Rusiya pilotsuz uçuş aparatlarının (PUA) Polşanın hava məkanını pozması Avropada ciddi narahatlığa və geniş etirazlara səbəb olub.

Press-fakt xəbər verir ki, hadisə xüsusilə NATO üzvü olan dövlətlər arasında gərginlik doğurub.

ABŞ-ın Avropadakı hərbi qüvvələrinin keçmiş komandanı Frederik Ben Hodges bu pozuntunun təsadüfi olmadığını bildirib. Onun sözlərinə görə, Kremlin məqsədi Qərbin müdaxilə qabiliyyətini sınamaqdır:

“Kreml cavab müddətlərimizi və imkanlarımızı yoxlayaraq məşq edir. F-35 və F-22-lərin pilotsuz təyyarələrə qarşı istifadəsi hələ hazır olmadığımızı göstərir.”

ABŞ prezidenti Donald Tramp isə məsələ ilə bağlı ehtiyatlı mövqe sərgiləyib. O, Rusiya tərəfindən edilən pozuntunun səhv ola biləcəyini istisna etməyib:

“Rusiyanın pilotsuz təyyarələrlə Polşa hava məkanını pozması nə deməkdir? Buyurun,” – deyə Tramp bildirib və hadisədən məmnun olmadığını əlavə edib.

Hadisə ilə bağlı NATO və Avropa İttifaqı daxilində diplomatik müzakirələr davam edir.