İranda son günlərdə siyasi vəziyyətin gərginləşməsi və radikal media qurumlarının Prezident Məsud Pezeşkiana qarşı kampaniyaya başlaması, həmçinin tanınmış din xadiminin müəmmalı ölümü ölkədə ciddi daxili çəkişmələrin getdiyini göstərir. Prezident seçkilərindən sonra siyasi elita daxilində aydın şəkildə parçalanma müşahidə olunur.

Yaxın Şərq üzrə ekspert Pərviz Əliyev hesab edir ki, bu proseslər post-Xamenei dövrünə hazırlıq fonunda baş verir və artıq real qarşıdurma mərhələsinə qədəm qoyulub.

Ekspert bildirir ki, son bir həftədir İranın daxilində gərgin bir ab-hava hökm sürür. Onun sözlərinə görə, 12 günlük savaşdan sonra İran siyasi elitasında parçalanma o qədər su üzünə çıxıb ki, artıq tərəflər qan axıtma nöqtəsinə çatıblar.

Əliyev vurğulayıb ki, xüsusilə Rəfsəncani klanı, başda Həsən Ruhani ilə Həsən Xomeyni olmaqla, Qum şəhərinə səfər edərək bir sıra ayətullahlarla görüşüblər. Bu xəbərin mediada yayımlanmasından dərhal sonra İranın Qum şəhərində yerləşən və birbaşa Xameneiyə bağlı olan “Keyhan” qəzeti Prezident Məsud Pezeşkianı satqınlıqda və ölkəni ABŞ və İsrailin təsirinə verməkdə ittiham edib.

Ekspert qeyd edir ki, qəzet eyni zamanda Pezeşkianın Azərbaycan səfərinə toxunaraq onu Prezident İlham Əliyevdən guya İsrailin Azərbaycandakı bazalarının çıxarılmasını tələb etmədiyi üçün günahlandırıb. Maraqlı məqam ondan ibarətdir ki, bu kampaniya məhz Ruhaninin Qum şəhərinə səfərindən bir gün sonra başlayıb. P.Əliyev hesab edir ki, bu, Xameneinin Ruhaninin son addımlarından ciddi şəkildə narazı olduğunu və onu dolayısı ilə “xəyanətdə” ittiham etdiyini göstərir.

Ekspert əlavə edir ki, Ruhani gözləmə mövqeyi tutduğu bir vaxtda Xamenei hücuma keçib. Onun sözlərinə görə, ilk olaraq SEPAH qanadının Rusiya ilə Xəzərdə birgə hərbi təlimlərə başlaması xəbəri yayıldı və bu xəbər, xüsusilə radikal qanada bağlı olan “Təsnim” agentliyi tərəfindən Azərbaycanı təhdid edən üslubla tirajlandı.

Pərviz Əliyev qeyd edir ki, bunun ardınca İranın ən dərin siyasətçilərindən sayılan və qədim Ləricani ailəsinin üzvü olan, Xameneinin sağ əli Əli Ləricani ilə Vladimir Putinin görüşü baş tutdu. Eyni zamanda İran Müdafiə nazirinin Rusiya Müdafiə naziri ilə danışıqları da Tehrandakı radikal dairələrin təkcə bölgə ölkələrinə deyil, ABŞ-yə də mesaj verdiyini göstərir.

Ekspert vurğulayır ki, bu proses eyni zamanda Putin üçün Azərbaycana “sənin yanında Türkiyə varsa, mənim yanımda da İran var” mesajı verməyə imkan yaradır.

Pərviz Əliyev bildirib ki, İranın siyasi və dini dairələrini sarsıdan əsas hadisə isə Tehranın nüfuzlu Ekspertlər Məclisinin nümayəndəsi Ayətullah Nəimabadinin şəxsi iqamətgahında güllələnmiş vəziyyətdə tapılmasıdır. Ekspert qeyd edib ki, İran dövlət mediasının ilkin məlumatına görə, insident qeyri-müəyyən şəraitdə baş verib, hadisənin məqsədli sui-qəsd, yoxsa şəxsi insident olub-olmadığı araşdırılır.

Onun sözlərinə görə, təhlükəsizlik qüvvələri ərazini mühasirəyə alıb və digər din xadimlərinin də təhlükəsizliyi artırılıb. Hələlik heç bir rəsmi orqan açıqlama verməyib, məsuliyyəti isə heç bir qrup öz üzərinə götürməyib.

Əliyev fikrini belə tamamlayıb: “Yuxarıda dediyim kimi, Xameneinin taxtı uğrunda qan axıtma mövsümü açıldı...”

Rasim Əliyev