Ramiz Mehdiyev vəzifədə olarkən azsaylı media orqanları, “azpolitika” da daxil olmaqla onun fəaliyyətilə bağlı tənqidi materiallarla çıxış edəndə, Mehdiyevin bir çox tərəfdarları, xüsusilə də deputat etdiyi şəxslər onun ünvanına saysız-hesabsız təriflər yağdırırdılar. Üstəlik, bizi belə yazılara görə qınayır, hədələyirdilər. Lakin indi elə həmin şəxslər “baltanın ən yekəsini” götürərək, “yıxılmış” Mehdiyevə münasibətdə bizi və digər tənqidi medianı geridə qoymaqdadır..

Hamıya məlumdur ki, PA rəhbəri postunda ikən Mehdiyev Azərbaycan parlamentinin formalaşmasında müstəsna mənfi rol oynayıb və Milli Məclisə salınan şəxslərin ən azı yarısı onun xeyir-dua verdiyi, məlum sxemlər əsasında deputat etdiyi şəxslər olub. Onun vəzifədə olduğu müddətdə ümumilikdə 5 çağırış Milli Məclisə seçkilər keçirildiyini, hər çağırışda da deputatların təxminən yarısını onun müəyyənləşdirdiyini nəzərə alsaq, belə nəticə çıxır ki, indiyə qədər parlamentə Mehdiyevin “şinelindən çıxan” 300-ə yaxın şəxs düşüb. Bunları Mehdiyevin “deputat korpusu” da adlandırmaq olar.

Bu adamların bir qismi yenə hələ də parlamentdə, ayrı-ayrı dövlət qurumlarında vəzifələrdə, yaxud siyasətdədirlər. Eləcə də böyük biznes, mal-mülk, varidat, imkan, nüfuz sahibləridir. Maralıdır ki, vaxtilə Mehdiyevin hər sözünü özünə əmr, qanun hesab edən bu şəxslərin son günlərə qədər onunla əlaqələri nə səviyyədə olub? Mehdiyevə qarşı dövlətə xəyanət də daxil olmaqla irəli sürülən ittihamlara dair istintaqda keçmiş PA rəhbərinin "deputat korpusu”na aid şəxslərin də adı keçirmi?

Hələlik bu və buna bənzər sualların cavabı açıq qalır. Yəqin ki, buna istintaqın gedişində aydınlıq gətiriləcək. Hələiksə, Mehdiyevin “başına and içən” və onun “çörək verdiyi”(Azərbaycan reallığında məmura, deputata çörək vermək, ona xalqı, dövləti talamaq üçün şərait yaratmaq anlamını daşıyır) keçmiş və hazırkı deputatlar,məmurlar vaxtilə ona yağdırdıqları təriflərin tam əksini deməklə, ondan “uzaq durduqlarını” nümayiş etdirməyə çalışırlar.

Buna aid nümunələr çoxdur. Lakin son günlər ən çox diqqətimizi çəkən deputat Elşən Musayevin sosial şəbəkələrdə yayılan Ramiz Mehdiyevlə bağlı əvvəlki “çılpaq” tərifləri və indiki tamamilə fərqli münasibəti oldu. 

Şəkildə: Dünənədək Ramiz Mehdiyevi müdafiə edən, bu gün isə "baltanın yekəsini götürən" deputat Elşən Musayev

Musayev Mehdiyev vəzifədə olarkən onunla bağlı bəzi media orqanlarında gedən tənqidlərə belə münasibət bildirmişdi: “Ramiz Mehdiyev hər yoldan keçənə cavab verəcəksə, o zaman biz kimik? Nə deyib ortada gəzirik? Ramiz Mehdiyev elə bir şəxsiyyətdir ki, onun söylədiyi hər fikir mükəmməlliyin belə ötəsində durur və bu dəyərli insanın mövqeyi, cəsarəti, kişiliyi məncə çoxları üçün örnək olmalıdır”.

İndi isə həmin deputat deyir: “Ramiz Mehdiyevin yanında olanlar bizdən deyillər!”(!?)

Təbii ki, bu, olduqca eybəcər və dərin təəssüf doğuran mənzərədir. Kimlərsə indi deputat Musayevi və onun kimiləri bu cür yumşaq desək, “mövqe dəyişikliyinə” görə qınayır, “kişilik normaları”ndan danışır. Lakin unutmayaq ki, bu mənzərənin, belə adamların deputat olmasının, vəzifələrə təyin olunmasının baiskarları sırasında məhz Ramiz Mehdiyev ön sırada durur. İndi də özünün becərdiyi ağacın acı meyvələrini doya-doya yeyir.../azpolitika

Cəlal Məmmədli