Azərbaycanın 2022-ci il üzrə dövlət büdcəsinə yenidən baxılacaq. Hazırda büdcə ilə bağlı dövlət qurumları tərəfindən təkliflər hazırlanır. Layihə yekunlaşdıqdan sonra baxılması üçün Prezidentə təqdim olunacaq. “Büdcə Sistemi” haqqında qanuna uyğun olaraq dəyişiklik layihəsi daha sonra Milli Məclisin müzakirəsinə çıxarılacaq. Büdcəyə dəyişikliklə əlaqədar pensiya və təqaüdlərə yenidən baxılması nəzərdə tutulur.
 
Növbəti il üçün pensiya və təqaüdlərdə nə qədər artım gözlənilir? 
 
Bununla bağlı Modern.az-a danışan iqtisadçı ekspert Natiq Cəfərli bildirib ki, büdcə xərclərinin artırılması ilə qərarların verilməsi gözlənilir. Lakin artımın nə qədər olacağı barədə konkret fikir bildirmək mümkün deyil. 
 
"Artımın nə qədər olacağı barədə hökumət tərəfindən hər hansı ipucu verilməyib", - deyən iqtisadçının sözlərinə görə, Azərbaycanda ən vacib məqamlardan biri median əmək haqqının aşağı olmasıdır:
 
"Hökumət nümayəndələri bu haqda danışmağı sevmirlər. Ancaq ölkəmizdə median əmək haqqı aşağıdır. Bu, iqtisadi göstərici kimi çox vacibdir. Median əmək haqqı dedikdə əmək müqaviləsi ilə çalışanların orta aylıq maaşı nəzərdə tutulur. Bizdə orta maaş 405 manatdır. 1 milyon 700 min insan əmək müqaviləsi ilə işləyir. Onun yarısının maaşı 405 manat və aşağıdır. Həddindən artıq aşağı göstəricidir. Bu, həm də ölkədə maaşların aşağı olmasının göstəricisidir. Bizdə 405 manat və daha aşağı məbləğdə maaş alan təxminən 850 min insan var".
 

 
Ekspertin fikrincə, minimum əmək haqqının artırılması ilə bağlı qərarın veriləcəyi bildirilir:
 
"Ancaq burada önəmli məsələ var ki, minimum əmək haqqında cüzi artım olur, ciddi keyfiyyət dəyişikliyi olmur. Həm də VÖEN-lə çalışanlara əlavə yük gətirir. Biz dəfələrlə təklif etmişik ki, VÖEN-lə çalışanların Dövlət Sosial Müdafiə Fonduna ödənişlərini minimum əmək haqqından ayırsınlar. Minimum əmək haqqı nə qədər olursa DSMF-yə ödənişlər avtomatik olaraq artır. Məsələn, hazırda minimum əmək haqqının bir kateqoriya üzrə tikinti sektorunda 50 faizini DSMF-yə verirlər. Digər sektorlarda 25 faizini verirlər. Bu isə təqribən 75 manat edir. Ölkədə 700 minə yaxın VÖEN-lə çalışanın olduğunu bilirik və sadaladıqlarımız onlar üçün ağır yükdür. Minimum əmək haqqını artırmaq olar. Bu zaman söhbət kəskin artımdan getməlidir. VÖEN-lə çalışanların DSMF-yə ödənişinə bağlılığı qanundan çıxarılsın. Bu zaman iqtisadiyyata qazanc olacaq və vətəndaşların da real gəlirlərinin artmasında faydalı olacaq. Hər halda əmək haqqı və təqaüdlərin məbləği azdır. 20 faizlik ərzaq inflyasiyasını qarşılayacaq səviyyədə deyil".
 
N.Cəfərli Azərbaycanda minimum əmək haqqının 500 manat olmasını təklif edib:
 
"Əgər minimum əmək haqqı artacaqsa və DSMF-yə ödənişlərdən ayrılacaqsa, ölkədə minimum maaş 500 manat olmalıdır. Ancaq yenə deyirəm, bu VÖEN-lə çalışanlara əlavə yük gətirməməlidir. Dövlət Sosial Müdafiə Fonduna edilən ödənişlərə birbaşa təsir göstərməməlidir. Təqaüdlərin də aşağı həddi təqribən 300-350 manatdan başlamalıdır. Çünki bizdə minimum təqaüd alanların sayı ümumi təqaüd alan insanların sayının 75-80 faizini təşkil edir. Yəni 1 milyon 300 min təqaüdçü var ki, bunun 900 mini ya minimum, ya da minimuma yaxın təqaüd alır".