Türkiyənin müdafiə sənayesində daha bir mühüm addım atılıb – ölkənin ilk hipersəsli ballistik raketi olan “Tayfun Blok-4” rəsmi olaraq ictimaiyyətə tanıdılıb. 

Türkiyə mətbuatının verdiyi məlumata görə, bu yüksək texnologiyalı silah sistemi “Roketsan” şirkəti tərəfindən hazırlanıb və Türkiyənin bu günə qədər istehsal etdiyi ən uzaqmənzilli raket olaraq tarixə düşüb.

10 metr uzunluğa və 7.2 ton çəkiyə malik olan “Tayfun Blok-4” təxminən 3 min kilometr məsafədəki hədəfləri vurmaq gücünə sahibdir. Bu xüsusiyyətləri ilə raket həm regional, həm də strateji məqsədlər üçün əhəmiyyətli silah platforması kimi qiymətləndirilir.

“Tayfun” raketinin adının seçilməsində də simvolik məqamlar var. Raketin yüksək dağıdıcı gücünü və sürətini simvolizə etmək məqsədilə ona Sakit Okeanın qərb hissəsində tez-tez baş verən və böyük fəsadlara yol açan təbii fəlakət – tayfun qasırğalarının adı verilib.

Bu yeni silah sistemi Türkiyənin artan hərbi və texnoloji potensialının bariz nümunəsi kimi qiymətləndirilir. Ekspertlər bildirirlər ki, “Tayfun Blok-4” raketinin istifadəyə verilməsi Türkiyənin regional və qlobal təhlükəsizlik mühitində daha təsirli rol oynamasına imkan yaradacaq.

Eyni zamanda, bu layihə Türkiyənin milli hərbi sənayesinin xarici texnologiyalardan asılılığını tam azaltmaq  istiqamətində atdığı önəmli addımlardan biri kimi qəbul edilir.

“‘Tayfun Blok-4’ uzun mənzillərə çataraq, Türkiyə müdafiə sənayesində növbəti rekorda imza atır. Çəkisi 7 tondan çox olan bu raketin çoxməqsədli döyüş başlığı hava hücumundan müdafiə sistemləri, komanda-idarəetmə mərkəzləri, hərbi anqarlar və strateji obyektlər kimi bir çox hədəfi uzaq məsafədən məhv etməyə qadirdir”, – deyə “Roketsan” bəyan edib.

Bundan əlavə, “Roketsan” daha bir neçə yeni məhsulunu təqdim edib.  

Belə ki, “Atmaca” raketinin “Akata” kapsulu ilə təchiz edilmiş sualtı versiyası da təqdim olunub. Hazırda Türkiyə Silahlı Qüvvələrinin inventarında yer alan “Atmaca” gəmivuran raketinin bu yeni versiyası 250 kilometr (155 mil) məsafəni qət edə bilir.

“Ən müasir texnologiyalarla təchiz olunmuş ‘Akata’ 250 kilometrdən artıq mənzili və yüksək partlayıcı qəlpəli döyüş başlığı ilə ‘Mavi Vətən’in müdafiəsini daha da gücləndirəcək”, – deyə məlumatda qeyd olunub.

“Gökbora” adlı vizual çərçivədən kənar hava-hava raketi 100 dəniz milindən (təxminən 185 km) artıq mənzilə malikdir və həm pilotlu, həm də pilotsuz döyüş təyyarələrindən düşmən hədəflərinə qarşı istifadə olunacaq.

“Eren” adlı yüksək sürətli, çoxməqsədli “loitering munition” (ərazidə dolaşaraq hədəf axtaran sursat) isə aşağı sürətli hava hədəfləri, zirehli və zirehsiz yerüstü obyektlər, həmçinin canlı qüvvəyə qarşı istifadə edilə bilər. Bu silah pilotsuz uçuş aparatlarından, helikopterlərdən, quru nəqliyyat vasitələrindən və dəniz platformalarından buraxıla bilər və 100 kilometrdən artıq mənzili, yüksək dəqiqliyi və uzun havada qalma qabiliyyəti ilə sahədə ciddi tələbatı qarşılayacaq.

Havadan buraxılan ballistik raket sistemi olan “300 Er” jetlərə və pilotsuz döyüş aparatlarına inteqrasiya edilə bilər. Buraxılış hündürlüyü və sürətindən asılı olaraq 500 kilometrdən artıq məsafəyə qədər strateji hədəfləri vurmaq imkanına malikdir. Raketin əsas üstünlüklərindən biri buraxıldığı platformanın düşmənin hava hücumundan müdafiə sahəsinə daxil olmadan hədəfi məhv etməsidir.

Peykləri orbitə çıxarmağa qadir olan “Şimşək-2” adlı kosmik buraxılış vasitəsi 1500 kiloqram (3307 funt) ağırlığında olan peykləri Günəş sinxron orbitinə, 700 kilometrdən yuxarı yüksəkliklərə yerləşdirə bilir.

“Roketsan”ın məlumatına görə, “Şimşək-1” peyk buraxılış vasitəsinin ilk sınaq buraxılışı 2027-ci ilə planlaşdırılır.

Şirkətin baş direktoru Murat İkinci bildirib: “Bu gün raket, sursat və müdafiə texnologiyaları sahəsində qlobal marka olan şirkətimiz, elmi-tədqiqat işləri ilə yeni texnologiyaların öncüsü olmağa davam edir. Hazırladığımız müdafiə sistemləri ilə Türkiyə Silahlı Qüvvələrinin zərbə və caydırıcı gücü olmaqla yanaşı, Amerika, Avropa, Asiya və Yaxın Şərq də daxil olmaqla bir çox bölgəyə ixracla ölkəmizə həm strateji, həm də iqtisadi güc qazandırır.”

O, əlavə edib: “İDEF sərgisində 60-dan çox, sahədə sınaqdan çıxmış, performans baxımından rəqiblərindən fərqlənən və xüsusilə Türkiyə Silahlı Qüvvələrinin inventarında yer alan sistemlərlə iştirak edirik. Eyni zamanda 6 yeni məhsulun təqdimatını da bu sərgidə həyata keçiririk ki, bu da müdafiə texnologiyasında əldə etdiyimiz irəliləyişi bir daha sübut edir.”

Altı gün davam edəcək İDEF sərgisi çərşənbə axşamı günü İstanbul Sərgi Mərkəzi, Atatürk Hava Limanı, WOW Hotel və Ataköy Marina kimi müxtəlif məkanlarda paralel şəkildə keçirilir.

Sərgi “KFA Fairs” şirkəti tərəfindən təşkil olunur və Türkiyə Müdafiə Sənayesi İdarəsi (SSB) ilə Türkiyə Silahlı Qüvvələrini Gücləndirmə Fondu tərəfindən dəstəklənir. “Anadolu” Agentliyi sərginin beynəlxalq media tərəfdaşı kimi çıxış edir.

Sərginin 17-ci buraxılışı çərçivəsində 103 ölkədən nazirlər, baş qərargah rəisləri, komandirlər və yüksək səviyyəli nümayəndələr iştirak edir, 44 ölkə öz stendlərini açıb.

IDEF 2025-də 900-dən çox yerli və 400 xarici müdafiə şirkəti yer alır.

Elman