ABŞ-yə giriş vizası almaq üçün bəzi kateqoriyalı xarici vətəndaşlardan əlavə olaraq 15 min dollar tələb oluna bilər.
Bu barədə məlumat ABŞ Dövlət Departamentinin Federal Reyestr Məlumat bazasında yerləşdirilmiş bildirişində öz əksini tapıb.

Məlumata görə, Amerika hökuməti xarici vətəndaşlara 15 min dollara qədər nağd depozit altında Amerika giriş vizalarının verilməsi üzrə pilot proqrama başlayır.

Bu proqram yalnız işgüzar və turist vizalarının (B-1 və B-2 kateqoriyaları) verilməsinə və ABŞ-də icazə verilən qalma müddətlərini kütləvi şəkildə pozan ölkələrin vətəndaşlarına şamil edilir.
Bundan əlavə, ölkəyə işgüzar və ya turist vizası ilə daxil olmaq istəyənlər Amerika konsulluqlarına özləri haqqında kifayət qədər məlumat vermədikdə nağd depozit tətbiq olunacaq.

Vizanın sahibi ABŞ-ni vaxtında tərk etdikdən sonra əmanət tam olaraq geri qaytarılacaq. Xüsusi şəraitdən asılı olaraq əmanətin məbləği 5 000, 10 000 və ya 15 000 dollar təşkil edəcək.

Yeni reqlamentə əsasən, proqramın əhatə etdiyi ölkələrin siyahısı qərar qüvvəyə minməzdən ən azı 15 gün əvvəl açıqlanacaq.
Proqram yaxın günlərdə rəsmi şəkildə elan olunduqdan sonra bir il müddətində həyata keçiriləcək.