İsrail ordusu 10 avqust 2025-ci il tarixində Qəzza şəhərindəki “Əl-Şifa” xəstəxanasının yaxınlığında yerləşən jurnalistlər üçün nəzərdə tutulmuş çadır düşərgəsini hədəfə alıb. Qətərə məxsus “Al Jazeera” telekanalı hücum nəticəsində iki müxbir və iki operatorunun həlak olduğunu açıqlayıb.

Telekanalın məlumatına görə, həyatını itirənlər jurnalist Anas al-Sharif (28 yaş), jurnalist Mohammed Qreiqeh, operator Ibrahim Zaher və operator Mohammed Noufal olub. Onlar hadisə zamanı xəstəxana yaxınlığında çəkiliş aparırdılar.

İsrail ordusu açıqlamasında hücumun “Al Jazeera jurnalisti qiyafəsinə girmiş, əslində isə raket hücumlarının təşkilində iştirak edən bir terrorçu”ya qarşı edildiyini iddia edib. Lakin bu iddianın dəstəklənməsi üçün konkret sübut təqdim olunmayıb.

Hadisə beynəlxalq jurnalist təşkilatları, mətbuat hüquqlarını müdafiə edən qurumlar və BMT-nin media nümayəndələri tərəfindən kəskin şəkildə pislənib. Hücum mətbuat azadlığına qarşı açıq təcavüz və müharibə qanunlarının pozuntusu kimi qiymətləndirilib.

Mətbuat Azadlığı Komitəsinin (CPJ) açıqlamasına görə, 2023-cü ilin oktyabrından bəri İsrail–Qəzza münaqişəsində ən azı 186 jurnalist və media işçisi həlak olub ki, onların böyük əksəriyyəti fələstinlilərdir. “Al Jazeera” kanalı isə bu dövrdə artıq bir neçə əməkdaşını itirib – Samer Abu Daqqa (2023), Hossam Shabat (2025 mart) və başqaları.

Hazırkı hücumun qurbanları arasında olan tanınmış müxbir Anas al-Sharif  son aylarda Qəzzada mülki itkilər və humanitar böhran barədə reportajları ilə diqqət çəkirdi. Anas əl-Şərif 2024-cü ildə “Reuters” komandasının tərkibində Qəzza müharibəsinə dair çəkdiyi fotomateriallara görə Pulitzer mükafatı almışdı. Ölümündən az əvvəl o, X sosial şəbəkəsində İsrail ordusunun iki saatdan artıqdır şəhəri intensiv atəşə tutduğunu yazmışdı.

Beynəlxalq təşkilatlar İsrailin media nümayəndələrinə qarşı artan zorakılığına son qoyulması və hücumun məsuliyyətinin araşdırılması üçün təcili çağırış ediblər. 

İsrailin Baş naziri Benyamin Netanyahu həmin gün Qəzza şəhərinin nəzarətə götürülməsini hədəfləyən hərbi əməliyyatın yeni mərhələsinin başladığını elan edib. O, eyni zamanda Qəzzaya “daha çox xarici jurnalistin buraxılacağını” açıqlayıb. İndiyədək İsrail hakimiyyəti təhlükəsizlik səbəblərini əsas gətirərək xarici müxbirlərin müstəqil şəkildə bölgəyə girişinə icazə vermirdi; jurnalistlər yalnız hərbi nəzarət altında təşkil olunan press-turlarda iştirak edə bilirdilər.

Press-fakt