Rusiya rəhbərliyi hər nə qədər Donetskin Pokrovsk şəhərinin tam mühasirəyə alındığı, hətta işğal olunduğu barədə məlumatlar yaysa da, bu xəbərlərlə yerdəki vəziyyət bir-birinə uyğun gəlmir. Bir çox müstəqil mənbələr və Ukrayna Baş Qərargahı bildirir ki, Pokrovskun tam mühasirəsindən söhbət gedə bilməz və şəhrdəki Ukrayna qüvvələri müqavimət göstərməkdə davam edir.

ABŞ Müharibə Araşdırmaları İnstitutunun (İSW) analitiklərinin son hesabatına görə, Rusiya Ukrayna Silahlı Qüvvələrinin Mirnoqraddakı lojistik dəstəyini bloklamağa davam edərkən, Pokrovskun özündə və şəhərin ətrafında Rusiya hücumlarının tempi yavaşlayıb.

İSW 9 noyabrda Pokrovsk istiqamətində Rusiya qüvvələrinin əlavə hücumlara başladığına dair heç bir dəlil tapmadığını bildirir. Rusiya qüvvələrinin logistikanı genişləndirmək və şəhərin cənub hissəsində möhkəmlənmək üçün Pokrovsk istiqamətində hücumlarını yavaşlatdığı görünür.

Hərbi kəşfiyyatdakı mənbə isə bildirib ki, Rusiya qüvvələri Pokrovskun əksər ərazilərindədir, lakin şəhəri mühasirəyə ala bilmirlər: “Ruslar yalnız Pokrovskun cənub hissəsindən infiltrasiya missiyaları həyata keçirir. Mənbə həmçinin bildirib ki, ruslar Ukrayna təchizat yollarına nəzarəti gücləndirmək üçün Pokrovska minaatan heyətləri və əlavə dron operatorları yerləşdirirlər”.

Pokrovsk sektorunda fəaliyyət göstərən ukraynalı hərbçilər qeyd edib ki, pis hava şəraiti Ukraynanın PUA əməliyyatlarına mənfi təsir göstərməyə davam edir. Hansı ki, məhz PUA-lar həm logistikanı, həm də Rusiya infiltrasiya qruplarını(şəhərə sızan qrupları-red.) vurur. Onlar bildirib ki, Ukrayna qüvvələri Pokrovsk boyunca mövqelərini qorumağa davam edir, Rusiya qüvvələri isə yalnız Pokrovskun müəyyən bir hissəsində mövqelərini saxlayır.

Bu arada bəzi Rusiya hərbi müxbirləri Pokrovskdakı döyüşlərin o qədər də şiddətli olmadığını iddia edərək, pulemyot atəşlərinin nadir hallarda baş verdiyini qeyd ediblər.

Təhlildə qeyd olunur ki, ISW yaxın günlərdə Rusiya qüvvələrinin Pokrovskda quru fəaliyyətinin tempini artıracağını gözləyir. Yaxınlıqdakı kiçik Mirnoqrad şəhərində isə Rusiya qoşunları Ukraynanın logistika yollarını daha uğurla kəsə bilir: “Bir kəşfiyyat mənbəyi xəbərdarlıq edib ki, Rusiya qüvvələri Mirnoqrada bütün Ukrayna təchizat xətlərini nəzarətdə saxladığı və ya atəşə məruz qoyduğu üçün Ukrayna qoşunlarının demək olar ki, heç bir logistik dəstəyi yoxdur. O, həmçinin bildirib ki, Rusiya təxribat qruplarının, pilotsuz təyyarələrin zərbələri və mina təhlükəsi səbəbindən Ukrayna Silahlı Qüvvələri artıq Mirnoqrad şəhərinə piyadalar vasitəsilə də sursat daşıya bilmir”.

Qeyd olunur ki, Rusiya qoşunları Mirnoqradın bəzi ərazilərində tikanlı məftillər çəkir, istehkamlar tikir və Rusiya motosiklet qrupları şəhərin şimal hissəsinə daxil olub.

Bu arada, “DeepState” layihəsi də xəbərdarlıq edib ki, Mirnoqrad "əməliyyat mühasirəsi riski ilə üz-üzədir, bütün logistika marşrutları tam atəş və ya fiziki nəzarət altındadır".

C.Məmmədli