Rusiyanın aqressiv işğalçılıq siyasəti Türkiyəni və digər sahilyanı ölkələri Qara dənizdə hərbi mövcudluğunu artırmağa vadar edir.

Rumıniya Qara dənizdə Türkiyə və Bolqarıstanla birgə fəaliyyətləri artırmağa çağırıb.

Rumıniyanın Müdafiə naziri İonut Mosteanu deyib ki, onun ölkəsi, eləcə də Bolqarıstan və Türkiyə Qara dənizi minalardan təmizləmək üçün birgə işçi qrupunu genişləndirməlidir.

Onun sözlərinə görə, yeni missiyaya enerji obyektlərini və ticarət yollarını Rusiyanın potensial hücumundan qorumaq üçün patrul qüvvələri daxil olacaq: "Yaxın illərdə bu layihəni patrul layihəsinə qədər genişləndirmək lazımdır. Biz bunu yaxın gələcəkdə müttəfiqlərimizlə müzakirə edəcəyik".

O, həmçinin əlavə edib ki, Qara dəniz yaxın illərdə Rusiya üçün döyüş meydanı olaraq qalacaq. Ona görə də ölkələr öz maraqlarını qorumaqla buna müqavimət göstərməlidirlər: "Biz Rusiyaya müqavimət göstərməli və öz maraqlarımızı, yəni enerji infrastrukturu, dəniz ticarəti və naviqasiya azadlığını qorumalıyıq. Bu, bizim məqsədlərimizdir və onlar qorunacaq".

Qeyd edək ki, Qara dəniz Rusiyanın Ukraynaya genişmiqyaslı müdaxiləsindən sonra mühüm hərbi əməliyyatlar teatrı olub. 2024-cü ildə isə Rumıniya, Bolqarıstan və Türkiyə birgə minalardan təmizləmə qrupu yaradıb.

Press-fakt