“PUTİN BU VAXTA QƏDƏR HAKİMİYYƏTDƏ QALMAQ İSTƏYİR...”- “Estafeti oğlu İvana vermək fikrindədir”/"Daily Star"
Rusiya başçısı Vladimir Putin 2050-ci ilə qədər hakimiyyətdə qalmaq istəyir.
Britaniyanın "Daily Star" qəzetinin araşdırmaçı jurnalisti İlya Davlyatçinin yayımladığı məqalədə belə deyilir.
Davlyatçinin sözlərinə görə, İosif Stalindən bəri Kremldə ən uzun müddət oturan 73 yaşlı Putin 97 yaşına qədər hakimiyyətdə qalmaq və sonra hakimiyyəti Alina Kabayevadan oğlan oğlu İvana təhvil vermək istəyir. Hazırda onun 10 yaşı var və yalnız 2050-ci ildə 35 yaşı olacaq. Rusiya qanunvericiliyinə görə isə prezident seçilmək üçün vətəndaşın 35 yaşı tamam olmalıdır.
Putinin səlahiyyət müddətini artırmaq üçün 2020-ci ildə yenidən yazılmış konstitusiyaya görə, o, 2036-cı ilə və ya 83 yaşına qədər prezident qala bilər. Rusiya reallıqları nəzərə alınmaqla, əgər sağ qalarsa, həmin vaxtdan sonra Putinin hakimiyyət ömrünü uzatmaq üçün əlavə olaraq hansısa hüquqi mexanizmlər hazırlanması mümkündür.
Nəşr yazır ki, hakimiyyət müddəti baxımından Putin artıq Pinoçeti (17 il), Kim Çen İri (17 il), Benito Mussolinini, İndoneziya diktatoru Suhartonu (20 il) və Rumıniyaya 24 il rəhbərlik etmiş Nikolae Çauşeskunu üstələyib. 2036-cı ilə qədər hakimiyyətdə qalsa, Putin Mao Tsedunu, Fransisko Frankonu (İspaniya) və Antonio de Salazarı (Portuqaliya) üstələyə bilər.
Əgər Putin 2050-ci ilə qədər hakimiyyətdə qalarsa, o, Müəmmər Qəddafini (42 il), Kim İr Seni (46 il) və Fidel Kastronu (49 il) üstələyəcək və 50 il hakimiyyətdə olmuş İvan Qroznıdan bəri Rusiyanın ən uzun müddət hakimiyyətdə qalan hökmdarı olacaq.
Bu arada Putinin yaxın ətrafı Rusiya Prezidentinin ömrünün uzadılması məsələlərini fəal şəkildə araşdırır. Sentyabr ayında Rusiya Səhiyyə Nazirliyinə qocalma əleyhinə bütün mövcud elmi tədqiqatları təcili olaraq toplamaq tapşırılıb. Bu barədə "The Times" qəzeti hələ ötən il məsələ ilə tanış olan mənbələrə istinadla məlumat verib.
Mediada yer alan xəbərlərə görə, "qocalma əleyhinə müalicə" layihəsinə Putinin yaxın dostlarından biri olan və Kurçatov Nüvə Tədqiqatları İnstitutuna rəhbərlik edən 77 yaşlı Mixail Kovalçuk nəzarət edir. Putinin böyük qızı, endokrinoloq Mariya Vorontsova da bu işdə iştirak edir.
Beləliklə, göründüyü kimi, Rusiyanın gənc nəslini Ukraynadakı müharibəyə “ət maşını”na atar kimi göndərən Kreml üçün əsas prioritet rusların genefondunu yox, Putinin həyatını, hakimiyyətini qorumaq və mümkün qədər uzunömürlü etməkdir.
C.Məmmədli




















