı biabırçı yolla təyin edildiyi hər kəsə bəlli olan Etibar Əliyev tərəfindən sosial şəbəkədə ünvanına deyilmiş "hədyan" fikirlərə münasibət bildirib. Globall.az professorun reaksiyasını olduğu kimi dərc edir.

"Dəyərli dostlar!
Sosial şəbəkələri izləməyə yetərincə vaxtım olmadığımdan mənə ünvanlanan bəzi suallar və rəylər haqda vaxtında məlumat ala bilmirəm. Bu gün mənə Etibar Əliyev adlı saxta millət vəkilinin şəxsimə yönələn hədyanlarını göstərdilər. Qeybət və şantaj xarakterli bu cür səviyyəsiz statusa bəlkə də əhəmiyyət verməzdim.

Lakin Mehman Hüseynovla bağlı səslənən həqarətə heç susa bilmərəm. Mehman Hüseynov müstəqil Azərbaycan demokratiyasının parlaq simalarından biridir. O bütün gənclik həyatını siyasi mənsubiyyət daşımadan cəmiyyətin eybəcərliklərinin, məmur özbaşınalıqlarının, korrupsiyanın ifşasına həsr etmiş səmimi mübarizdir. Belə bir dəyərli gənc bloqqerin indiki sağlıq durumunda onu səviyyəsiz adlandıran birisinə nə ad vermək olar?
Universitet kabinetlərində reketçiliklə nəzir yığan, seçkidə Mehman Hüseynovun səslərini oğurlayan, “xlamidiyalı bülletenlərin” sehrli gücü ilə deputat yapılan birisinin Mehman bəyi təhqir etməsi cəmiyyətdə mənəvi dəyərlərin xeyli aşınmasından xəbər verir. Normal cəmiyyətdə belə birisini daş-qalaq edərdilər...


Mən söyüş ritorikasının həmişə əleyhinə olmuşam. Amma Etibar Əliyev hələ də anlaya bilmir ki, ona yönəlik hücumlar seçkilərdən sonrakı münasibətin ifadəsidir. İnsanlar öz nifrətini ifadə etmək üçün fürsət gözləyirdilər, fürsət üçün ipucunu isə o özü verdi. Fikir verin. Etibar Əliyevin bir statusuna insanlar necə reaksiya verdilər. Mehman Hüseynovun xəstəliyi ilə bağlı cəmiyyətin maddi və mənəvi dəstəyini də özünüz gördünüz. Etibar Əliyev, bu barədə düşünsə daha faydalı olar.

O ki qaldı mənim estetik cərrahlıqla məşğul olmağıma ona məmim rəsmi hüququm var. Aşağıda təqdim etdiyim sənəd Rusiya diplomdan sonrakı Tibb Akademiyasının diplomudur. Mən orada əlavə təhsil almışam. Dəyərli sənərkarımız Flora xanım Kərimovanın haqqında deyilənlərə gəldikdə, onun Funikulyorda qolundan aldığı ağır travma məhz mənim və məhşur travmatoloq, İlizarovun tələbəsi Ələkbər Həmidovun iştirakı ilə tam funksional bərpa ilə uğula müalicə edilib. Gözünün əməliyyatı isə Etibar Əliyevin özünə doğma saydığı birisi tərəfindən icra edilmişdi. Etik səbəblərdən ad çəkmirəm və detallara da varmaq istəmirəm. Hörmətli Flora xanım özü məsləhət bilərsə, məsələyə aydınlıq gətirər.

Bəli, dostlar! Karl Marksın təbirincə desək, “Cərəyanlar haradan gəlir”, - mənə bəllidir.

Bu adamı Milli mahiyyətindən xeyli aralı düşmüş Məclisə daşıyan səlahiyyət sahiblərinə məsləhətim odur ki, fizionomiyası istehza doğuran bu zatın ipini bir az yığışdırsalar yaxşı olar. 

Həmin Etibar Əliyev yazır ki, mənə həkim olaraq heç vaxt müraciət etməz. Mən isə bəyan edirəm ki, veterinarlıqla məşğul deyiləm. Etibar Əliyev yazdığı sicilləmədə özünü elmi publisistikanın banilərindən biri hesab edir (lütfən mətnə baxın). Bu məsələdə dostlar, mənə diaqnoz aydındır, amma psixiatrlar rəy bildirsə daha doğru olar.

P.S. Bu günkü cəmiyyətin ümid yeri, avanqardı yalnız vətəndaş mövqeyi, iradəsi ortaya qoya bilən insanlar ola bilər. Bu insanları isə Etibar kimilərindən sadə insanlarımız müdafiə etməli, qorumalıdır. Mən professor Cəmil Həsənlini Azərbaycanın ən ünlü tarixçisi sayıram, çünki dəyərli Cəmil müəllimin istedadını mübarizlik, əzmkarlıq və vətəndaş mövqeyi tamamlayaraq onu bütöv şəxsiyyətə çevirib. Məhz onun yazdığı tarix daha səmimi tarixdir. Onu digər tarixçilərin fövqünə qaldıran da məhz bu nəsnələrdir. Bu cür insanlara dəstək olmalıyıq.
Vətəndaş mövqeyi olmayan tarixçinin yazdıqları isə mahiyyət etibari ilə “düzəltmə” tarixdir..."

Hörmətlə,
Adil Qeybulla

Globall.az

REDAKSİYADAN: 15-20 kitab oxuyub, sonra hər hansı yazıda oxuduğu kitablardan sitat gətirmək həmin yazının elmi publisistika olması demək deyil. Üstəlik də "Azərbaycanda elmi publisistikanın banisi" heç demək deyil. Bu iddiada olmaq... olsa-olsa cızmaQaraçının iddiasının ağlından xeyli yekə olmasıdır.