“Gözümüzün qarşısında günahsız insanlar ölür. Bu qəzalarda insan ölümləri bizi təəssüfləndirir. Bu gün həyatı avtomobilsiz təsəvvür etmək mümkün deyil. Bir insan həyatını avtomobil yolunda itirir. Hadisələrin təhlili onu göstərir ki, qəzalar bir çox insanların diqqətsizliyi və səhlənkarlığı ucbatından baş verir”, - bunu Baş Dövlət Yol Polisi İdarəsinin rəisi, general-mayor Ramiz Zeynalov Azərbaycan Radiosunun "Təhlükəsiz yol" proqramında çıxış edərkən bildirib.

Globall.az-ın xəbərinə görə, R. Zeynalov qeyd edib ki, yol hərəkəti təhlükəsizliyi dövlət rəhbərliyinin, nazirlik rəhbərliyinin daimi diqqətindədir və narahat edir: “Maarifləndirmə işləri aparmalıyıq ki, günahsız yerə insanlar ölməsin. Amma tək pis hadisələrə köklənməməli, bu sahədəki müsbət işləri də görmək lazımdır”.
BDYPİ rəisi qeyd edib ki, piyada vurulmalarının 97-98 faizində özləri günahkardır. Çünki yol polislərinin sayına görə ölkənin hər yerindəki yollardan məlumat almaq mümkün deyil. Buna görə də bu problemləri vətəndaşların köməyi ilə həll etməliyik.
“Hər hansı piyada yol hərəkəti qaydasını pozubsa, sürücü onu vurubsa, bu o demək deyil ki, biz sürücüyə heç nə etməməliyik. Belə olarsa, cəzasızlıq mühiti yaranar, nə qədər belə hadisələr olar. Buna istintaq zamanı ekspertlər qiymət verir. Amma biz piyadaları maarifləndirməliyik ki, onlar yollardan keçərkən diqqəlti olsunlar. Piyada vurulması ümumi hadisələrin 65-70 faizini təşkil edir. Piyada vurulmalarının 97-98 faizində piyadalar günahkardır. Piyadalar bəzən piyada keçidinin altında vurulur. Yol hərəkətinin təhlükəsizliyi təkcə yaxşı sürücü və yaxşı piyadadan asılı deyil. Lazımı qədər şərait yaradılmalıdır, yeni piyada keçidləri salınmalıdır”.
R. Zeynalov həmçinin qeyd edib ki, xarici ölkələrdə qəzalarla bizim ölkəmizdə baş verən qəzaların sayı eynidir, amma onlara ölüm sayı bizdən dəfələrlə azdır. Çünki orada avtomobillərin özlərinin təhlükəsizlik sistemi daha üstündür. Buna görə də, çalışmalıyıq ki, qəzaların ağırlıq dərəcəsini azaldaq.
R.Zeynalov qeyd edib ki, artıq yollarda o qədər avtomobillər var ki, nəqliyyat vasitələri arasında məsafə demək olar ki, yoxdur.
“Bəzi sürücülər sükan arxasında mesaj yazır, telefonla danışır, hətta problemlərini sükan arxasında yada salırlar. Bəzilərinin evdə münaqişəsi olur, fikirləşir ki, gedim bir az maşın sürüm fikrim dağılsın. Bunlar olmaz. Sükan arxasında oturan insan vəzifə başında olduğunu bilməlidir. Sürücülük həm də peşədir. Dünən axşam 70 yaşlı taksi sürücüsü tuneldə sükan arxasında həyatını itirdi, bu hadisə maşın yüksək sürətlə hərəkət edərkən baş versəydi, görün nələr olardı. İnsanlar sükan arxasında öz durumuna, sağlamlığına diqqət yetirməlidirlər. Bizdə ilkin sürücülük vəsiqəsi alanda, bir də 60 yaşında sürücülüyə namizədlər tibbi müayinədən keçiririr. Bu, olduqca azdır. Bu nüanslarla bağlı qanunvericiliyə dəyişikliklər təklif edəcəyik”, - R. Zeynalov bildirib.
Globall.az