Türkiyədə azərbaycanlı kriminal avtoritetlər arasında silahlı qarşıdurma ölümlə nəticələnib.

Lotu Qulinin yaxın adamları ilə mərhum Rövşən Lənkəranskinin yaxınları kimi tanınan “Baba Naxçıvanski”, “Fuad Xarkov” ləqəbli Fuad Hacızadə və digər bir kriminal aləm üzvü arasında dava olub. Sonda “Baba Naxçıvanski” öldürülüb, “Fuad Xarkov” isə yaralanıb.

Məlumata görə, bu dava Lotu Qulinin qohumu Maqa Rustavskinin bıçaqlanmasının qisasının alınması ilə bağlıdır. Bir müddət öncə Lənkəranskinin yaxınları Maqanı qarnından bıçaqlayaraq ağır xəsarət yetirmişdilər.

Modern.az-ın yazdığına görə, “Baba Naxçıvanski” peşəkar cüdoçu və müxtəlif turnirlərin qalibi olub. 



***

Ötən gün martın 31-də axşam saatlarında İstanbulun Başakşehir rayonunda, küçənin ortasında iki silahlı qrup arasında atışma baş verib.
Türkiyə KİV-lərinin xəbərinə görə, atışmada  1-i Azərbaycan vətəndaşı olmaqla 3 nəfər öldürülüb, bir nəfər suriyalı yaralanıb.
 


Hadisə yerli vaxtla saat 18.00 radələrində baş verib. Hamısı xarici vətəndaşlar olan 6 nfər arasında əvvəlcə sözlü mübahisə başlayıb, sonra silahlar işə düşüb. Atışma zamanı Rusiya vətəndaşı olan iki çeçen-Z.N. və K.Y. aldıqları güllə yaralarından hadisə yerində ölüblər. Azərbaycan vətəndaşı R.R. isə yaralı halda xəstəxanaya çatdırılıb, amma orada keçinib. Bir suriyalının da ağır yaralandığı, reanimasiyada olduğu bildirilir.
 


Atışmanın hansısa pul məsələsi üstündə baş verdiyi bildirilir. Atışmada yaralanan suriyalının yanında olan 3 nəfər Gürcüstan vətəndaşının qaçdığı məlum olub. Polis hər yerdə onları axtarır. Polis öldürülən 2 çeçenlə eyni qrupda olan və hadisə yerindən qaçmağa imkan tapmayan 3 şübhəlini saxlayıb. Hadisə insanların gediş-gəlişinin sıx olduğu yerdə baş verib, bəziləri mobil telefonlarla baş verənləri çəkiblər.