İran rejimi öncə Vaşinqtonda Azərbaycan və Ermənistan başçıları arasında Zəngəzur dəhlizi ilə bağlı əldə edilən razılaşmaya kəskin reaksiya versə də, getdikcə bu layihə ilə barışmaq məcburiyyətində qalır.

Əvvəlcə Xameneinin anti-Azərbaycan ruporu olan baş müşaviri Əli Əkbər Vilayəti Zəngəzurla bağlı hədə-qorxularla dolu sarsaq açıqlamalar verdi. Sonra fars rejiminin qatı mühafizəkar qanadının digər üzvləri də ona qoşularaq, buna bənzər bəyanatlar səsləndirdilər.

Lakin ardınca Prezident Məsud Pezeşkian bu məsələnin şişirdildiyini bildirərək, Zəngəzur dəhlizinin İranın maraqlarına zərbə vurmayacağını dedi. Lakin Prezidentin bu açıqlamasına yenə mühafizəkar qanadın xüsusilə də parlamentdə oturan təmsilçiləri sərt reaksiya verdilər və Pezeşkianı təslimçilikdə günahlandırdılar.

Nəhayət, bu gün İran XİN rəhbəri Abbas Əraqçi İran hakimiyyətinin Zəngəzur dəhlizi reallığı ilə barışmalı olduğunu etiraf edib. Əraqçi Vaşinqton razılaşması ilə bağlı deyib ki, ermənilər "İranı onun qırmızı xətlərinin qorunacağına əmin ediblər”. Sanki Zəngəzur dəhlizi İranın hansısa “qırmızı xəttini” tapdalayırmış və indi artıq tapdalamayacaq…

Əraqçi “Birinci Kanal”a müsahibəsində deyib ki, Ermənistan Azərbaycanla razılaşmanın detallarını Tehrana ətraflı izah edib. Onun sözlərinə görə, Baş nazir Nikol Paşinyan və erməni diplomatlar şəxsən İran rəhbərliyini əmin ediblər ki, İrana qarşı heç bir təhlükə yoxdur: “Zəngəzur dəhlizi layihəsi əvvəlcə təhlükəli dəhliz yaratmaq cəhdi hesab olunurdu, indi isə söhbət ancaq Ermənistanın suverenliyi altında olan, Amerikanın özəl şirkəti tərəfindən çəkilən yoldan gedir”. 

Sən demə, İrəvanın təminatlarına görə, sərhəddə Amerikanın hərbi və təhlükəsizlik strukturları olmayacaq və təhlükəsizliyi Ermənistan özü təmin edəcək. Maraqlıdır ki, bu zaman İranla sərhəddəki rus sərhədçilərinin taleyi necə olacaq?

O vurğulayıb ki, İran İrəvana öz narahatlığını bildirib, lakin ölkənin bütün “qırmızı xətləri”nin nəzərə alınacağına dair vədlər alıb.

Digər yandan, guya Ermənistanın vədləri olmasaydı, İran artıq ABŞ-nin birbaşa adı keçən Zəngəzur dəhlizində “daşı daş üstə qoymayacaqmış”.

Göründüyü kimi, fars rejimi özünün bu məsələdə məğlub kimi görünməməsi üçün “erməni qardaşları”nın xidmətindən istifadə edir. Yəni, Paşinyan hakimiyyətinin vədlərini öz cəmiyyətinə və regiondakı əlaltılarına ciddi arqument kimi sırıyır. Hansı ki, Zəngəzur dəhlizi ilə bağlı razılaşmada ABŞ şirkətlərinin bu layihədə iştirakı birmənalı olaraq yer alıb. Buna baxmayaraq, sən demə Ermənistan hökumətinin “vədləri” İrandakı rejimin ABŞ-nin Zəngəzurdakı varlığını görməməsi üçün yetərli imiş.

Belədə deyiblər ki, “adın nədir - “Mülayim”, “Sərt” olub nə… edəcəkdin ki?”…

C.Məmmədli