Rusiya artıq tammiqyaslı işğalın başlanmasından bəri qismən işğal olunmuş Ukraynanın dörd vilayətinə tam nəzarəti əldə etmək niyyətində deyil.

Bunu Türkiyənin Xarici İşlər naziri Hakan Fidan “TGRT Haber”-ə müsahibəsində deyib. Fidanın bu açıqlamalarına Ukrayna mətbuatında da geniş yer verilib.

Fidan müsahibəsində deyib: "Əvvəllər ruslar dörd bölgənin bütün inzibati sərhədlərini ələ keçirmək niyyətində idilər. İndi onlar bu tələblərdən əl çəkiblər və bir yer (Donetsk vilayəti-red.) istisna olmaqla, təmas xəttində dayanırlar".

Fidan qeyd edib ki, Türkiyədə Ukrayna və Rusiya arasında keçirilən danışıqların üçüncü raundunda ilk dəfə olaraq hər bir tərəfin konkret mövqeləri təqdim olunub. Onun sözlərinə görə, daha sonra ABŞ Prezidenti Donald Tramp və Vladimir Putin arasında Alyaskada keçirilən görüşdə həmin məsələlər müzakirə edilib.

Türkiyənin XİN başçısı qeyd edib ki, Rusiya indi bütün Donetsk vilayətinə nəzarəti ələ keçirmək, eləcə də Zaporojye vilayətində təmas xətti boyunca mövqelərini saxlamaq istəyir: "Onların (rusların-red.) bunu deməsi və bunun təhlükəsizlik mexanizmi ilə təmin ediləcəyi ilə bağlı razılığa gəlməsi faktı həqiqətən də diqqətəlayiqdir. Bununla yanaşı, hər iki ölkə, xüsusən də ukraynalılar üçün çətin qəbul edilən aspektlər var".

Fidan həmçinin bəyan edib ki, Donetsk vilayəti itirilsə, Ukraynanın qalan əraziləri müdafiə etməsi daha çətin olacaq. Onun sözlərinə görə, beynəlxalq təhlükəsizlik təminatları vəziyyətin sabitləşməsinə və dialoqun inkişafına kömək edə bilər.

Press-fakt